რეკრეაციული ზონის მოწყობა ჩვენი ქალაქისთვის მნიშვნელოვანია, ქალაქში ეკოლოგიური მდგომარეობის გამოსასწორებლად, ჩვენ ბევრი კარგი პროექტი განვახორციელეთ, გამგეობები ძალიან კარგ პროექტებს ახორციელებენ თავიანთ რაიონებში, - ამის შესახებ დედაქალაქის მერმა, კახა კალაძემ თბილისის მთავრობის სხდომაზე განაცხადა.

„დღეს შეიძლება თამამად ითქვას, რომ საპარკო კულტურა ქალაქში შემოდის და ყველაფერი უნდა გავაკეთოთ იმისთვის, რომ რაც შეიძლება ბევრი მწვანე სივრცე გავაჩინოთ დედაქალაქში. ყველა ადამიანი სარგებლობს რეკრეაციული სივრცეებით. შესაბამისად, ყველაფერი უნდა გავაკეთოთ, რომ რაც შეიძლება ბევრი რეკრეაციული ზონა გავაჩინოთ ქალაქში. ვაპირებთ ვაკის პარკის რეაბილიტაციას და წლის ბოლოს სამუშაოები დაიწყება.

მინდა, დავავალო მერის მოადგილეს, ქალბატონ მაია ბითაძეს, რომ დამატებითი რესურსის მოძიების მიზნით, საერთაშორისო საფინანსო ინსტიტუტებთან მოლაპარაკება დაიწყოს, რათა უმოკლეს ვადაში დაიწყოს, როგორც ვერის ბაღის, ისე დენდროლოგიური პარკის პროექტირება.

ვერის ბაღი, რომელიც ქალაქის ერთ-ერთი უძველესი და ისტორიული სარეკრეაციო სივრცეა, საჭიროებს სრულ განახლებას. სრულმასშტაბიანი რეაბილიტაციისთვის წინასაპროექტო კვლევა და დეტალური დიზაინის პროექტი უნდა მომზადდეს, შემდეგ კი უკვე სამშენებლო სამუშაოები დაიწყება. გასათვალისწინებელია ისიც, რომ ვერის პარკი კულტურული მემკვიდრეობის ძეგლის სტატუსს ატარებს და მისი ძირეული გარდაქმნა ან შეცვლა, დაუშვებელია.

რაც შეეხება თბილისის დენდროლოგიურ პარკს, ფაქტობრივად, თბილისის ზღვის მიმდებარედ, დენდროპარკი ერთადერთი დასასვენებელი სივრცეა, რომელიც თავის გარშემო რამდენიმე მჭიდროდ დასახლებულ უბანს აერთიანებს. გარდა ამისა, მისი უნიკალური სარეკრეაციო პოტენციალი და ბიომრავალფეროვნება მიმზიდველია არა მხოლოდ ადგილობრივი მოსახლეობისთვის, არამედ დედაქალაქის სხვა ზონებში მცხოვრები მოქალაქეებისა და ქალაქის ვიზიტორებისთვის. პარკი ასევე ესაზღვრება თბილისის ზოოპარკს. მისი ტერიტორია დაახლოებით 150 ჰექტარს მოიცავს და რეაბილიტაციისთვის მასშტაბური დენდროლოგიური კვლევისა და პროექტირების სამუშაოების ჩატარებაა აუცილებელი. სხვადასხვა საერთაშორისო საფინანსო ინსტიტუტის დახმარებით, ვერის ბაღისა და თბილისის დენდროლოგიური პარკის საპროექტო სამუშაოებს გარემოს დაცვის საქალაქო სამსახური განახორციელებს“, - აღნიშნა კახა კალაძემ.