,
სასამართლომ თაღლითობის ბრალდებით რუსეთის სამხრეთ სამხედრო ოლქისა და 58-ე არმიის ყოფილი მეთაური, გენერალი, ივან პოპოვი დააპატიმრა.
თანამდებობიდან პოპოვი გასული წლის ზაფხულში გენერალური შტაბის უფროსს, ვალერი გერასიმოვთან კონფლიქტის ფონზე გაათავისუფლეს. კონფლიქტის მიზეზი, ივან პოპოვის მიერ წარდგენილი ანგარიში გახდა, რომელშიც საუბარი იყო ფრონტისპირა მოქმედი დანაყოფების როტაციის აუცილობლობაზე.
ივან პოპოვი ბოლო 1 თვის განმავლობაში დაპატიმრებული მესამე გენერალია, მანამდე მექრთამეობის ბრალდებით დააპატიმრეს, სერგეი შოიგუს მოადგილე, ტიმურ ივანოვი და თავდაცვის სამინისტროს კადრების განყოფილების უფროსი, იური კუზნეცოვი.
პოპოვის დაპატიმრების შესახებ თავდაპირველად Z ტელეგრამ არხები Военный осведомитель და Два майора. ტელეგრამ არხების მიერ გამოქვეყნებული შეტყობინებიდან დაახლოებით 1 საათში პოპოვის დაპატიმრების შესახებ დაწერა რუსეთის სახელმწიფო საინფორმაციო სააგენტომ და ძალოვანებთან დაკავშირებულმა ტელეგრამ არხმა Mash-მა.
TAСС-ის ცნობით, პოპოვი ბრლადებულია თაღლითობაში განსაკუთრებით დიდი ოდენობით. ამავე წყაროს ცნობით, პოპოვის საქმე რუსეთის 235-ე საგარნიზონო სასამართლომ განიხილა.
Mash-ის ცნობით, პოპოვს ადანაშაულებენ 2 ათასი ტონა მეტალის კონსტრუქციების გაყიდვაში, რომელიც საომარი მოქმედებების ზონაში თავდაცვითი ზღუდეების ასაშენებლად იყო გათვლილი. ამავე წყაროს ცნობით, პოპოვთან ერთად დანაშაულებრივ სქემაში ჩართულები იყვნენ ბიზნესმენები კრასნოდარიდან და 58-ე არმიის ოფიცერი.
კონტექსტი
პოპოვი რუსეთის 58-ე არმიის მეთაურის პოსტს 2023 წლის ივლისამდე იკავებდა, სწორედ ის მეთაურობდა უკრაინის სამხრეთ რეგიონებში მოქმედ საოკუპაციო დანაყოფებს უკრაინის კონტრიერიშის საწყის პერიოდში.
რუსეთის თავდაცვის სამინისტროსთან დაახლოებული წყაროების ცნობით, პოპოვის გათავისუფლებისა და ვალერი გერასიმოვთან კონფლიქტის მიზეზი მის მიერ მომზადებული ანგარიში იყო. ანგარიშში პოპოვი მოწინავე ქვედანაყოფების როტაციის აუცილებლობაზე წერდა, რამაც გერასიმოვის უკმაყოფილება გამოიწვია.
გერასიმოვმა პოპოვი პანიკიორობასა და ხელმძღვანელობის შანტაჟის მცდელობაში დაადანაშაულა, რასაც მალევე მისი თანამდებობიდან გადაყენება მოჰყვა.
პოპოვი მისი ქვეშერმდომების მიმართ გავრცელებულ აუდიო შეტყობინებაში ამბობდა, რომ ის "ვერაგულად და მოღალატეობრივად მოიშორეს."
სკანდალის შემდეგ ივან პოპოვი მივლინებაში სირიაში გაგზავნეს, საიდანაც მალევე რუსეთში თაღლითობის მუხლით აღძრული საქმის ფარგელბში დაიბარეს. რუსული წყაროების ცნობით, თავდაპირველად საქმეზე ბრალდებული პოპოვის დაქვემდებარებული პირი იყო.
ივან პოპოვი რუსეთის არმიაში დიდი პოპულარობითა და ავტორიტეტით სარგებლობდა.
წყარო:https://realpolitika.ge/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
