პარლამენტის თავმჯდომარე ამბობს, რომ 2019 წლის ივნისში მმართველს გუნდს ეგონა, პროპორციულ სისტემაზე გადასვლის დაპირება საპროტესტო მუხტს განმუხტავდა.
როგორც არჩილ თალაკვაძემ საზოგადოებრივი მაუწყებლის ეთერში თქვა, ოპოზიცია დესტაბილიზაციის მოწყობაც ცდილობდა, როცა მათი შეთავაზების მიუხედავად საპროტესტო აქციები გაგრძელდა.

"ოპოზიციის დესტაბილიზაციის მცდელობაზე ხელისუფლებას ჰქონდა ძალიან პასუხისმგებლიანი რეაქცია. პოლიტიკური პასუხისმგებლობა აიღო კონსტიტუციით ერთ-ერთმა ყველაზე მაღალი თანამდებობის პირმა, პარლამენტის თავმჯდომარემ. ჩვენ გავაანალიზეთ ეს სიტუაცია, ჩავთვალეთ, რომ სიტუაციის განმუხტვა იყო შესაძლებელი, თუ პროპორციულ სისტემაზე შეთავაზებას გავაკეთებდით და ეს გადაწყვეტილება მიიღო და გამოაცხადა პარტიის თავმჯდომარემ. ჩვენ კიდევ ბოლომდე, ამ მომენტშიც მაინც გვჯეროდა, რომ შესაძლებელი იყო ეს გამხდარიყო სტაბილურობის, ნორმალური თანამშრომლობის გარანტორი.

მიუხედავად ამ გამოცხადებული დაპირებისა, მეორე დღესაც გრძელდება ქუჩაში დესტრუქციული პროცესები, პარლამენტის წინ აქციები, მძიმე შეურაცხყოფები ჩვენი კოლეგების მისამართით, მათ შორის, დეზინფორმაციის მთელი კამპანია, მათ შორის წერილები, ევროპაში, ამერიკის შეერთებულ შტატებში. ჩვენ ვხედავდით შეხვედრებზე, რომ ეს ადამიანები იყვნენ ინტენსიურ მცდელობაში, მათ ძალიან ეჩქარებოდათ რაღაც და ეს რომ პოროპორციული არჩევნები არ იყო, ჩვენ ამაში დავრწმუნდით",- განაცხადა თალაკვაძემ.