ეროვნული ბანკის პრეზიდენტი ნათია თურნავა ამბობს, რომ სებ-ი მონეტარული ოქროს გაყიდვას არ გეგმავს, რადგან ცენტრალური ბანკისთვის ის კარგი და მიმზიდველი აქტივია. თუმცა ნათია თურნავა აცხადებს, რომ იმ შემთხვევაში თუ საერთაშორისო რეზერვებში მონეტარული ოქროს მოცულობა ზღვრულ 20%-ს მიაღწევს, მარეგულირებელი საკითხის გადაწყვეტის ორ გზას განიხილავს.

ასე უპასუხა მან პარლამენტში "ქართული ოცნების" დეპუტატების მიერ ოქროს რეზერვებზე დასმულ კითხვას. როგორც მან თქვა, ამჟამად რეზერვებში ოქროს აქტივის ზედა ზღვარი 20%-ით არის განსაზღვრული და ფასის ზრდის შემთხვევაში, ზედა ზღვარი გადაიხედება ან სებ-ი ოქროს ბაზარს მიაწვდის. დღეის მდგომარეობით, ეროვნული ბანკის საერთაშორისო სავალუტო რეზერვების მოცულობა 4.5 მილიარდი დოლარია, აქედან დაახლოებით 758 მლნ დოლარი ღირებულების მონეტარული ოქროა.

"ჩვენ შევიძინეთ 500 მლნ დოლარის ღირებულების ოქრო იმ დროს, როცა ფასები გაცილებით დაბალი იყო. მას შემდეგ ორჯერ და მეტად გაიზარდა ფასი. ამიტომ აქედან გამომდინარე, ვფიქრობ ეს სწორი ნაბიჯი იყო. ოქროს ინვესტიციის მთავარი ამოცანაა გრძელვადიან პერსპექტივაში მეტი დივერსიფიკაცია, რადგან მსოფლიო ბაზარზე ოქროს ფასები ვოლატილობით ხასიათდება, ახლა იზრდება გლობალური რისკების ზრდის მომატების პირობებში, თუმცა როგორც კი ეს რისკები შემცირდება მისი ფასი შეიძლება ქვევით წამოვიდეს.

ამან არ უნდა შეგვაშინოს, რადგან ჩვენი მთავარი ამოცანაა პორტფელში ინსტრუმენტი გვქონდეს. როცა ოქროს ვიძენდით, შესაბამისმა კომიტეტმა მაშინვე იმსჯელა თუ რა უნდა იყოს ზედა ზღვარი იმიტომ, რომ ამ ტიპის აქტივს რეზერვებში ზედა ზღვარი უნდა გააჩნდეს. დავაწესეთ 20%-იანი ზღვარი და როცა შევიძინეთ მისი მოცულობა [ჯამურ რეზერვებში] დაახლოებით 11% იყო, შემდეგ ფასების ზრდის შესაბამისად მისი წილი გაიზარდა და ამჟამად 16.8%-ს აღწევს. არ გამოვრიცხავთ, რომ გარკვეულ მომენტში 20%-ს მიუახლოვდეს. ვიმსჯელებთ ზღვარი ავწიოთ თუ ნაწილი ოქრო ბაზარს მივაწოდოთ, თუმცა არ ვგეგმავთ მონეტარული ოქროს გაყიდვას, რადგან ვთვლით, რომ ეს საკმაოდ კარგი და მიმზიდველი ინვესტიციაა ჩვენთვის", - ამბობს თურნავა.

სებ-ის პრეზიდენტმა სარეზერვო აქტივების დივერსიფიკაციის მნიშვნელობაზეც გაამახვილა ყურადღება და საკუთარი გამოსვლის ფარგლებში დაასახელა კონკრეტული რიცხვები, თუ რამდენით გაიზარდა ოქროს ღირებულება ეროვნული ბანკის მიერ მონეტარული ოქროს შეძენიდან.

"სარეზერვო აქტივების ეფექტური მართვაც მნიშვნელოვან როლს ასრულებს. სწორედ ამ მიზნით გასულ წელს სებ-მა სარეზერვო აქტივების დივერსიფიკაცია განახორციელა და 2024 წლის მარტში ეროვნულმა ბანკმა 500 მლნ აშშ დოლარის ღირებულების ოქრო შეიძინა. 2024 წლის დეკემბრის მდგომარეობით, მონეტარული ოქროს ღირებულება, მისი შეძენის მომენტიდან, დაახლოებით 99 მლნ აშშ დოლარით გაიზარდა. 2024 წლის დეკემბრის შემდეგ ოქროს ფასი გლობალურად მნიშვნელოვნად გაზრდილია, აპრილის მდგომარეობით ჩვენი ოქროს ღირებულება შეძენის თარიღთან შედარებით 257.7 მილიონით არის გაზრდილი. ეს ფაქტი ეროვნული ბანკის რეზერვების დივერსიფიკაციის სტრატეგიის მართებულობას უსვამს ხაზს“, - აღნიშნა სებ-ის პრეზიდენტმა.

სებ-ის პრეზიდენტმა პარლამენტში 2024 წლის ანგარიშის წარდგენისას აღნიშნა, რომ სებ-ის გრძელვადიანი პოლიტიკა ყოველთვის მიმართულია საერთაშორისო რეზერვების დაგროვებასა და სარეზერვო აქტივების ეფექტურ მართვაზე. "წელს საერთაშორისო სავალუტო რეზერვების შესყიდვები შარშანდელ წმინდა გაყიდვებს ბევრად აჭარბებს" - განაცხადა თურნამავ, თუმცა შესყიდული რეზერვების ზუსტი რიცხვის დასახელებისგან თავი შეიკავა. ამასთან, ის ამბობს, რომ სებ-ი აგრძელებს რეზერვების შესყიდვებს, რომლის შესახებაც უახლესი სტატისტიკა მაისის ბოლოს გამოქვეყნდება.

სებ-ის პრეზიდენტის ინფორმაციით, 2025 წლის აპრილის მონაცემებით, საქართველოს ოფიციალური სარეზერვო აქტივების მოცულობა 4.5 მლრდ აშშ დოლარს შეადგენს.

„თუკი წინა წელს წმინდა გაყიდვებმა შეადგინა 434,75 მილიონი დოლარი, წელს ჩვენი წმინდა შესყიდვები, უკვე ბევრად მეტია, ვიდრე შარშანდელი წლის წმინდა გაყიდვები. 2025 წელს ვახორციელებთ სავალუტო შესყიდვებს, რომელსაც ეტაპობრივად ვაქვეყნებთ ყოველთვიურად. ხაზგასმით ვიტყვი, რომ წელს ჩვენ არ გაგვიყიდია, მხოლოდ ვყიდულობთ და 2025 წლის დასაწყისიდან უფრო მეტი ვიყიდეთ, ვიდრე გასულ წელს წმინდა გაყიდვა გვქონდა“, - დასძინა მან.