,
პურის მცხობელთა ასოციაციის ხელმძღვანელის მალხაზ დოლიძის ინფორმაციით, ფქვილის სუბსიდირების შეწყვეტის შემდეგ პურის ფასი ადგილობრივ ბაზარზე 10 თეთრით გაიზარდა და ამ გაზრდილი ღირებულებით პური დაახლოებით ოქტომბერ-ნოემბრამდე გაიყიდება. ამ საკითხზე მან მედიაცენტრ „მთავარში“ ისაუბრა.
„სახელმწიფოს მხრიდან ფქვილის სუბსიდირების პროგრამიდან გამოსვლის შედეგად, დღეს 1 ტომარა ფქვილის ღირებულება 61-62 ლარს შეადგენს. ამის გამო წარმოებები იძულებული შეიქმნენ ისეთ პურზე, როგორიცაა ქვის პური, კორექტირება შეეტანათ. შესაბამისად, ეს პური დაახლოებით 10 თეთრით გაძვირდა.
მიუხედავად იმისა, რომ პურის მწარმოებლებმა ფასი მხოლოდ 10 თეთრით გაზარდეს, ჩვენ საბოლოო რეალიზაციის ფასში ვერ ვერევით. ბაზრის ლიბერალიზაციიდან გამომდინარე ზოგიერთმა მაღაზიამ ფასი შეიძლება უფრო მეტადაც გაზარდოს, რაც ჩემი შეფასებით, მათი მხრიდან არასწორი იქნება. ჩემს ხელთ არსებული ინფორმაციით, „ნიკორას“ ქსელში პური 15 თეთრით გაძვირდა“, - განმარტა მალხაზ დოლიძემ.
პურის მცხობელთა ასოციაციის ხელმძღვანელმა ადგილობრივ ბაზარზე ფქვილის ღირებულების ზრდის მიზეზებზე ისაუბრა და აღნიშნა, რომ პანდემიის პერიოდში ხორბლის ღირებულება ყველა საექსპორტო ქვეყანაში გაძვირდა. თუმცა მისი განმარტებით, პური ფასი მხოლოდ ფქვილის გაძვირებით არ გაზრდილა. მალხაზ დოლიძემ გაძვირების მიზეზად სხვა ფაქტორებიც დაასახელა ისეთი როგორიცაა, გაძვირებული ენერგომატარებლები, შესაფუთი მასალები და პურის გამოსაცხობად საჭირო სხვა იმპორტირებული პროდუქტები.
„პროგნოზი ცუდი არ არის. არსებული ინფორმაციით, საქართველოში ხორბლის მოსავალი წელს ძალიან კარგია, იმპორტირებული ხორბალიც ხელმისაწვდომი ფასით შემოდის. ვერ დავადასტურებ იმას, რომ პურის ფასი შემცირდება, რადგან ყველაფრის ფასი იმატებს, შესაბამისად ეს არარეალურია.
ფქვილის ღირებულება პურში არის 60%, შესაბამისად, ის ძირითადი ერთეულია, რომელიც პურის ფასს ქმნის, ამიტომ ვფიქრობ, რომ პური მეტად აღარ გაძვირდება და დღეს არსებული ფასი ოქტომბერ-ნოემბრამდე შენარჩუნდება“, - განმარტა მალხაზ დოლიძემ.
ცნობისთვის: საქართველოს მთავრობამ ფქვილის სუბსიდირებიდან გამოსვლის გადაწყვეტილება ივლისში მიიღო. პროგრამა, რომელმაც პურზე ფასის ზრდა გადააზღვია, გასული წლის დეკემბრიდან მოქმედებდა და ის ივნისის ბოლოს დასრულდა.
იმის გამო, რომ ახლა ხორბლის ახალ მოსავალს ელიან როგორც ქვეყნის შიგნით, ისე მთავარ იმპორტიორ ქვეყნებში, საქართველოს მთავრობამ ჩათვალა, რომ სუბსიდირებიდან გამოსვლისთვის ახლა კარგი დროა, თან იმ ფონზე, როცა ხორბალსა და ფქვილზე ფასს შემცირების ტენდენცია აქვს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
