USD 2.7384
EUR 2.8548
RUB 2.6619
Тбилиси
ნინო გვეტაძე-ჰოლანდიაში მცხოვრები პიანისტი
дата:  661
მიუხედავად იმისა, რომ ჩემი ოჯახის არცერთი წევრი მუსიკოსი არ არის, ფორტეპიანოზე დაკვრა მაინც ადრე, 4 წლის ასაკში დავიწყე. ჯერ ბებიამ მასწავლა რამდენიმე მარტივი სიმღერა, ხოლო იმის შემდეგ, რაც აკორდების ფუნქციას და აგებულებას ავუღე ალღო, უკვე თვითონ ვიგონებდი პატარა პიესებს. განსაკუთრებით ვალსების წერა მხიბლავდა. სულ მალე მიმიყვანეს ნიჭიერთა ათწლედში, სადაც ქალბატონ ვერონიკა თუმანიშვილთან დავიწყე სწავლა. მან ჩაუყარა საფუძველი ჩემს ცოდნას, ჩამომიყალიბა მუსიკალური გემოვნება, დამანახა ბგერის მრავალფეროვნება და მიმაჩვია ფურცლიდან სწრაფად კითხვას. ერთი სიტყვით, შემასწავლა ყველა ის უნარი, რომელიც პროფესიონალ პიანისტს სჭირდება იმისთვის, რომ კიდევ უფრო განვითარდეს და აღმოაჩინოს საკუთარი სახე მუსიკაში. ათწლედის პერიოდში კონცერტებზე ხშირად გამოვდიოდი. ეს ყველაფერი 90-იან წლებში ხდებოდა, ასე, რომ ხშირად გვიწევდა სანთლის შუქით განათებულ, გაყინულ დარბაზში დაკვრა თითებგადაჭრილი ხელთათმანებით.
 
ათწლედის დამთავრების შემდეგ ჩავაბარე ნოდარ გაბუნიას კლასში. მის გაქანებას, ინტელექტს და ნიჭს მართლაც რომ საზღვარი არ ჰქონდა. პირველივე გაკვეთილზე მივხვდი, რომ მისგან ძალიან ბევრს შევიძენდი. ბატონ ნოდარ გაბუნიას მოულოდნელი გარდაცვალების გამო, მის კლასში, სამწუხაროდ, მხოლოდ ორი, განსაკუთრებული წელი გავატარე, თუმცა ბაკალავრის ორი წელი კიდევ წინ მელოდებოდა.
საბედნიეროდ, კონსერვატორიაში კიდევ ასწავლიდა თვალებანთებული, ენერგიული, უნიჭიერესი, საინტერესო და განსაკუთრებული ქალბატონი, ნანა ხუბუტია. სწავლა მასთან გავაგრძელე. მისი დახმარებით ბევრი რამ აღმოვაჩინე საკუთარი შესაძლებლობების შესახებ, გადავწვდი ისეთ რეპერტუარს, რომლის დაკვრაც აქამდე მეშინოდა და მეგონა, რომ არ გამომივიდოდა. თუმცა, როგორც გაირკვა , ნამდვილად ღირს, რომ შეეჭიდო ახალ გამოწვევებს.
 
თბილისში სწავლის შემდეგ დადგა დრო, როდესაც აუცილებელი გახდა ჩემი საზღვარგარეთ გამგზავრება, იმისთვის, რომ გავყოლოდი ჩემს პროფესიულ გზას. ნოდარ გაბუნიას ქალიშვილის, არაჩვეულებრივი მევიოლენეს, ნატო გაბუნიას დახმარებით გავემგზავრე ჰოლანდიაში, სადაც ჩავაბარე ჰააგის სამეფო კონსერვატორიაში, სახელგანთქმული და უაღრესად დახვეწილი პიანისტის, პაულ კომენის კლასში. მოგვიანებით სწავლა გავაგრძელე ჰოლანდიური საფორტეპიანო სკოლის ლეგენდარულ პედაგოგთან, იან ვაინთან ამსტერდამში.
ჰოლანდიაში სწავლის პერიოდში გავიმარჯვე ორ საფორტეპიანო კონკურში, ერთ-ერთი მათგანი გახლდათ ფრანც ლისტის საერთაშორისო კონკურსი უტრეხტში, სადაც მეორე პრემია, მსმენელის და პრესის პრიზი დავიმსახურე. შემდეგ მივიღე ცნობილი მუსიკოსის, მიცუკო უშიდას ფონდის, Borletti-Buitoni Trust-ის გრანტი.
 
დებიუტი კონცერტგებაუს დიდ საკონცერტო დარბაზში 2005 წელს მქონდა როტერდამის ფილარმონიურ ორკესტრთან ერთად, ბედნიერი ვარ, რომ დღემდე ამ დარბაზის ხშირი სტუმარი ვარ. მალევე ფრანგი პიანისტის, ჟან ივ ტიბოდეს რეკომენდაციით, სააგენტოში ამიყვანეს და ასე დაიწყო ჩემი საკონცერტო ცხოვრება.
 
მიხარია, რომ ვუკრავ სოლო კონცერტებს, კონცერტებს ორკესტრთან ერთად და კამერულ მუსიკას. ჩვენი პროფესიიდან გამომდინარე დიდ დროს ვატარებ მოგზაურობაში, რაც ძალიან მიყვარს. ასევე ვასწავლი როტერდამის კონსერვატორიაში და გახლავართ ორი ფესტივალის, Naarden International Piano Festival და Delft Chamber Music Festival -ის სამხატვრო ხელმძღვანელი.
 
ორივე ფესტივალზე ყოველთვის ადგილს ვუთმობ ქართველ შემსრულებლებს და ქართულ მუსიკას. ნაარდენში ყოველ წელს ჩამოგვყავს სტუდენტი საქართველოდან, რომელსაც საშუალება ეძლევა , წარსდგეს მენეჯერების და საკონცერტო დარბაზების ორგანიზატორების წინაშე, გაიცნოს ისეთი დიდი პიანისტები, როგორებიც არიან ალფრედ ბრენდელი, იმოჯენ ქუუფერი, ალექსანდრე გავრილიუკი და მრავალი სხვა.
დელფტში, ქართველი შემსრულებლების გარდა, დიდ ადგილს ვუთმობთ ქართულ მუსიკასაც. ბოლო ორი წლის განმავლობაში შევასრულეთ ნოდარ გაბუნიას, გია ყანჩელის, ეკა ჭაბაშვილის და ალექსნდრე კორძაიას ნაწარმოებები. განსაკუთრებით მეამაყება კამერული ნაწარმოები მარო მაყაშვილზე - მონო დრამა “მარო”, რომელიც დელფტის ფესტივალის დაკვეთით შეიქმნა, მუსიკა ჰოლანდიელ კომპოზიტორ თომას ბაიერს ეკუთვნის, ლიბრეტო კი სალომე ბენიძეს.
 
ყველა პროფესია ითხოვს დიდ სიყვარულს, შრომას და თავდადებას. პიანისტის დანიშნულება შეიცვალა ჩვენს რეალობაში, აღარ არის საკმარისი მხოლოდ კარგად დაკვრა, რადგან ძალიან ბევრი ნიჭიერი მუსიკოსია ჩვენ გარშემო. მნიშვნელოვანია მრავალფეროვანი რეპერტუარი, მსმენელთან სიახლოვე და რეალობის შეგრძნება, რადგან გარშემო მიმდინარე მოვლენები, ყოველთვის აირეკლება ჩვენს პროფესიაზე. მუსიკა ხომ აზრის გადმოცემის საუკეთესო და უნივერსალური საშუალებაა. ახალგაზრდა მუსიკოსებს ვურჩევდი, ისმინეთ ბევრი, იკითხეთ ბევრი, იყავით ცნობისმოყვარენი, არ დაგეზაროთ შრომა და არ დანებდეთ წარუმატებლობის შემთხვევაში, გადადგით ახალი ნაბიჯი. უსმინეთ კრიტიკას, ყველაზე სასაცილოსაც კი, რადგან სიმართლის მარცვალი ყველაგან შეიძლება იყოს მიმალული, მიიღეთ რჩევა და ბოლოს, აუცილებლად ენდეთ საკუთარ თავს.
аналитика
«The Washington Post» (აშშ): „ომისადმი შიშის გამო, საქართველო რუსეთისაკენ დაბრუნებას ირჩევს“

ამერიკული გაზეთი „ვაშინგტონ პოსტი“ (The Washington Post) აქვეყნებს სტატიას სათაურით „ომისადმი შიშის გამო, საქართველო რუსეთისაკენ დაბრუნებას ირჩევს“ (ავტორი - მარია ილიუშინა), რომელშიც განხილულია არჩევნებისშემდგომი სიტუაცია საქართველოში.

გთავაზობთ პუბლიკაციას შემოკლებით:

(...) ქართველთა უმრავლესობა - გამოკითხვების მიხედვით, 80%-ზე მეტი - მხარს უჭერს ქვეყნის ევროპულ ორიენტაციას და მოსკოვის მიმართ მაინცდამაინც განსაკუთრებულ სიყვარულს არ ამჟღავნებს, ოპოზიცია კი ცდილობს ხმის მიცემის შედეგები წარმოადგინოს როგორც არჩევანი ევროკავშირსა და რუსეთს შორის.

მაგრამ იმის გათვალისწინებით, რომ ორ ქვეყანას შორის 2008 წლის აგვისტორში მომხდარი ხანმოკლე ომის შედეგად საქართველოს ტერიტორიის 20% დე-ფაქტოდ რუსეთის კონტროლის ქვეშ იმყოფება, მოსკოვის სამხერო ძლიერების ჩრდილი სულ უფრო შესამჩნევი ხდება. შესაბამისად, „ქართულმა ოცნებამ“ ამომრჩევლებს უფრო რადიკალური დილემა შესთავაზა: არჩევანი მშვიდობასა და ომს შორის.

მმართველი პარტიის „რუსეთის მხარეს შებრუნება“ შედარებით ახალ მოვლენას წარმოადგენს. 2012 წელს, როცა „ქართული ოცნება“ ხელისუფლებაში მოვიდა, მნიშვნელოვან საგარეოპოლიტიკურ წარმატებას მიაღწია - სწრაფად დაუახლოვდა ევროკავშირს მასში გაწევრიანების სურვილით, მაგრამ რუსეთ-უკრაინის ომის დაწყების კვალობაზე პარტიამ რუსეთის ორბიტისაკენ გადაუხვია. მთავრობამ ევროპა და ადგილობრივი ოპოზიცია წარმოადგინა „ომის გლობალური პარტიად“, რომელსაც სურს საქართველო მოსკოვთან ომში ჩაითრიოს და კრემლთან დაპირისპირების ინსტრუმენტად გამოიყენოს

ამჟამად „ქართული ოცნება““ ოფიციალურად პრორუსულ პარტიას არ წარმოადგენს, მაგრამ ხშირად მისი პრაქტიკული მოქმედება საერთო პრორუსულ ჩარჩოებში ჯდება. 

ევროპული გზიდან გადახვევის პოლიტიკის ცენტრში მოჩანს „ქართული ოცნების“ დამაარსებელი ბიძინა ივანიშვილი - მილიარდერი, ყოფილი პრემიერ-მინისტრი, რომელიც ბოლო ათწლეულში წავიდა ქართული პოლიტიკიდან, მაგრამ იმავდროულად გავლენიან ადამიანად რჩებოდა. ბიძინა ივანიშვილი რუსეთში ყოფნის დროს გამდიდრდა, 1990-იან წლებში და როგორც მისი კრიტიკოსები ამბობენ,  მისი რიტორიკა და პოლიტიკური მრწამსი რუსეთის ლიდერის პოზიციას უთავსდება.

რუსეთის არმიის უკრაინაში შეჭრის დაწყებიდან პურველ ეტაპზე საქართველომ უკრაინას მხარი დაუჭირა. თბილისში დღესაც ბევრი უკრაინული დროშა ფრიალებს, მაგრამ მთავრობა თავს იკავებს რუსეთის გადაჭარბებული კრიტიკისაგან და ერიდება ანტირუსული სანქციების რეალიზებას.

„ჩვენ, როგორც ქვეყნის მმართველმა პარტიამ, მთავრობამ, ყველაფერი გავაკეთეთ უკრაინისა და უკრაინელი ხალხის მხარდასაჭერად“, - განაცხადა „ვაშინგტონ პოსტთან“ საუბარში „ქართული ოცნების“ თავმჯდომარის მოადგილემ არჩილ თალაკვაძემ, მაგრამ, მისი თქმით, დასავლეთის ოფიციალურმა პირებმა რუსეთ-უკრაინის ომში საქართველოს ჩათრევა მოისურვეს: „ჩვენ ჩავთვალეთ, რომ ასეთი პოლიტიკა საქართველოსათვის ძალზე სარისკო და გაუმართლებელი იქნებოდა“.

„ქართულმა ოცნებამ“ წინასაარჩევნო კამპანიის დროს აქტიურად ისარგებლა უკრაინის ომით და ამომრჩევლებს პლაკატების სერია შესთავაზა, რომლებზე გამოსახულია ერთი მხრივ, ომით დანგრეული უკრაინის ქალაქები და სოფლები, მეორე მხრივ - აღმშენებლობის პროცესში მყოფი საქართველო. ასეთმა პროპაგანდამ თავისი გამოძახილი ჰპოვა რუსეთთან ომგადატანილ საქართველოს მოსახლეობაში, განსაკუთრებით სოფლებში, ოკუპირებულ რეგიონებთან ახლოს, მხარეთა დამაშორიშორებელ ე.წ. სადემარკაციო ხაზის გასწვრივ.

როგორ ავიცილოთ თავიდან ომი

ქართველებს კარგად ახსოვთ 2008 წლის აგვისტოს ომი. ჭორვილისაკენ - ბიძინა ივანიშვილის მშობლიური სოფლისაკენ მიმავალი გზა, რომელიც კავკასიის ქედის სამხრეთ კალთებზე მდებარეობს, სწორედ რუსეთის მიერ ოკუპირებული რეგიონის - სამხრეთ ოსეთთან ახლოს გადის, სულ რაღაც ორიოდე კილომეტრში, სადემარკაციო ხაზთან.

ჭორვილაში ბიძინა ივანიშვილს თითქმის ეროვნულ გმირად თვლიან - მდიდარ ადამიანად, რომელიც თანასოფლელებს ყოველმხრივ ეხმარებოდა - სახლებისა თუ გზების მშენებლობაში, ჯანდაცვასა თუ კომუნალური გადასახადების გადახდაში, სანამ მან სახელმწიფო თანამდებობა - ქვეყნის პრემიერ-მინისტრის პოსტი არ დაიკავა.

„მე ომის მოწინააღმდეგ ვარ. დარწმუნებული ვარ, რომ „ქართული ოცნება“ მსვიდობას შეინარჩუნებს. არ გვსურს, რომ რომელიმე ქვეყანა საქართველოს მტერი იყოს და არც ის გვინდა, რომ საქართველოს იყოს სხვა ქვეყნის მტერი“, - ამბობს გიორგი გურძენიძე, სკოლის დირექტორი, რომელსაც ახსოვს, თუ როგორ ხმაურით დაფრინავდნენ სოფლის თავზე, ცაში რუსული თვითმფრინავები 2008 წელს.

„ქართული ოცნება“ აქტიურად უჭერს მხარს ბიძინა ივანიშვილის პოლიტიკური კურსის ორ ძირითად მომენტს - მშვიდობას ნეიტრალიტეტის გზით და ქართული ტრადიციული ფასეულობების დაცვას. „ქართული ოცნების“ მტკიცებით, მისი სტრატეგიული მიზანი არ შეცვლილა - ევროინტეგრაცია ძალაში რჩება, რომლის რეალიზებას 2030 წლისათვის არის დაგეგმილი: საქართველო ევროკავშირის წევრი გახდება „ღირსეულად“ და ტრადიციული ეროვნული ფასეულობების დაცვით.

„რა თქმა უნდა, მსურს ევროკავშირის წევრი ვიყოთ, მაგრამ ჩვენ ჩვენი წინაპრების ღირსებაც და მემკვიდრეობაც უნდა დავიცვათ. ქალი ქალი უნდა იყოს, კაცი კი - კაცი“, - ამბობს ჭორვილელი მამია მაჭავარიანი.

ქართველთა ღირსება კი დაცული იქნება ორი კანონით, რომლებმაც, პრაქტიკულად, ევროკავშირში საქართველოს პოტენციური წევრობის პროცესი შეაჩერეს - იმიტომ, რომ მათი დებულებები ევროპული ბლოკის სტანდარტებს ეწინააღმდეგება. ეს კანონებია „ოჯახური ფასეულობებისა და არასრულწლოვანების დაცვის, ასევე უცხოური გავლენის გამჭვირვალობის შესახებ, რომლებიც, როგორც ოპოზიცია აცხადებს, რუსული სამართლებრივი აქტების ასლებს წარმოადგენენ.

ევროპა შორეული ხდება?!

საქართველოს დედაქალაქის მცხოვრებთა ნაწილი შეშფოთებულია, რომ ქვეყნის შანსი ევროკავშირის წევრობაზე მცირდება. „არჩევნებში „ქართული ოცნების“ გამარჯვება სხვა არაფერია, თუ არა ხელისუფლების უზურპაცია“, - ამბობს 38 წლის გიორგი, რომელიც გვარს არ ასახელებს, ვაითუ დევნა დაუწყონ, - „ჩვენ ევროკავშირთან ინტეგრაცია უნდა გავაღრმავოთ. რუსეთთან დაახლოებას კი არცერთი ნორმალური ქვეყანა არ ცდილობს. პრორუსუსლი ორიენტაცია თვითმკვლელობას ნიშნავს, რადგან მოსკოვი არანაირი შეთანხმების პირობებს არ იცავს“.

ოპოზიცია მწვავედ აკრიტიკებს „ქართული ოცნების“ ომის წინააღმდეგ მიმართულ კურსს და მას პროპაგანდისტულს უწოდებს, ზოგიერთები კი თვლიან, რომ მმართველ პარტიის მხრიდან ამგვარი ლოზუნგების წარმოჩენა ხელისუფლებაში დარჩენასა და ერთპარტიული მმართველი სისტემის შენარჩუნებას ემსახურება.

პარტია „საქართველოსათვის“ ლიდერის გიორგი გახარიას განცხადებით, ბიძინა ივანიშვილისა და „ქართული ოცნების“ პოლიტიკაში მომხდარი ცვლილებები - პრორუსული გადახრები - იმითაა გამოწვეული, რომ ევროკავშირში გაწევრიანება ხელისუფლების როტაციას ნიშნავს: „მისი მთავარია მიზანია ხელისუფლების შენარჩუნება. იგი ხედავს, რომ ევროპული დემოკრატია ხელისუფლების არჩევნების გზით შეცვლას ითვალისწინებს“.

მაგრამ არჩევნების შედეგების წინააღმდეგ მიმდინარე საპროტესტო აქციები ისეთივე ძლიერი და ფართო არ არის, როგორიც გაზაფხულზე მიმდინარეობდა ზემოთ ხსენებული კანონების მიღების დროს. ეს ნიშნავს, რომ ოპოზიცია გამოფიტულია. მათ ვერც დასავლეთი ვერ უწევს სათანადო დახმარებას. ბრიუსელს შეუძლია გარკვეული ზეწოლა მოახდინოს „ქართულ ოცნებაზე“, მაგრამ ევროპელი ჩინოვნიკების რეაქცია აწონილ-დაწონილია: დამკვირვებლებმა ნამდვილად დააფიქსირეს დარღვევები, მაგრამ მათ თავი შეიკავეს იმის განცხადებაზე, რომ არჩევნები გაყალბდა და ხმები მოპარულია.

არჩევნებში მომხდარი ყველა დარღვევის დეტალურად გამოკვლევა დროს მოითხოვს - კვირეებს და შეიძლება თვეებსაც, თანაც საკმაოდ რთულია მათი დამტკიცება-დადასტურება. „ჩვენ ახლა ისეთ სიტუაციასთან გვაქვს საქმე, როცა დასავლეთს არ სურს ხისტი ნაბიჯები გადადგას საკმარისი მტკიცებულებების გარეშე, ოპოზიციას კი საკმარისი მტკიცებულებები არ აქვს“, - ამბობს ჯონ დიპირო საერთაშორისო რესპუბლიკური ინსტიტუტიდან.

ბიძინა ივანიშვილი აშკარად იმაზე დებს თავის ფსონს, რომ ევროპა საქართველოსადმი ინტერესს დაკარგავს. ჯერ კიდევ ზაფხულში იგი აცხადებდა, რომ აშშ-ის საპრეზიდენტო არჩევნებში დონალდ ტრამპის გამარჯვება რუსეთ-უკრაინის ომს დაასრულებს. „ჩვენ მაქსიმუმ ერთი წელი გვაქვს, რომ ეს ყველაფერი მოვითმინოთ, შემდეგ კი [დასავლეთის] გლობალური და რეგიონული ინტერესები შეიცვლება, მათთან ერთად კი შეიცვლება ინტერესები საქართველოს მიმართაც“, - ამბობდა ბიძინა ივანიშვილი, - ომის დასრულებასთან ერთად კი ყველა გაუგებრობა ევროპასთან და ამერიკასთან გაქრება“.

წყარო: https://www.washingtonpost.com/world/2024/11/21/georgia-russia-elections-influence/

 

более
голосование
ვინ გაიმარჯვებს რუსეთ - უკრაინის ომში?
голосование
Кстати