საპარლამენტო ფრაქცია „დამოუკიდებელი დეპუტატების" წევრი, ლევან კობერიძე პარლამენტის მიერ საკონსტიტუციო ცვლილებების მესამე მოსმენით დამტკიცებას გამოეხმაურა. როგორც მან ჟურნალისტებს განუცხადა, დღევანდელმა დღემ დაადასტურა, რომ პოლიტიკური მრავალფეროვნება მნიშვნელოვანია.

„რისკები ნამდვილად იყო და მინდა გითხრათ, რომ სწორედ დამოუკიდებელი და უფრაქციო დეპუტატების დამსახურებაა ეს ყველაფერი, რომელიც ძალიან მკაფიოდ ადასტურებდა თავის მზაობას პირველ, მეორე, მესამე მომსმენაზეც. 24 იყო ასეთი დეპუტატი და ამით „ქართულ ოცნებას" არ მიეცა საშუალება, რაიმე სახის პოლიტიკური ხრიკებისთვის მიემართა, ეს პირდაპირ შემიძლია გითხრათ.

ამიტომ, ეს ფაქტი ადასტურებს იმას, რომ სწორედ პოლიტიკური მრავალფეროვნება და არა მხოლოდ ორპოლუსიანობა არის ქვეყნისთვის ყველაზე მნიშვნელოვან მომენტში პოლიტიკური გადაწყვეტილების მიღების დროს აუცილებელი, ეს გამოაჩინა დღევანდელმა დღემ", - განაცხადა კობერიძემ.

შეგახსენებთ, პარლამენტმა საკონსტიტუციო ცვლილებები მესამე მოსმენით დაამტკიცა.