საქართველოში რეგისტრირებულია 80 აგრარული ბაზარი და მათგან უმრავლესობა ვერ აკმაყოფილებს მოთხოვნებს. შესაბამისად, არ უნდა გვქონდეს ილუზია, რომ ყველა ეს ობიექტი დღეიდან ამოქმედდებოდა, - ამის შესახებ გარემოს დაცვისა და სოფლის მეურნეობის მინისტრმა მთავრობის ადმინისტრაციაში გამართულ ბრიფინგზე განაცხადა.
ლევან დავითაშვილის განცხადებით, სახელმწიფო აკეთებს ყველაფერს იმისთვის, რომ ერთი მხრივ, მოსახლეობას ჰქონდეს მუშაობის საშუალება და მეორე მხრივ, მსოფლიო პანდემიის პირობებში, დაცული იყოს უსაფრთხოების ყველა წესი.
აგრარული ბაზრები დღეიდან, როგორც დედაქალაქში, ასევე რეგიონებშიც იხსნება. მათ შორის ბათუმში მდებარე ღია აგრარული და თევზის ბაზრები.
ტერიტორიაზე დაუშვებელია პირბადის გარეშე შესვლა. მომხმარებლებს ადგილზე თერმოსკრინინგი ჩაუტარდებათ და გადაეცემათ ერთჯერადი ხელთათმანები. ასევე, მკაცრად იქნება დაცული დისტანცია. ადგილზე შესულ ყველა მანქანას ჩაუტარდება დეზინფექცია.