,
სხვადასხვა ქვეყანას განსხვავებული გემოვნება აქვს. რა თქმა უნდა, გასაკვირი არ არის, მაგრამ ამ პროდუქტების გაშვება უცნაურად ჩანს, იმის მიუხედავად, მსოფლიოს რომელ წერტილში იმყოფებით. იმ ფონზე, რომ დასავლური ბრენდები აქტიურად ცდილობენ აზიის ბაზრის ათვისებას, ექსპერიმენტებს აქტიურად ატარებენ და როგორც ჩანს, გამოსდით კიდეც.
Pringles-მა, ახალ ბაზრებზე გასასვლელად, უჩვეულო გემოები შექმნა. ზოგი საინტერესოც კია – მაგალითად, თურქეთისთვის – კეტჩუპის არომატი, საფრანგეთის ბაზრისთვის – შემწვარი ქათამი მწვანილით, ხოლო სერანოს ლორის არომატი მექსიკაში ბრენდის გამარჯვებული იყო. თუმცა, საეჭვოა, რა ბედი ელის მარილიანი ზღვის მცენარეების გემოს, ტაილანდის ბაზრისთვის რომ შეიქმნა ან იაპონიისთვის მოფიქრებულ სოკოს სუპის ვარიანტს. თუმცა, სწორედ ამ ახალი პროდუქტის განვითარებით, Pringles-მა შეძლო ბრენდის ზრდა 9.8%-ით $910 მილიონამდე (2021 წელს) კონკურენტული სნექის კატეგორიაში.
KitKat-მა გვიჩვენა, როგორ უნდა გავაფართოვოთ ბრენდი სხვა ქვეყანაში ეფექტურად. იაპონიაში, KitKat-ის 350-ზე მეტი განსხვავებული გემოს ვარიანტია, ალუბლის ყვავილით დაწყებული, ედამამის ლობიოთი, ტკბილი კარტოფილით, ნესვითა და ატმით დამთავრებული. Nestle-ის ბრენდის სტრატეგია იყო კულტურული ტრადიცია შემოეტანა, როდესაც ადამიანებს ასეთი ტკბილეული საჩუქრად მიაქვთ დღესასწაულებზე ან სამუშაო მოგზაურობებზე.
KitKat-ის ასეთ პროდუქტებს შორის ყველაზე დიდი პოპულარობა მატჩას მწვანე ჩაის ვერსია იყო, რომელმაც სენსაციური ეფექტი იქონია გამოჩენისას.
Oreo – გლობალურ მომხმარებელთა ინტერესის მიპყრობის მიზნით, Oreo აგრესიულად უშვებს თამამი არომატის კომბინაციებს: სიმინდი, ალუბლის კოლა, ფეიერვერკი…
მისმა პროდუქტებმა მომხმარებელთა მოწონება დაიმსახურა, ხოლო 2018 წელს, აქტიურად მოხვდა მედიაში მას შემდეგ, რაც ჩინელ მომხმარებლებს ქათმის ცხელი ფრთები და ვასაბის არომატი გააცნო.
ბრენდი სულ უფრო ზრდის მომხმარებლების ჩართულობას, გლობალური პროდუქტის განვითარების სტრატეგიის გასაუმჯობესებლად. აშშ-ში კამპანიის „ჩემი ორეოს შექმნა“ ფარგლებში, გულშემატკივრებს სთხოვეს წარედგინათ გემოების იდეები ინსტაგრამზე და ტვიტერზე, რათა მათი შექმნის პროცესში მიეღოთ მონაწილეობა.
Cadbury-ის მფლობელმა Mondelez-მა ჩამოაყალიბა სტრატეგია APAC-ში სწრაფად მზარდი საშუალო კლასის სეგმენტის ასათვისებლად. მან გახსნა ლაბორატორიები სინგაპურში, ჩინეთში, ინდოეთსა და ინდონეზიაში ისეთი ახალი პროდუქტების შესაქმნელად, რომლებიც მომხმარებელთა ყურადღებას მიიპყრობს.
Dairy Milk Kopi C გახლდათ Cadbury-ის პირველი არომატი, რომელიც ადგილობრივი დაკვირვებით შეიქმნა. პროდუქტი მალაიზიაში გამოუშვეს და რაკი მოსახლეობას ძალიან უყვარს ყავა და ყავახანები, პროდუქტს ყავის ელფერი დაჰკრავს. ასევე, შეიქმნა მანგოს არომატი ინდოეთის ბაზრისთვის.
წყარო: the drum
ამერიკის შეერთებული შტატები “მშვიდობის საბჭოს” პირველი ოფიციალური სამიტისთვის ემზადება. პრეზიდენტ ტრამპის მიერ შექმნილი ახალი საერთაშორისო ორგანიზაციის პირველ სხდომას ვაშინგტონში მდებარე, ტრამპისვე სახელობის მშვიდობის ინსტიტუტი უმასპინძლებს.
არსებული ინფორმაციით, მას წევრი ქვეყნების უდიდესი ნაწილი, 20-ზე მეტი სახელმწიფოს ლიდერი დაესწრება. მათ შორის იქნებიან საუდის არაბეთის, თურქეთის, ეგვიპტის, კატარისა და ინდონეზიის წარმომადგენლები. ასევე სომხეთისა და აზერბაიჯანის მმართველები.
როგორც ირკვევა, პირველ სამიტზე პრეზიდენტი დონალდ ტრამპი ღაზას რეკონსტრუქციისთვის ფონდის შექმნას დააანონსებს და გამოაცხადებს, თუ როგორ დაკომპლექტდება ის “საერთაშორისო სტაბილიზაციის სამხედრო ძალა”, რომელიც ღაზას სექტორის საზღვარზე განლაგდება და უზრუნველყოფს, რომ ისრაელსა და ჰამასს შორის სამხედრო მოქმედებები აღარ განახლდეს.
ჯერჯერობით, უცნობია, ზუსტად რა რაოდენობის სამშვიდობოებს გაგზავნიან სახელმწიფოები, თუმცა ცნობილია, რომ ინდონეზიის კონტრიბუცია ამ მხრივ 8,000 ჯარისკაცი იქნება. რაც შეეხება ფინანსებს, პრეზიდენტი ტრამპი მოელის, რომ ღაზას სექტორის ხელახლა აღდგენისთვის წევრი სახელმწიფოებისაგან მილიარდობით დოლარს მოიზიდავს. შეგახსენებთ, “მშვიდობის საბჭოს” წევრობის საწევროს გადასახადი ერთ ქვეყანაზე $1 მილიარდია, თუმცა განსაზღვრული არ არის, ეს თანხა უნდა ჩაირიცხოს ერთიანად, თუ სხვადასხვა პროექტების ფარგლებში, მთელი წლის განმავლობაში. შესაბამისად, სავარაუდოა, რომ შტატების ლიდერი კოლეგებს ფონდში პირველადი ფინანსური კონტრიბუციის შეტანას სწორედ $1-მილიარდიანი ვალდებულების ფარგლებში სთხოვს.
რაც შეეხება ჰამასს, რომლის განიარაღებისა და ძალაუფლების ჩამორთმევის გარეშეც “მშვიდობის საბჭო” ღაზას სექტორის რეკონსტრუქციასა და ახალი ადმინისტრაციის სრულფასოვან მმართველობას ვერ უზრუნველჰყოფს, არსებული ინფორმაციით, მის ტერორისტებს საშუალება ექნებათ, სამშვიდობო ძალებს საკუთარი ნებით ჩააბარონ იარაღი და როგორც პალესტინის მშვიდობიანმა მცხოვრებლებმა, ისე განაგრძონ ცხოვრება. მათთვის, ვისაც ასეთ რეალობაში დარჩენა არ ენდომება, “მშვიდობის საბჭო” პარტნიორი ქვეყნების მეშვეობით ღაზას სექტორიდან გასვლაში დაეხმარება. შეგახსენებთ, ამჟამად ჰამასის ხელმძღვანელობის პოზიციაა, რომ ახალ ღაზაში დარჩენა და ჯარისკაცების საპოლიციო ძალებში გაწევრიანება სურთ, რათა იმ ბრძოლამ, რაც წლების განმავლობაში სექტორის დაცვისთვის გასწიეს, უკვალოდ არ ჩაიაროს. თუმცა როგორც ტრამპის ადმინისტრაცია, ისე ისრაელი ამ ფორმით ჰამასის ღაზაში დარჩენას კატეგორიულად ეწინააღმდეგებიან. სავარაუდოა, რომ შუამავალი სახელმწიფოები, რომლებიც “მშვიდობის საბჭოშიც” არიან წარმოდგენილი, 19 თებერვალს ამ საკითხზე აქტიურად იმსჯელებენ.
