ახალგაზრდა მკვლევარი, თბილისის სახელმწიფო უნივერსიტეტისა და ქართულ-ამერიკული უნივერსიტეტის პოლიტიკურ მეცნიერებათა ლექტორი ლევან ლორთქიფანიძე 2019 წლის 20 ივნისს და შემდგომ განვითარებულ პროცესებს აფასებს. გთავაზობთ მის მოსაზრებას უცვლელად.

"20 ივნისი საშინელი დღე იყო, ერთი წლის შემდეგაც ძველ აზრზე ვრჩები:

ოფიციალურ სტრუქტურებში ყველამ კარგად იცოდა, რომ 2019 წლის ივნისში რუსი დეპუტატი სერგეი გავრილოვი თბილისში ჩამოდიოდა და საქართველოს პარლამენტის დარბაზში სხდომის თავმჯდომარე უნდა ყოფილიყო.
ნუთუ არც უსაფრთხოების სამსახურში, არც პარლამენტის ბიუროსა თუ აპარატში, არც მართმადიდებლური ორგანიზაციის ქართულ დელეგაციაში, არც საგარეო საქმეთა სამინისტროში არავის გაუჩნდა მარტივი კითხვა - რა შეიძლება მოჰყვეს რუსი დეპუტატის, საქართველოს მტრის ჩვენი ქვეყნის პარლამენტის პრეზიდიუმში დაბრძანებას? ნუთუ ამხელა სახელმწიფო სტრუქტურებში ერთი გავლენიანი პირიც კი არ აღმოჩნდა, რომელიც ივარაუდებდა, რომ გავრილობის სხდომას არეულობა მოჰყვებოდა? ნუთუ რომელიმე სასტუმროს დარბაზის დაქირავების წინადადება არავინ წამოაყენა?
20 ივნისს გამოჩნდა, რომ სახელმწიფო ინსტიტუტების უამრავ რგოლში ვერ აზროვნებენ და ქვეყანაში არეულობების თავიდან აცილება არ შეუძლიათ! ეს უპასუხისმგებლობა და დანაშაულია! ერთ რგოლს რომ ემუშავა, უბედურებას თავიდან ავიცილებდით!

შეცდომის აღიარებას და გადადგომას ვაჟკაცობა სჭირდება. ირაკლი კობახიძეს შეეშინდა, არ გადადგა, გააჭიანურა გადაწყვეტილების მიღება და უამრავი ადამიანის ჯანმრთელობა სამუდამოდ შელახა. კობახიძე სიცოცხლის ბოლომდე ცოდვებით გაიტანჯება.

რა საჭირო იყო მომიტინგეთა დაშლა რეზინის ტყვიების დამიზნებით სროლით, არაპროპორციული ძალით? ხომ შეიძლებოდა გაცილებით უფრო მოწესრიგებულად, რეანიმაციებისა და თვალების დათხრის გარეშე დაეშალათ დემონსტრაცია! შეიძლებოდა! ვერ მოახერხეს არაპროფესიონალიზმისა და ცივსისხლიანობის გამო! სხვათა შორის, მაშინ შს მინისტრი გახარია იყო!!!!
დღეს კი დაზარალებულებს დაზარალებულის სტატუსს ამადლიან.

ოპოზიციონერი ლიდერი თუ ფიქრობს, რომ მის გადაწყვეტილებას "პრორუსული და ანტიდემოკრატიული, ყველაფერზე წამსვლელი" ხელისუფლების მხრიდან ადამიანების დარბევა და დასახიჩრება შეიძლება მოჰყვეს, მან ყველაფერი უნდა გააკეთოს თავისი მხარდამჭერების ჯანმრთელობის დასაცავად. ყველამ იცოდა, რომ პარლამენტში შეჭრის მცდელობას ცეცხლითა და მახვილით აღკვეთდა პოლიცია, მაგრამ მათ წარბიც არ შეუხრიათ... რიგმა ოპოზიციონერმა ლიდერებმა შეგნებულად მოაწყვეს პროვოკაცია, შეგნებულად გაწირეს ადამიანები დამიზნებით მსროლელი პოლიციელების იარაღისთვის, რათა პოლიტიკური ქულები დაეგროვებინათ. ისინი თავიანთ პასუხისმგებლობას ვერ გაექცევიან... ვინც მათ წილს ვერ ამჩნევს, პოლიტიკის აზრზე არ არის ან ხალხის სიცოცხლის სასწორზე შემგდები პოლიტიკოსების მიმდევარია;"- წერს ლევან ლორთქიფანიძე