მთაწმინდის რაიონის შემოერთებულ ტერიტორიებზე საგზაო ინფრასტრუქტურის მოწესრიგება აქტიურად მიმდინარეობს.
ამ ეტაპზე, კოჯორში კვინიტაძის ქუჩის (დევნილთა დასახლების) რეაბილიტაცია დასრულდა. პროექტის ფარგლებში, 7 000 კვ.მ ფართობზე ასფალტის ორფენიანი საფარი დაიგო და 2 500 მეტრი სიგრძის ბორდიური მოეწყო. საგზაო სამუშაოების დაწყებამდე აღნიშნულ ქუჩაზე კომპანია „ჯორჯიან უოთერ ენდ ფაუერმა“ წყლის ქსელი სრულად განაახლა.
ბოლო ეტაპის სამუშაოებს მთაწმინდის რაიონის გამგებელი დავით კირკიტაძე გაეცნო და ადგილობრივ მცხოვრებლებს შეხვდა.
„მიმდინარე წელს კოჯორში არაერთი პროექტი განვახორციელეთ. ახლაც მიმდინარეობს ორი ქუჩის რეაბილიტაცია. რაც შეეხება დევნილთა დასახლებას, აქ 100-მდე ოჯახი ცხოვრობს, შესაბამისად, ამ პროექტის განხორციელება ძალიან მნიშვნელოვანი იყო. მოსახლეობას განსაკუთრებით უხვი ნალექის დროს უჭირდათ გადაადგილება და ახლა ეს პრობლემა მოეხსნებათ“- განაცხადა დავით კირკიტაძემ.
სამუშაოებისთვის ადგილობრივი ბიუჯეტიდან დაახლოებით, 1 მილიონი ლარი გამოიყო.
