,
კრიპტოინდუსტრიაში მკვეთრი დაღმასვლისა და კოლაფსის ტენდენცია გრძელდება - ამჯერად გაკოტრების გამოცხადება კრიპტოპლატფორმა Voyager Digital-ს მოუწია, რომელიც სინგაპურში დაფუძნებული ჰეჯ-ფონდის Three Arrows Capital-ის $670-მილიონიანი დეფოლტის შემთხვევასთანაა დაკავშირებული.
საქმე იმაშია, რომ 3AC-ის $670-მილიონიანი სესხი, რომლის გასტუმრებაც ჰეჯ-ფონდმა ვერ შეძლო, Voyager Digital-ის მიერ იყო გაცემული, რომელსაც, თავის მხრივ, ვალდებულებები არაერთი საფინანსო ორგანიზაციის წინაშე აქვს.
Reuters-ის ინფორმაციით, Voyager-ი ამჟამად $1 მილიარდის აქტივებს ფლობს, თუმცა მას $10 მილიარდის ვალდებულებები აქვს, რისი მომსახურების რესურსიც კომპანიას არ გააჩნია, Voyager-ზე ახალი ვალის გაცემისგან კი ყველა მსხვილი საერთაშორისო ბანკი და ფინანსური ორგანიზაცია თავს იკავებს.
კონკრეტულად რომელი ორგანიზაციებისა და ბანკების მიმართ აქვს Voyager-ს ვალდებულებები, ჯერჯერობით, უცნობია, თუმცა კომპანიის მიერ გასაჯაროებული ინფორმაციიდან ირკვევა, რომ კრედიტორთა რაოდენობა 100,000 ფიზიკურ და იურიდიულ პირს აღწევს.
კომპანიის განცხადებაში ნათქვამია, რომ $110 მილიონის სავალუტო რეზერვით Voyager-ი თანამშრომლების ანაზღაურებას და ოფისების ოპერირებისთვის აუცილებელ ხარჯებს დაფარავს, რათა უახლოეს მომავალში შესაძლებელი გახდეს გაკოტრების გეგმის შედგენა და ახალი სტრატეგიის დასახვა, რომელიც კომპანიას ვალდებულებების ნაწილის გასტუმრების საშუალებას მაინც მისცემს.
აღსანიშნავია, რომ $670-მილიონიანი დეფოლტი Three Arrows Capital-ის გაკოტრებითაც დასრულდა - ჰეჯ-ფონდის აქტივების ლიკვიდირების პროცედურა უკვე დაწყებულია.
მიმდინარე წლის 3 თვეში საქართველომ 25.7 ათასი დოლარის ღირებულების ორგანოთერაპიისთვის განკუთვნილი ჯირკვლები და სხვა ორგანოების იმპორტი განახორციელა. 2022 წლის დასაწყისში ქვეყანაში შემოტანილი ორგანოების მოცულობა გასული 4 წლის ანალოგიური პერიოდების იმპორტს აღემატება.
ოფიციალური სტატისტიკით ორგანოთერაპიისთვის შემოტანილი ამ დასახელების საქონლის მოცულობა იანვარ-მარტში 0.13 ტონა იყო.
რაც შეეხება ორგანოების იმპორტის წლიურ მონაცემებსა და იმ ქვეყნებს, სადაც საქართველო საქონელს ყიდულობს, საქსტატის მიხედვით, ბოლო ათი წლის განმავლობაში იმპორტის ყველაზე მაღალი მაჩვენებელი 2012 წელს გვქონდა (183 ათასი დოლარი, 0.74 ტონა). აღსანიშნია, რომ პანდემიის დაწყების პირველ წელს საქართველოდან 0.23 ტონა ორგანოების შესაძენად 155 ათასი დოლარი გავიდა. გასულ წელს კი 0.44 ტონა იმპორტირებული საქონლის ღირებულებამ 89.9 ათასი დოლარი შეადგინა.
ოფიციალური სტატისტიკიდან ჩანს, რომ ორგანოთერაპიისთვის განკუთვნილი ჯირკვლებისა და სხვა ორგანოების ყველაზე დიდი მომწოდებელი საქართველოსთვის აშშ-ია - 77.9 ათასი დოლარი, მას მოსდევს გაერთიანებული სამეფო - 3.8 ათასი დოლარი, ჰონ-კონგი - 3.3 ათასი დოლარი, გერმანია - 2.1 ათასი დოლარი, ავსტრალია - 0.9 ათასი დოლარით. საიმპორტო ქვეყნებს შორისაა: კანადა, იტალია, ახალი ზელანდია, ისრაელი, ბელგია და შვეიცარია.
წყარო:https://bm.ge/
