,
„ვაკის პარკში“ ტერიტორიაზე სასტუმრო „ბუდაპეშტის“ ინვესტორ კომპანია "ტიფლის დეველოპმენტს" თბილისის მერია ტერიტორიის სანაცვლოდ 2.8 მლნ დოლარს გადასცემს. ამის შესახებ თბილისის მერმა კახა კალაძემ დედაქალაქის მთავრობის სხდომის დაწყებამდე განაცხადა.
მისი თქმით, ინვესტორი კომპანია ტერიტორიის სანაცვლოდ 2-ჯერ მეტ თანხას ითხოვდა.
„ვაკის პარკში წლების წინ გაცემული იყო სამშენებლო ნებართვა 2013 წელს მრავალსართულიანი სასტუმროს მშენებლობის შესახებ. რეკრეაციულ სივრცეში ასეთი მასშტაბური პროექტის განხორციელება კატეგორიულად მიუღებელია.
დღეს მონაცვლეობა უკვე განხორციელებულია, პირველად შემოთავაზებული საკომპენსაციო თანხის ოდენობა 5.7 მლნ დოლარი იყო. ასე აფასებდა აღნიშნულ კომპანია თავის პროექტს და ტერიტორიას და მთელი ამ წლების განმავლობაში ამაზე მიმდინარეობდა დავა და მოლაპარაკებები.
თბილისის მერია ამ ნაკვეთის საკომპენსაციოდ კომპანიას 2.8 მლნ დოლარს გადასცემს, დაახლოებით 3 მლნ დოლარით ნაკლები ვიდრე კომპანია ითხოვდა. ყველაზე მთავარი ისაა, რომ ეს სივრცე მუნიციპალიტეტს და თბილისელებს დაუბრუნდა“, - განაცხადა მერმა.
კახა კალაძემ თავის მოადგილე ანდრია ბასილაიას ვაკის პარკის ამ კონკრეტული ტერიტორიის კეთილმოწყობის მიზნით პროექტის შემუშავება დაავალა.
„მინდა დავავალო ჩემს მოადგილე ანდრია ბასილაიას - როგორც ვიცი გარკვეული სამუშაოები ნაწარმოებია, მიწის მასაა მოჭრილი და ღობეც არის, თუ არ ვცდები. დაიწყეთ ამის მოწესრიგება, გააკეთეთ პროექტი და საზოგადოებას ვაჩვენოთ რას გავაკეთებთ და რა სახით დაუბრუნდება ეს ტერიტორია ვაკის პარკს“, - მიმართა კალაძემ თავის მოადგილეს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
