,
ამერიკულ გაზეთ „ნიუ-იორკ თაიმსში“ (The New York Times) დაბეჭდილია სტატია სათაურით „ამერიკა ტრამპ-ბაიდენის მატჩის გამეორებას ურწმუნოდ და უარყოფითად უყურებს“ (ავტორები - რიდეპშტეინი და კენ ბენსინჯერი).
„ამერიკელებს არ სურთ 2020 წლის არჩევნების სცენარის განმეორება, რომლის დროსაც, დონალდ ტრამპსა და ჯო ბაიდენის მწვავე მეტოქეობის გამო, ელექტორატიც ორად იყო გაყოფილი და ერთმანეთს ემუქრებოდნენ.
რესპუბლიკური პარტიის მხარდამჭერები დემოკრატ ჯო ბაიდენს ძალიან სუსტად თვლიან - როგორც პოლიტიკური, ასევე ფიზიკური თვალსაზრისით და ამბობენ, რომ დემოკრატიული პარტია ძალიან დიდ შეცდომას დაუშვებს, თუ მას პარტიულ პრაიმერიზზე ოფიციალურად დაასახელებენ კანდიდატად.
დემოკრატიული პარტიის მხარდამჭერები, თავის მხრივ, მიიჩნევენ, რომ არ შეიძლება პრეზიდენტობის კანდიდატი იყოს პოლიტიკოსი, რომლის წინააღმდეგ ოთხი სისხლის სამართლის საქმეა აღძრული და 91 ბრალდება აქვს წაყენებული.
ამერიკული საზოგადოება რომ ძალიან ცუდად არის განწყობილი, ამაზე სოციოლოგიური გამოკითხვები შედეგებიც მოწმობენ. ორი ძირითადი პოლიტიკური პარტიის - დემოკრატიულისა და რესპუბლიკურის - მომხრეები მოჩვენებით და ილუზიურ იმედებს ეჭიდებიან და ხშირად წარმოუდგენელ თეორიებს ავრცელებენ: პირველებს, დემოკრატებს იმედი აქვთ, რომ დონალდ ტრამპს არჩევნებში მონაწილეობას აუკრძალავენ, ხოლო მეორენი ფიქრობენ, რომ ჯო ბაიდენის ნაცვლად არჩევნებში მონაწილეობას მიიღებს აშშ-ის ყოფილი პირველი ლედი მიშელ ობამა.
„ამომრჩევლები, რომლებიც ფიქრობენ - „ღმერთო ჩემო, ოღონდ 2020 წელი არ განმეორდეს“ - მიხვდებიან, რომ ჩვენ წინ კიდევ ერთი სერია გველოდება - იგივე პერსონაჟებით, მგავსი სიუჟეტური ხაზით. ამას უნდა მივეჩვიოთ“, - ამბობს ჩარლზ ფრანკლინი, რომელიც მარკეტის უნივერსიტეტის მიერ ჩატარებული გამოკითხვის ინიციატორი იყო.
ზოგიერთი რესპუბლიკელის პროგნოზის მიხედვით, დემოკრატიული პარტიის ეროვნული ყრილობის დროს, რომელიც მიმდინარე წლის აგვისტოში ჩიკაგოში უნდა ჩატარდეს, ჯო ბაიდენი პრეზიდენტობის კანდიდატის ოფიციალურ სტატუსს ვერ მიიღებს. ისინი იხსენებენ, როცა 2020 წელს დემოკრატიული პარტიის წამყვანი წევრები სწრაფად გაერთიანდნენ ჯო ბაიდენის ირგვლივ და ისე გააკეთეს, რომ მისი მოწინააღმდეგე - ვერმონტელი სენატორი ბარნი სანდერსი კანდიდატის სტატუსის გარეშე დარჩა. ესე იგი, არ არის გამორიცხული, ახლაც მსგავსი რამ მოხდეს, ოღონდ პირიქით - დემოკრატები თავიანთ მოწყვლად თანაპარტიელ ჯო ბაიდენს ზურგს უჩვენებენ.
დემოკრატები კი, რომლებიც შეშფოთებულები არიან დონალდ ტრამპის მეორედ გაპრეზიდენტების შანსების გამო, „მაშველ რგოლს“ აშშ-ის სამართლებრივი სისტემის წიაღში ეძებენ და იმედი აქვთ, რომ პროკურორები მის პოლიტიკურ მაქინაციებს შეაჩერებენ - ან ნაფიც მსაჯულთა კოლეგიის, ან უზენაესი სასამართლოს მეშვეობით. დემოკრატებს იმედი აქვთ, რომ უზენაესი სასამართლო მხარს დაუჭერს აშშ-ის ორი შტატის უმაღლესი სასამართლოების გადაწყვეტილებას, რომლის თანახმად, აშშ-ის კონსტიტუციის მე-14 შესწორების მიხედვით, დონალდ ტრამპს არჩევნებში მონაწილეობის მიღების უფლება არ აქვს.
წყარო: https://www.nytimes.com/2024/01/19/us/politics/trump-biden-voters-2024-election.html
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
