,
ფორუმის მიმართ დაინტერესება განსაკუთრებით გაზრდილია 2023 წელს, რაც მიანიშნებს იმას, რომ ზოგადად საქართველოს როლი იზრდება რეგიონში, - ამის შესახებ ვიცე-პრემიერმა, ეკონომიკის მინისტრმა ლევან დავითაშვილმა „თბილისის აბრეშუმის გზის ფორუმზე“ ჟურნალისტებთან განაცხადა.
მისი თქმით, საქართველო, როგორც სტაბილური, საინტერესო და დინამიურად განვითარებადი ეკონომიკა მიმზიდველია ინვესტორებისთვის.
„პანდემიის გამო წინა წლებში ჩვენ ვერ მოვახერხეთ „თბილისის აბრეშუმის გზის ფორუმის“ ჩატარება და დღეს, პოსტპანდემიურ პერიოდში დაინტერესება არის ძალიან დიდი, ისეთი როგორიც არასდროს აქამდე. გვყავს 2000-ზე მეტი მონაწილე, 50-მდე ქვეყნის წარმომადგენელია ჩამოსული და ეს არ არის მხოლოდ მაღალი დონის პოლიტიკური თანამდებობის პირების მონაწილეობა, არამედ, ჩვენ ვხედავთ ბიზნესის ძალიან აქტიურ ჩართულობას. ფორუმის მიმართ დაინტერესება განსაკუთრებით გაზრდილია 2023 წელს, რაც მიანიშნებს იმას, რომ ზოგადად საქართველოს როლი იზრდება რეგიონში. საქართველო, როგორც სტაბილური, საინტერესო და დინამიურად განვითარებადი ეკონომიკა მიმზიდველია ინვესტორებისთვის, ბიზნესის კეთებისთვის ეს არის ხელსაყრელი გარემო და დარწმუნებული ვარ, რომ ფორუმის ფარგლებში ძალიან ბევრი წარმატებული გარიგება მოხდება ბიზნესებს შორის და ასევე, იქნება ძალიან საინტერესო დისკუსიები პოლიტიკოსების მხრიდან ამა თუ იმ თემაზე. იცით, რომ ჩვენ ბევრ მიმართულებას ვფარავთ - ტრანსპორტი, შუა დერეფნის პერსპექტივები, ვაჭრობასთან დაკავშირებული საკითხები, ფინანსები და ბევრი სხვა, რაზეც ფორუმის ფარგლებში გვექნება მსჯელობა. ფორუმი დიდი იმედი მაქვს, რომ წარმატებით ჩაივლის და საქართველოს პოპულარიზაციას კიდევ უფრო შეუწყობს ხელს. საქართველოშიც უნდა ხდებოდეს მაღალ დონეზე მნიშვნელოვან ეკონომიკურ საკითხებზე მსჯელობა და გადაწყვეტილებების მიღება და ვფიქრობ, რომ ჩვენ ამის პოტენციალი გვაქვს", - განაცხადა ეკონომიკის მინისტრმა.
რაც შეეხება „შუა დერეფნის“ პერსპექტივებს - მინისტრის განცხადებით, საქართველოს როლი იზრდება, მათ შორის, სატრანსპორტო ლოგისტიკური მიმართულებით.
„თქვენ იცით, რომ საქართველო სხვადასხვა დერეფანში მონაწილეობს ეფექტურად, მათ შორის, „შუა დერეფნის“ როლი იზრდება ყველაზე მეტად როგორც ალტერნატიული, საიმედო მარშრუტის როლი და ასევე, უმოკლესი მარშრუტის ევროპისა და აზიის დამაკავშირებელი გზის და ამაზე ჩვენ წლებია ვმუშაობთ იმისთვის, რომ ეფექტიანობა გაიზარდოს. როცა ჩვენ ვსაუბრობთ დაკავშირებადობაზე - ჩვენ არ ვსაუბრობთ მხოლოდ სატრანსპორტო კავშირებზე, ვსაუბრობთ ეკონომიკური კავშირების და სავაჭრო ურთიერთობების გაღრმავებაზე, საინვესტიციო შესაძლებლობებზე და თანამშრომლობაზე ეკონომიკის სხვადასხვა მიმართულებით. ზოგადად საქართველოს როლი გაზრდილი არა მხოლოდ სატრანსპორტო ლოგისტიკური სექტორების მიმართ, არამედ ბევრი სხვა დარგის მიმართ და ამიტომაც ძალიან ფართოა იმ კომპანიათა სამოქმედო არეალი, რომელიც საქართველოს ეწვია ფორუმის ფარგლებში“,- განაცხადა ლევან დავითაშვილმა.
გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.
ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.
რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?
2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.
აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:
#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)
#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)
#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)
#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)
#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)
#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)
#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)
#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)
#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)
#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)
წყარო:https://bm.ge/
