,
პრეზიდენტი ტრამპი პუტინს სამჯერ თუ ოთხჯერ ესაუბრა ტელეფონით და აქედან არაფერი არ გამოვიდა, ახლა პრეზიდენტი თვლის, რომ პუტინი პირისპირ უნდა ნახოს და შეაფასოს. ამის შესახებ აშშ-ის სახელმწიფო მდივანმა, მარკო რუბიომ ჟურნალისტებთან საუბარში განაცხადა.
კერძოდ, სახელმწიფო მდივანმა 15 აგვისტოს აშშ-ისა და რუსეთის პრეზიდენტებს, დონალდ ტრამპსა და ვლადიმერ პუტინს შორის დაგეგმილ შეხვედრაზე ისაუბრა.
“სიმართლე გითხრათ, ვფიქრობ, რომ ეს შეფასებითი შეხვედრაა. ასე აღვწერდი ამას. პრეზიდენტმა პუტინთან ტელეფონით სამჯერ თუ ოთხჯერ ისაუბრა. კარგი. და აქედან არაფერი არ გამოვიდა - ან, როგორც მინიმუმ, იქამდე არ მივედით, სადამდეც გვინდოდა მისვლა. ასე რომ, პრეზიდენტი ფიქრობს: “ეს ადამიანი [პუტინი] მაგიდასთან უნდა ვნახო”. პირისპირ უნდა ვნახო ის. ერთი-ერთზე უნდა მოვუსმინო მას. შეფასება უნდა გავაკეთო მისი დანახვით. და ადამიანებმა უნდა გაიგონ - პრეზიდენტ ტრამპისთვის შეხვედრა დათმობა არაა… შეხვედრას იმისთვის მართავ, რომ რაღაცნაირად გაერკვე და შენი გადაწყვეტილება მიიღო. მინდა ყველა ფაქტი მქონდეს. მინდა ამ ადამიანს თვალებში ჩავხედო. და პრეზიდენტს ამის გაკეთება სურს. ასე რომ, სიმართლე გითხრათ, ამ შეხვედრის დაწყებიდან ძალიან მალევე გვეცოდინება ამ რაღაცას აქვს თუ არა წარმატების შანსი.
და პრეზიდენტი შესანიშნავი შეთანხმებების მიმღწევია… საოცარი მომლაპარაკებელია. უბრალოდ არ ვამბობ ამას - ის ნამდვილად არის. ადამიანური ბუნების გაშიფვრის უზარმაზარი ინსტინქტი აქვს. ასე რომ, მას ესმის როგორ ხდება ასეთ რაღაცებში ნავიგაცია… ასე რომ, მგონი პარასკევის შეხვედრა ასეთი ხასიათის იქნება და უკეთესი წარმოდგენა გვექნება ამაზე. მარტივი არ იქნება. ეს ომი ბევრს ნიშნავს პუტინისთვის. გასულ თვეს, რუსებმა ივლისში 60,000 ადამიანი დაკარგეს - არა უგზო-უკვლოდ დაკარგულები - მკვდრები”, - განაცხადა რუბიომ.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
