ლევილის ქართული ფესტივალის მეშვიდე კვირა საზეიმოდ გაიხსნა

ლევილის ქართული ფესტივალის მეშვიდე კვირა საზეიმოდ გაიხსნა

Date:

ლევილის ისტორიულ მამულში საქართველოს კულტურისა და სპორტის სამინისტროს ინიციატივითა და საქართველოს მთავრობის მხარდაჭერით ლევილის ქართული ფესტივალი საინტერესო და მრავალფეროვანი კულტურული და სპორტული ღონისძიებებით გრძელდება.

6 ივლისს, მეშვიდე საფესტივალო კვირას, მაყურებლის წინაშე წარდგნენ ფოლკლორის ეროვნული გუნდი, რომელმაც საქართველოს სხვადასხვა კუთხის სიმღერები შეასრულა და მამა დავითის ტაძრის მგალობელთა გუნდი. აღსანიშნავია, რომ ფოლკლორის ეროვნული გუნდი ფოლკლორის ეროვნული ცენტრის დირექტორის, გიორგი დონაძის, ინიციატივითა და კულტურის სამინისტროს ხელშეწყობით შარშან შეიქმნა და ეს მათი პირველი გასტროლი და პირველი კონცერტია.

ღონისძიება ქორეოგრაფიული ანსამბლ „ბათუმის“ სოლო კონცერტით დასრულდა.

სტუმრებმა ნახეს სამტრედიისა და დმანისის თეატრების ერთობლივი სპექტაკლი „12 განრისხებული მამაკაცი“ (რეჟისორი გიორგი სიხარულიძე). კოპროდუქცია სამტრედიის ეროსი მანჯგალაძის სახელობის დრამატული თეატრის დირექტორ ვეფხია ნადირაძისა და დმანისის ზინაიდა კვერენჩხილაძის პროფესიული სახელმწიფო დრამატული თეატრის სამხატვრო ხელმძღვანელ გიორგი სიხარულიძის ერთობლივი მუშაობით შეიქმნა.

ქართველმა ხელბურთელებმა ქეთი ვენეცკიმ და მარიამ ჩავჩიძემ ფესტივალის სტუმრებისათვის საჩვენებელი თამაში გამართეს. შეხვედრები გაიმართა მოჭიდავეებთან, რომლებმაც მასტერკლასი ჩაატარეს და სტუმრებს საბრძოლო ხელოვნების საინტერესო ილეთები უჩვენეს.

ლევილის ქართული ფესტივალი განაგრძობს როგორც ქართველი, ისე უცხოელი მაყურებლის დაინტერესებას და დიდ მოწონებასაც იმსახურებს.

როგორც ცნობილია, 24 მაისიდან 14 ივლისამდე ყოველ შაბათ-კვირას ლევილის მამული ქართულ ფესტივალს მასპინძლობს. ფესტივალი მეორედ იმართება და წინა წლისგან განსხვავებით, გაზრდილია როგორც ხანგრძლივობა, ისე - მონაწილეთა რაოდენობა. წელს პირველად ლევილის მამულში განსაკუთრებით მასშტაბურად აღინიშნა 26 მაისი. ყოველკვირეულად ფესტივალს არაერთი უცხოელი თუ საფრანგეთის მოქალაქე სტუმრობს. ღონისძიებების სტუმრებს შორის არიან საფრანგეთში მცხოვრები ქართველი ემიგრანტები.

წლევანდელ ფესტივალში ორი თვის განმავლობაში მონაწილეობას მიიღებს 700-ზე მეტი ხელოვანი და სპორტსმენი, რომელთა შორის არიან ფოლკლორული და ქორეოგრაფიული ანსამბლები სხვადასხვა რეგიონიდან, მუნიციპალური სახელმწიფო თეატრები თუ შემოქმედებითი ჯგუფები. სპორტის არაერთ სახეობაში (რაგბი, ფეხბურთი, ფარიკაობა, ჭადრაკი, ქართული საბრძოლო ხელოვნება) იმართება შეჯიბრებები თუ საჩვენებელი ორთაბრძოლები. ფესტივალში პირველად მონაწილეობენ ხის ოსტატები, მწერლები და სამხატვრო აკადემიის სტუდენტები.

მნიშვნელოვანია, რომ ლევილის ისტორიულმა მამულმა წელს პირველად უმასპინძლა სამხატვრო აკადემიის ქანდაკების მიმართულების მაგისტრატურისა და საბაკალავრო საფეხურის სტუდენტებს. შვიდი სტუდენტი რამდენიმე კვირის განმავლობაში სტუმრობდა კულტურის სამინისტროს მიერ საქართველოს ფარგლებს გარეთ დაფუძნებულ პირველ შემოქმედებით რეზიდენციას და მათ მიერ იქ შექმნილი ნამუშევრები მამულის პარკში სამუდამოდ განთავსდა.

ინფორმაციისთვის: ქართული ფესტივალის მხარდამჭერები არიან ღვინის ეროვნული სააგენტო და შპს „ჯეოვაინ თრეიდინგი“.

analytics