,
თბილისის მერია სამშენებლო კომპანიებს K2 კოეფიციენტის მოსაკრებლის გადახდას ეტაპობრივად სთავაზობს. საუბარია 2019 წლამდე გაცემულ ნებართვებზე. დედაქალაქის მერმა კახა კალაძემ განაცხადა, რომ შესაბამისი საკანონმდებლო ინიციატივა უკვე მომზადებულია. მისივე განცხადებით, ეს გადაწყვეტილება დარგის წარმომადგენლებთან შეხვედრების შემდეგ იმისთვის იქნა მიღებული, რომ დედაქალაქში დაუმთავრებელი მშენებლობები კვლავ არ გაჩნდეს. ჯამურად მერია კომპანიების მხრიდან 5-6 მლნ ლარის დაგროვილ დავალიანებაზე საუბრობს.
მენაშენეთა ასოციაციის ხელმძღვანელი ირაკლი როსტომაშვილი აცხადებს, რომ შესაძლოა თბილისის მერიის დღევანდელი გადაწყვეტილება კეთილი ნება იყოს, თუმცა მისი თქმით, ის ამ კომპანიების მიმართ უფრო მკაცრი ზომების გატარების მომხრეა. როსტომაშვილის თქმით, ამ კომპანიებს საერთოდ უნდა შეუჩერდეთ K2 კოეფიციენტის გაზრდის უფლება და კუთვნილ ტერიტორიაზე გენგეგმით განსაზღვრული პირობებით ააშენონ საცხოვრებელი კორპუსი.
ამასთან, მისი თქმით, არსებობს კითხვა: სამშენებლო კომპანიას, რომელიც აქამდე მოსაკრებელსაც კი ვერ იხდიდა, ექნება თუ არა ფინანსური რესურსი იმისა, რომ პროექტი, რომელიც გაჩერებული აქვს, სრულფასოვნად განახორციელოს?
“ანუ რა გამოდის, იმისთვის, რომ არ გვქონდეს უფრო მეტი დაუსრულებელი მშენებლობა, ამ კომპანიებმა ქალაქი მძევლად უნდა აიყვანონ? ევროპის რამდენიმე დიდ ქალაქთან მქონდა სამუშაო პროცესი და იქ ასეთ დროს იღებენ შესაბამის გადაწყვეტილებებს. მე როგორც მოვისმინე, თბილისის მერია კომპანიებს, ამ მოსაკრებლის განწილვადებაში ეხმარება, რაც არის კეთილი ნება, თუმცა, წესით, იქ იყო ვადები გაწერილი, რომელშიც მშენებლობაც უნდა დაესრულებინათ, გარემოც უნდა მოეწესრიგებინათ და გადაეხადათ მოსაკრებელი. არავის დაუძალებია მათთვის k2 კოეფიციენტის შესყიდვა. დარწმუნებული ვარ კაბინეტიდან კაბინეტში დარბოდნენ, რომ k2 კოეფიციენტი მოემატებინათ”-აცხადებს მენაშენათა ასოციაციის ხელმძღვანელი ირაკლი როსტომაშვილი.
ცნობისთვის, 2019 წელს თბილისის მერიამ სამშენებლო სექტორისთვის ახალი რეგულაციები აამოქმედა, რომლის მიხედვითაც დედაქალაქში სამშენებლო k2 კოეფიციენტის მატება და გაყიდვა აიკრძალა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
