მარტში საქართველოს ტურიზმის შემოსავლების 20% [25 მლნ აშშ დოლარი] რუსეთზე მოდიოდა. 2022 წლის მარტში ქვეყანამ ტურიზმიდან ჯამში 175 მლნ დოლარი მიიღო, რაც 2019 წლის მაჩვენებლის 71.3%-ია. ეს კი პანდემიის შემდეგ ყველაზე მაღალი აღდგენის მაჩვენებელია.

"გალტ ენდ თაგარტის” ინფორმაციით, ტურისტული შემოსავლების ეს მაჩვენებელი ასევე მოიცავს მიგრანტების (რუსეთიდან, ბელორუსიიდან, უკრაინიდან) დანახარჯებს, რომლებიც საქართველოში რუსეთ-უკრაინის ომის დაწყების შემდეგ ჩამოვიდნენ.

მიგრანტების ზუსტი რაოდენობა არ არის ხელმისაწვდომი, თუმცა ეს მიგრანტები დამატებით შესაძლებლობას ქმნიან საქართველოს ეკონომიკის სხვადასხვა სექტორში, როგორიცაა ვაჭრობა, უძრავი ქონება, IT და ა.შ. და მათი გავლენა უკვე ასახულია გაზრდილ ფასებში უძრავი ქონების ბაზარზე.

მარტში ტურიზმის შემოსავლების 20% რუსეთზე მოდიოდა, შემდეგ მოდის ბელორუსი (17%), თურქეთი (9%), ისრაელი (9%) და ევროკავშირი (8%).

"საბაზისო სცენარით, 2022 წელს ტურიზმის შემოსავლების 75%-იან აღდგენას ვპროგნოზირებთ 2019 წელთან შედარებით, თუმცა მიგრანტების ეფექტის გათვალისწინებით, უფრო სწრაფი აღდგენის (85%) ალბათობა გაზრდილია", - აცხადებენ საინვესტიციო ბანკში.

რაც შეეხება ვიზიტორების რაოდენობას, 2022 წლის მარტში საქართველოს 188 394 საერთაშორისო ვიზიტორი ეწვია, რაც 236.9%-იანი წლიური ზრდაა და 2019 წლის დონის 37%-ია. ეს ზრდა ძირითადად განპირობებული იყო ტურისტების ზრდით, რომელმაც 2019 წლის დონის 49% შეადგინა.

მარტში ვიზიტორების რაოდენობით თურქეთი ლიდერობდა (ჯამური რაოდენობის 22.5%), შემდეგ მოდის რუსეთი (12%) და სომხეთი (11.7%). აღსანიშნავია, რომ ისრაელიდან, ყაზახეთიდან, ბელოარუსიდან, საუდის არაბეთიდან და უზბეკეთიდან ჩამოსვლის რაოდენობამ 2019 წლის დონეს გადააჭარბა.