ნიკოლოზ ვაშაკიძე - ივერი მელაშვილი საქართველოს ინტერესებს ისე მტკიცედ იცავდა, რომ ერთი-ორჯერ აზერბაიჯანმა ქართული მხარისგან მისი კომისიიდან დათხოვნა მოითხოვა

Date: 429

ივერი მელაშვილი საქართველოს ინტერესებს ყოველთვის ისე მტკიცედ იცავდა, რომ ერთი-ორჯერ აზერბაიჯანულმა მხარემ ქართული მხარისგან მისი კომისიიდან დათხოვნა მოითხოვა, - ამის შესახებ საგარეო საქმეთა მინისტრის ყოფილმა მოადგილემ ნიკოლოზ ვაშაკიძემ “პალიტრანიუსის“ გადაცემა “დღის ნიუსრუმში“ განაცხადა.

ვაშაკიძის ინფორმაციით, მელაშვილი “საკითხებში დეტალური, სკრუპულოზური წვდომით მძიმე მდგომარეობაში აყენებდა როგორც აზერბაიჯანულ მხარეს, ასევე თავის ხელმძღვანელობას და არავის აძლევდა საშუალებას, რომ რაიმე დეტალი გამორჩენოდა“.

“ნიშანდობლივია, რომ სამშობლოს ღალატის ბრალდება წაუყენეს ექსპერტებს - ტექნიკური დონის გადაწყვეტილებების მიმღებებს და მათ სთხოვენ პასუხს იმ გადაწყვეტილებებზე, რომელიც პოლიტიკურ დონეზე იქნა მიღებული. პოლიტიკურ დონეზე მიღებული გადაწყვეტილების კრიტიკაც ძალიან არაპროფესიონალურ და სამარცხვონო დონეზე ხდება. აშკარად იგრძნობა, საქმე გვაქვს მართლა გულწრფელ და ნორმალურ გამოძიებასთან თუ დაკვეთასთან. ამოგლეჯილია რაღაც მომენტი, რის გარშემოც სურთ ააგონ ყველაფერი და მილიონი ნიუანსი, როცა ერთი მეორეს განაპირობებს, არც კი იხილება. ძალიან ხშირად სასურველი და შესაძლებელი ერთმანეთში ერევათ. როცა რაღაც უკეთეს რუკას იპოვიან, რომელიც რაღაც დეტალსა და მონაკვეთში ინტერესს აკმაყოფილებს, უნდა დაფიქრდნენ, პოლიტიკურად და იურიდიულად რამდენად შესაძლებელი იყო მისი გამოყენება და რამდენად ასახავს ის საქართველოს ინტერესებს საზღვრის დანარჩენ მონაკვეთში. როცა საუბარია იმაზე, რომ საქართველომ სახელმძღვანელოდ 200 000-იანი მასშტაბის რუკა უნდა აიღოს და როცა მხოლოდ გარეჯის მონაკვეთს უყურებ, ვინმემ დასვა კითხვა - საქართველო-აზერბაიჯანის საზღვარი დაახლოებით 600 კილომეტრია, რაც დელიმიტაციას მოითხოვს, დანარჩენი ასეულობით კილომეტრ ნაწილში აღნიშნული რუკა საქართველოსთვის სასარგებლოა?! მე როგორც მაქვს ინფორმაცია, ჩვენთვის ეს რუკა მთლად კარგი და მომგებიანი, საზღვრის მთელი პერიმეტრის თვალსაზრისით, არ არის. ყველა შესაძლო პლუსის, მინუსის, სასურველის გათვალისწინებით მიღებულ იქნა ოპტიმალური გადაწყვეტილება, რომ საფუძვლად 500 000-იანი მასშტაბის რუკა აეღოთ, რასაც 1996 წელს მოეწერა ხელი. მართალია, ეს რუკა ზუსტად გარეჯის მონაკვეთში ქართულ მხრეს პრობლემას უქმნიდა, მაგრამ გადაწყვეტილი იყო, რომ საკითხი ტერიტორიის მონაცველობის გზით გადაწყვეტილიყო. სწორედ ამ მიმართულებით მიდიოდა მუშაობა“, - განაცხადა ნიკოლოზ ვაშაკიძემ.

საგარეო საქმეთა მინისტრის ყოფილი მოადგილის შეფასებით, საქართველო-აზერბაიჯანის საზღვრის დელიმიტაციის საკითხი, მათ შორის დავით გარეჯის საკითხი, “ვაი პატრიოტების მუშაობის შედეგად, კიდევ უფრო გართულდა“.

მისივე თქმით, საკითხი ასევე მკვეთრად გაამწვავა პრეზიდენტმა სალომე ზურაბიშვილმა “თავისი არაპროფესიონალური ჩარევით“.

პარიზის წიგნის ფესტივალზე საქართველოს მწერალთა სახლი ეროვნული სტენდით პირველად არის წარმოდგენილი

კულტურის სამინისტროს მხარდაჭერით 12-14 აპრილს საქართველოს მწერალთა სახლი 2024 წლის პარიზის წიგნის ფესტივალზე ეროვნული სტენდით პირველად მონაწილეობს.

Grand Palais Éphémère–ში ფესტივალისა და საქართველოს ეროვნული სტენდის გახსნას მწერალთა სახლის დირექტორი ქეთევან დუმბაძე, საქართველოს საგანგებო და სრულუფლებიანი ელჩი საფრანგეთის რესპუბლიკაში გოჩა ჯავახიშვილი და ლიტერატურული სფეროს წარმომადგენლები ესწრებოდნენ.

საქართველოს ეროვნული სტენდის პრეზენტაცია გაიმართა ღონისძიებით - „ჰაგიოგრაფიიდან პოსტმოდერნიზმამდე“. მწერალთა სახლის სტენდის სტუმრებს, ქართული მწერლობის გაცნობასთან ერთად, საინტერესო კალიგრაფიულ აქტივობაში ჩართვის შესაძლებლობა ჰქონდათ. კალიგრაფმა გიორგი სისაურმა მათ ქართული ანბანით დაუწერა სასურველი სიტყვები, გამონათქვამები, ფრაზები, სახელები და ა. შ. ასევე გაიმართა ღონისძიება, სახელწოდებით, „თექვსმეტსაუკუნოვანი უწყვეტი ლიტერატურული პროცესი“, რომელიც განიხილავს ქართულ ლიტერატურას, ქართულ-ფრანგულ ლიტერატურულ ურთიერთობებსა და ქართული და ევროპული ლიტერატურის კავშირს.

პირველ საფესტივალო დღეს გამართულ პანელ-დისკუსიაში მონაწილეობა მიიღეს საქართველოს საგანგებო და სრულუფლებიანმა ელჩმა საფრანგეთის რესპუბლიკაში გოჩა ჯავახიშვილმა და ფრანგული ფილოლოგიის დოქტორმა, პროფესორმა, ივანე ჯავახიშვილის სახელობის თბილისის სახელმწიფო უნივერსიტეტის რომანული ფილოლოგიის ფაკულტეტის ხელმძღვანელმა ბელა ხაბეიშვილმა. შეხვედრას ასევე ესწრებოდნენ უცხოელი გამომცემლები, ლიტერატურული აგენტები, მედიის წარმომადგენლები და ქართული სათვისტომოს საპატიო წევრები.

ფესტივალის მსვლელობისას ქართულ სტენდზე დაგეგმილია არაერთი აქტივობა და საქმიანი შეხვედრა - PUBLISHERS MATCHMAKING. შეხვედრის მონაწილეები იქნებიან საქართველოს მწერალთა სახლი, ქართული გამომცემლობები: „სეზან ფაბლიშინგი“, „მედუზა,“ „ბაკმი“ და მთარგმნელები - მაია ვარსიმაშვილი და მაია გიორხელიძე. შეხვედრაზე განიხილავენ ქართული ლიტერატურის კატალოგს. მთარგმნელი დალი იაშვილი წარადგენს მიხეილ ჯავახიშვილის მოთხრობას - „ლამბალო და ყაშა“ და მოთხრობების კრებულს. მთავარ სცენაზე გაიმართება წიგნის - „მზე, მთვარე და პურის ყანა“ წარდგენა. წიგნს წარადგენენ ავტორი - მწერალი და კინორეჟისორი თემურ ბაბლუანი და ეროვნული კინოცენტრის წარმომადგენელი ევროპაში სოფიო ბაბლუანი. ქართველ გამომცემლებთან ერთად საქართველოს სტენდთან იქნებიან ფრანგული გამომცემლობები: LE CHERCHE MIDI, GINGKO, EDITIONS DES CARNETS DU DESSERT DE LUNE, MEDUZA, და იტალიური გამომცემლობა MODERN TIMES, რომლებიც წარმოადგენენ ფრანგულად თარგმნილ კლასიკურ და თანამედროვე ქართულ პროზასა და პოეზიას.

საქართველოს ეროვნულ სტენდზე წარმოდგენილი იქნება ბუკლეტი ქართველი ავტორების 50-ამდე ნამუშევრის სინოპსისითა და ამონაბეჭდებით ისეთი ცნობილი ნაწარმოებებიდან, როგორიც არის „შუშანიკის წამება“, „ვეფხისტყაოსანი“ და სხვა.

აღსანიშნავია, რომ პარიზის წიგნის ბაზრობა ევროპის ერთ-ერთი ყველაზე მნიშვნელოვანი კულტურული მოვლენაა, რომელიც ყოველწლიურად გაზაფხულზე იმართება და მასში მონაწილეობას 1 200 გამომცემელი და 2 000 ავტორი იღებს. საქართველოს წელს პირველად მიეცა საშუალება, საკუთარი სტენდით ჩაერთოს საფესტივალო აქტივობებში.

ფესტივალში ეროვნული სტენდით მონაწილეობა საქართველოსთვის ძალიან მნიშვნელოვანია.

საფესტივალო აქტივობები მწერალთა სახლს, ქართველ მწერლებსა თუ გამომცემლებს დაეხმარება ლიტერატურული ურთიერთობების წარმართვაში, ქართული მწერლობის პოპულარიზაციაში, ახალი კონტაქტების მოძიებასა და მთარგმნელობითი საქმიანობის ხელშეწყობაში.