,
არავითარ შემთხვევაში არ დავთმობთ გარეჯის მონასტერს! - ამის შესახებ ახალქალაქისა და კუმურდოს მიტროპოლიტმა, მეუფე ნიკოლოზმა (ფაჩუაშვილი) ჟურნალისტებს სამების საკათედრო ტაძარში განუცხადა.
როგორც მეუფე ნიკოლოზმა აღნიშნა, გარეჯის უდაბნო ქართველების საკუთრებაა.
„პრინციპულად არ ვეთანხმები ასეთ დამოკიდებულებას, რასაც დღეს ვხედავთ. დავით გარეჯის უდაბნო იყო ყოველთვის საქართველო, ყოველთვის ქართული მონასტერი იყო და ეს მიწა ყოველთვის ქართული მიწა იყო. მცდელობა - ვიღაცას გადავაბრალოთ, რომ რუკა დამალა ვიღაცამ ფული აიღო, არაფერი აქედან არ გამოვა. ეს არის პირდაპირი აგრესია, მე ასე ვხედავ, თუმცა, არ ვიცი, საიდან და როგორ. სახარებაში წერია „არა არს დაფარული, რომელი არაგაცხადდეს“, ცოტა დრო გავა და ყველანი ყველაფერს გავიგებთ, ყველა გავიგეთ სოხუმი ვინ გაყიდა, გაგრა ვინ გაყიდა, ვინ აიღო ამაში ფული, ვინ არის მოღალატე. ეს ყველაფერი გაცხადდება. ახალგორი რატომ დავკარგეთ, კოდორის ხეობა სულ ცოტა ხნნის წინ, ან აფხაზეთი და ტაო-კლარჯეთი?! დადგება დრო და საქართველო ამ ტერიტორიებს აუცილებლად დაიბრუნებს. ჩვენი ბრალია ყველაფერი, ჩვენ არ ვვარგივართ, ქართველი ხალხი. ღმერთი ამ ყველაფერს მოგვცემს,როგორც თავიდან მოგვცა. გარეჯის უდაბნო ქართველების საკუთრებაა. დავით გარეჯელი ჩამოვიდა სირიიდან და შექმნა ეს საოცარი საუნჯე, საოცარი სამყარო და ამას ვერავინ წაგვართმევს“, - განაცხადა მეუფე ნიკოლოზმა.
კითხვაზე: ეთანხმებით თუ არა საპატრიარქოს პოზიციას, რომ საზღვრის სადემარკაციო-სადელიმიტაციო კომისიის მუშაობა „მოღალატეობრივია“? მეუფე ნიკოლოზმა უპასუხა: „მე პრინციპულად ვფიქრობ, რომ არ შეიძლება ასე დეტალებში ჩაღრმავება“.
„ არ მაქვს არავითარი სრულყოფილი ინფორმაცია, ვფიქრობ, არც საპატრიარქოს აქვს სრულყოფილი ინფორმაცია. ერთი ადამიანის ღალატთან არ არის ეს დაკავშირებული, ეს არის პირდაპირი აგრესია ქვეყნის და ხალხის წინააღმდეგ. ვისგან მოდის, საიდან მოდის, ვინ არის მოღალატე, ამ სახელებს ადრე თუ გვიან ყველანი გავიგებთ. დავით გარეჯი იყო და იქნება საქართველო, ვინც რა ღონისძიება არ უნდა ჩაატაროს. შეიძლება დღეს დავკარგოთ და ხვალ დავიბრუნოთ“, - აღნიშნა მეუფე ნიკოლოზმა.
მისივე თქმით, მართლმადიდებლური ეკლესია იცავს საქართველოს მთლიანობას. მან ისაუბრა ასევე ეკლესიის მისამართით გაკეთებულ ბრალდებებზე.
„არსებობს ასეთი აზრი, რომ ყველაფერი ეკლესიას უნდა დააბრალო და ყველაზე დიდი მოღალატე საქართველოს მართლმადიდებელი ეკლესიაა. ეს ასე არ არის. საქართველოს მართლმადიდებელი ეკლესია იცავს საქართველოს მთლიანობას, ეკლესიის მთლიანობას. რაც შეეხება რუსეთს, ახალი ამბავი არ არის, რომ მეზობელი სახელმწიფოა, რომელსაც ინტერესი აქვს საქართველოში, რომელსაც საქართველოს ტერიტორიის 20% აქვს ოკუპირებული. 21-ე პროცენტს დაიმატებს თუ არ დაიმატებს ამით არსი მოვლენების არ იცვლება“, - აღნიშნა მეუფე ნიკოლოზმა.
რაც შეეხება ნატალია ილიჩოვას და ივერი მელაშვილის დაკავებას, როგორც მეუფე ნიკოლოზი აცხადებს, მას არ აქვს ინფორმაცია, რამდენად სწორი ბრალდებით არიან ისინი დაკავებულები.
„არ მაქვს ინფორმაცია ამ ადამიანების კრიმინალური დანაშაულის შესახებ. რასაც ტელევიზიიდან გავიგებთ, ეს არ ნიშნავს, რომ ნამდვილად ასეა. მით უმეტეს, ძალიან ხშირად ხდება სხვადასხვა არხების და ჟურნალისტების მიერ ინფორმაციის პირდაპირ გაყალბება. ვიღაც ერთმა ადამიანმა რა კრიმინალური დანაშაული ჩაიდინა ამაზე როგორ უნდა ვიმსჯელოთ? ჩვენ პრინციპულად ვამბობთ ერთ რამეს - დავით გარეჯი არის საქართველო, საქართველოს მართლმადიდებელი ეკლესიის კუთვნილება და ასე იქნება ქრისტეს მეორედ მოსვლამდე.
ვერავითარ ნდობას ვერ გამოვუცხადე ვერავის და ვერც სახელმწიფოს, თუ ჩვენ გარეჯში მისვლის და ლოცვის უფლება არ გვექნება. რაც შეეხება იმას, რომ ეკლესიის და სახელმწიფოს პოზიციები არჩევნებამდე ერთი თვით ადრე ემთხვევა ერთმანეთს, ეს ძალიან კონკრეტული საკითხებია და ხან არის ხან არ არის, ვიღაცის ემთხვევა, ვიღაცის არ ემთხვევა. არავითარ შემთხვევაში არ დავთმობთ გარეჯის მონასტერს!“ - განაცხადა მეუფე ნიკოლოზმა.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
