,
პარლამენტის განათლების, მეცნიერებისა და ახალგაზრდულ საქმეთა კომიტეტი თბილისის მასშტაბით, სასკოლო ინფრასტრუქტურის მშენებლობისა და სარეაბილიტაციო სამუშაოების გაცნობას აგრძელებს.
კომიტეტის თავმჯდომარე გივი მიქანაძე და პარტია „ქართული ოცნება-დემოკრატიული საქართველოს“ ნაძალადევის რაიონის დელეგატი ირაკლი ხელაძე მე-10 და მე-11 საჯარო სკოლების მშენებლობის პროცესს ადგილზე გაეცნენ.
„დღეს ჩვენ დავათვალიერეთ ნაძალადევის რაიონის სკოლები. ვიმყოფებოდით მე-10 და მე-11 საჯარო სკოლებში, სადაც მშენებლობა აქტიურად, დადგენილი გრაფიკით მიმდინარეობს. სულ მალე ქალაქს შეემატება კიდევ ორი ახალაშენებული, თანამედროვე სტანდარტების სკოლა. ასევე, დავათვალიერეთ რაიონის რამდენიმე სკოლა, სადაც გავეცანით იმ აუცილებელ საჭიროებებს და გამოწვევებს, რომლის წინაშეც ეს სკოლები დგანან. განათლების, მეცნიერებისა და ახალგაზრდობის სამინისტროსთან ერთობლივი ძალისხმევით მივიღეთ კონკრეტული გადაწყვეტილებები თუ როგორ უნდა მოხდეს ამ საჭიროებებზე შესაბამისი რეაგირება უახლოეს პერიოდში. ერთობლივი ძალისხმევით, ვაგრძელებთ მსგავსი აქტივობების განხორციელებას, როგორც თბილისის მასშტაბით, ასევე რეგიონებში“, - განაცხადა გივი მიქანაძემ.
როგორც განათლების, მეცნიერებისა და ახალგაზრდობის მინისტრის მოადგილე გიორგი ჯინჭარაძემ აღნიშნა, სამინისტროს ერთ-ერთი უმთავრესი პრიორიტეტია სასკოლო ინფრასტრუქტურის განვითარება.
„სულ მალე, ჩვენს მოსახლეობას, ჩვენს მოსწავლეებს საშუალება ექნებათ თანამედროვე სკოლებში გააგრძელონ სწავლება. მე-10 და მე-11 სკოლა ერთად, დაახლოებით 1 500 ბავშვზეა გათვლილი და მოხარული ვარ, რომ მშენებლობის პროცესი წარმატებით მიმდინარეობს“, - განაცხადა გიორგი ჯინჭარაძემ.
დღესვე, საკანონმდებლო ორგანოს წარმომადგენლებმა განათლების, მეცნიერებისა და ახალგაზრდობის მინისტრის მოადგილე გიორგი ჯინჭარაძესთან, სსიპ საგანმანათლებლო და სამეცნიერო ინფრასტრუქტურის განვითარების სააგენტოს დირექტორ ირაკლი კუპრავასთან და ნაძალადევის რაიონის გამგებელ ირაკლი ანდღულაძესთან ერთად, 141-ე, 207-ე, 154-ე და 48-ე საჯარო სკოლების ინფრასტრუქტურა დაათვალიერეს.
„ამ სკოლებში ჩვენი სტუმრობის მიზანია, დროულად გადაიჭრას ის საჭიროებები, პრობლემები და გამოწვევები, რომლებიც აწუხებთ ბავშვებს, მშობლებს, პედაგოგებს და მაქსიმალურად ეფექტიანად გაგრძელდეს როგორც სასწავლო, ისე სამშენებლო პროცესი“, - განაცხადა ირაკლი ხელაძემ.
განათლების, მეცნიერებისა და ახალგაზრდულ საქმეთა კომიტეტის და ნაძალადევის რაიონის დელეგატის, ირაკლი ხელაძის ინიციატივით, კანონმდებლებმა დღეს 6 საჯარო სკოლა დაათვალიერეს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
