ლოს-ანჯელესის აღმოსავლეთ და დასავლეთ ნაწილებში, ხანძრის მსხვილ კერებზე მეხანძრეებმა კონტროლი მას შემდეგ შეძლეს, რაც ძლიერი ქარი ჩადგა. Reuters-ის ინფორმაციით, ცეცხლის ჩაქრობისთვის საჭირო პირობები დღეიდან გაჩნდა.

ხანძრის გავრცელების ძირითად მიზეზებად სახელდება ძლიერი ქარები, ცნობილი როგორც „სანტა ანას ქარები“, მშრალი კლიმატი და მაღალი ტემპერატურა. ეს ფაქტორები ხელს უწყობდა ცეცხლის სწრაფად გავრცელებას

მიუხედავად ასობით მეხანძრის მცდელობისა, ლოს-ანჯელესში, ხანძრის ორი, ყველაზე მწვავე ცეცხლის კერის მხოლოდ მცირე ნაწილი ჩააქრეს. ბოლო ინფორმაციით, ამჟამად მოხერხდა პროგრესის მიღწევა ქალაქის დასავლეთ და აღმოსავლეთ კიდეებში გაჩენილ ხანძარზე. ხანძრის ამ ორმა კერამ 14 100 ჰექტარი ტერიტორია გაანადგურა, რაც მანჰეტენის ფართობს 2.5-ჯერ აღემატება.

ხანძარმა გაანადგურა 36,000 აკრზე (დაახლოებით 14,600 ჰექტარი) მეტი ტერიტორია და დააზიანა 10,000-ზე მეტი შენობა. ფინანსური ზარალი 135-150 მილიარდ დოლარს აღწევს. ხანძარს სულ მცირე 11 ადამიანი ემსხვერპლა, ხოლო 180,000-ზე მეტი ადამიანი ევაკუირებულია, 166 800 ადამიანი კი ევაკუაციის გამოცხადების მოლოდინშია. გამოცხადებულია საგანგებო მდგომარეობა და მოქმედებს კომენდანტის საათი.

ხანძარმა რამდენიმე ცნობილი პიროვნების სახლებსაც შეუტია:

• ბილი კრისტალი – მსახიობმა დაკარგა სახლი, სადაც 1979 წლიდან ცხოვრობდა.
• პერის ჰილტონი – მომღერლისა და მსახიობის სახლი მალიბუში დაიწვა.
• ჯონ გუდმანი – მისი სახლი განადგურდა პასიფიკ-პალიცეიდსში.
• ენტონი ჰოპკინსი – ოსკარის ორგზის ლაურეატი მსახიობიც ზარალთან აღმოჩნდა.
• ლეიტონ მისტერი და ადამ ბროდი – პოპულარული სერიალების მსახიობებმა თავიანთი სახლი დაკარგეს

მოსალოდნელია, რომ შაბათ-კვირას ლოს-ანჯელესში ამინდის პირობები გაუმჯობესდება, ქარის სიჩქარე კი შემცირდება.