მოკლულია ჩეჩენი ბლოგერი მამიხან უმაროვი, რომელიც რამზან კადიროვს ხშირად აკრიტიკებდა - ბლოგერი ცეცხლსასროლი იარაღით მოკლეს.
“კავკაზ რეალის ინფორმაციით, მკვლელობა ავსტრიაში, ქალაქ გერასდორფში, ერთ-ერთ სავაჭრო ცენტრთან მოხდა. ის თავის არეში ცეცხლსასროლი იარაღითაა მოკლული. ევროპაში ჩეჩნური დიასპორის წარმომადგენლის თქმით, თავდამსხმელი ჩეჩნეთიდან იყო. ის ავსტრიის პოლიციამ ქალაქ ლინცში დააკავა.
ჩეჩენი ბლოგერი რამზან კადიროვს აკრიტიკებდა. მას YOUTUBE არხი ჰქონდა და ის საზოგადოებისთვის ასევე ცნობილი იყო სახელით"ანზორი ვენიდან". უმაროვი ავსტრიაში პოლიტიკურ თავშესაფარს ითხოვდა.
ეს პირველი შემთხვევა არ არის, როდესაც ევროპაში მყოფი ჩეჩნები, რომლებიც კადიროვს და ვლადიმირ პუტინს აკრიტიკებდნენ და ქვეყნის დატოვება მოუხდათ, მკვლელის სამიზნეები გახდნენ. წელს ერთი ჩეჩენი ბლოგერი უკვე მოკლეს და მეორეს თავს დაესხნენ.
2019 წლის 23 აგვისტოს ბერლინის ცენტრში მოკლეს საქართველოს მოქალაქე, ყოფილი ჩეჩენი მებრძოლი და პანკისის მკვიდრი 40 წლის ზელიმხან ხანგოშვილი. Belligcat-ის, გამოცემა Spiegel-ისა და რუსული Insider-ის ახალი ერთობლივი გამოძიებით ცნობილი გახდა, რომ ზელიმხან ხანგოშვილის მკვლელმა, ვადიმ კრასიკოვმა სპეციალური მომზადება რუსეთის ფედერალური უსაფრთხოების სამსახურის [ФСБ] ელიტარული ქვედანაყოფის "ვიმპელის" ბაზაზე გაიარა.