მთავრობა ქარსაფარი ზოლის მართვის საკითხების დახვეწა-რეგულირებას აპირებს. შესაბამისი კანონპროექტი პარლამენტის 2026 წლის საგაზაფხულო სესიისთვის გათვალისწინებულ მთავრობის კანონშემოქმედებითი საქმიანობის მოკლევადიანი გეგმაშია გაწერილი, რომლის შესახებაც განკარგულებას ირაკლი კობახიძემ ხელი 30 იანვარს მოაწერა.

კანონპროექტის მიხედვით, მიწის მდგრადი მართვის სააგენტოს მიწის კერძო მესაკუთრეების ნაკვეთის საზოგადოებრივი საჭიროებისათვის ექსპროპრიაციის უფლება ექნება, ქარსაფარი ზოლების მომიჯნავედ არსებული მიწის მფლობელებს კი ქარსაფარი ზოლების ფიზიკური დაცვის ვალდებულება გაუჩნდებათ. ამასთან, ქარსაფარი ზოლების ინვენტარიზაცია 10-წლიანი ინტერვალით სავალდებულო გახდება.

„კანონპროექტის მიზანია ქარსაფარი (მინდორდაცვითი) ზოლის მართვასთან დაკავშირებით რიგი საკითხების დახვეწა-რეგულირება. კანონპროექტის თანახმად, წესდება ქარსაფარი ზოლების პერიოდული ივენტარიზაციის (10 წელიწადში ერთხელ) სავალდებულოობა, განისაზღვრება: ქარსაფარი ზოლის სტატუსის შეწყვეტისათვის სახელმწიფო ან საზოგადოებრივი მნიშვნელობის უპირატესი ინტერესი, სახელმწიფო საკუთრებაში არსებული ქარსაფარი (მინდორდაცვითი) ზოლის მართვისა და განკარგვის საკითხები, ასევე, ქარსაფარი ზოლის ეფექტიანობის მიზნების გათვალისწინებით, საქართველოს გარემოს დაცვისა და სოფლის მეურნეობის სამინისტროს მმართველობის სფეროში მოქმედი საჯარო სამართლის იურიდიული პირის − მიწის მდგრადი მართვისა და მიწათსარგებლობის მონიტორინგის ეროვნული სააგენტოს უფლებამოსილება კერძო საკუთრებაში არსებული მიწის ნაკვეთის ან/და მისი ნაწილის აუცილებელი საზოგადოებრივი საჭიროებისათვის საკუთრების უფლების ჩამორთმევის - ექსპროპრიაციის თაობაზე. ასევე, უძრავი ნივთის მესაკუთრეებს, რომელთა მიწის ნაკვეთ(ებ)ი მდებარეობს აღდგენილი და გაშენებული ქარსაფარი ზოლის სტატუსის მქონე მიწის ნაკვეთის მომიჯნავედ ან/და დაცვის არეალში, დაეკისრებათ ვალდებულება უზრუნველყონ ამ ქარსაფარი ზოლის ფიზიკური დაცვა. აიკრძალება ამ კანონით განსაზღვრული ქარსაფარი ზოლების ინვენტარიზაციის ვადის ამოწურვამდე საკუთრების უფლების რეგისტრაცია იმ მიწის ნაკვეთებზე ან/და მათ ნაწილზე, რომლებიც მოქცეულია შესაბამისი საარქივო დოკუმენტებით აღრიცხული ქარსაფარი ზოლების ტერიტორიებში, გარდა იმ შემთხვევისა თუ მიწის ნაკვეთზე საკუთრების უფლების რეგისტრაცია მოთხოვნილია ამ კანონის ამოქმედებამდე გაცემული საკუთრების უფლების ან/და მართლზომიერი მფლობელობის (სარგებლობის) დამადასტურებელი დოკუმენტების საფუძველზე“, - ნათქვამია განკარგულებაში.

ქარსაფარი (მინდორდაცვითი) ზოლების ინვენტარიზაცია 2021 წელს დაიწყო. დღეის მდგომარეობით, ინვენტარიზებულმა ქარსაფრებმა მოიცვა 12 ათას ჰექტარზე მეტი ფართობი, აქედან 6 ათას ჰექტარამდე ქარსაფარს მინიჭებული აქვს შესაბამისი სტატუსი. ინვენტარიზაცია და სტატუსის მინიჭება ქარსაფარი ზოლების აღდგენა-გაშენების დაწყების საფუძველია. 2026 წლის სამიზნე მაჩვენებელი არანაკლებ 150 ჰექტარს შეადგენს. გარემოს დაცვისა და სოფლის მეურნეობის სამინისტროს ინფორმაციით, ქარსაფარი სისტემების მოწყობის გრძელვადიან სახელმწიფო გეგმის მიხედვით, საქართველოში 2030 წლამდე არანაკლებ 5000 ჰექტარი ქარსაფარი უნდა გაშენდეს.