,
ნეირონის ხელოვნური ინტელექტის აკადემიის რექტორი ლევან ბოძაშვილი კორპორაცია Google-ის წინააღმდეგ სასამართლო დავის დაწყებას გეგმავს.
კორპორაციის მიერ პერსონალურ მონაცემთა მოპოვება-გამოყენებაზე დავა პრეცენდენტული იქნება და მისი მთავარი მიზანია სახელმწიფოსთვის საგადასახადო რეგულაციებზე მუშაობის დაწყების დავალდებულება.
„ყველა გიგანტი კომპანია დღეს კაპიტალიზირებს, ასე ვთქვათ, თავის განვითარებას ახდენს ინდივიდუალური მონაცმეებით. Google-ში, Facebook-სა და ნებისმიერ ვირტუალურ ქსელში ხელოვნური ინტელექტის მიერ იმდენად არის სინქრონიზებული ყველაფერი, რომ პატარა მინაწერი, ე.წ მესიჯიც კი მონაცემია. პრაქტიკულად ყველაფერი მონაცემია. ჩვენ დღეს ვცხოვრობთ 175 სიქსტილიონი მონაცემის ეპოქაში, რომელიც 2025 წლისთვის 10-ჯერ მეტი იქნება. მაუსის მოძრაობა, „ჩამოსქროლვაც“ კი მონაცემია და აგენერირებს სარეკლამო, მარკეტინგულ მექანიზმებს. რატომ არის ეს მნიშვნელოვანი? ჩვენ ვართ ამ მონაცემების მწარმოებლები და ჩვენ ამაში თანხას არავინ გვიხდის“, – განაცხადა ლევან ბოძაშვილმა „ბიზნესპარტნიორში“.
მისი თქმით, მაგალითად, ევროკავშირი აპირებს Google-ის დაბეგვრას. ამერიკული კორპორაციის წინააღმდეგ 5 მილიარდიანი სარჩელი უკვე შევიდა სასამართლოში და საქართველოს ამ გზით უნდა წავიდეს ამ ტიპის კომპანიებთან ურთიერთობაში.
„მეც ვაპირებ Google-ის წინააღმდეგ სარჩელის შეტანას. არასოდეს მიმიმართავს სასამართლოსთვის, მაგრამ ახლა ვგეგმავ, რადგან სასამართლოს მეშვეობით სახელმწიფო დავალდებულდეს დაიწყოს საგადასახადო რეგულაციებზე მუშაობა. ამ მონაცემებს აქვს პერსონალურ მონაცემთა დაცვის ასპექტი და ის უნდა იყოს დაცული. როგორც ევროკავშირი მუშაობს ტექნოლოგიური სუვერენიტეტის იმპლემენტაციისთვის, ჩვენც ასევე გვჭირდება ტექნოლოგიური სუვერენიტეტის იმპლემენტაცია”, – აცხადებს ბოძაშვილი.
მისი თქმით, საბოლოოდ მიზანი არის ერთიანი ციფრული ბაზრის შექმნა, რომელიც არის ასოცირების შეთანხმებით გათვალისწინებული და ეს არის წინაპირობა საქართველოს ინტეგრაციისა ევროპის ციფრულ ბაზაში.
დღგ-ის გადახდისგან თავის არიდება რთულდება - საქმე ის არის, რომ 2024 წლის ოქტომბრიდან ძალაში შევიდა ფინანსთა სამინისტროს ახალი რეგულაცია, რომელიც მნიშვნელოვნად შეცვლის დამატებული ღირებულების გადასახადის (დღგ) გადახდისგან თავის არიდების მიზნით შექმნილი სუბიექტების მიმართ სახელმწიფოს დამოკიდებულებას. ეს ცვლილება განსაკუთრებულ გავლენას მოახდენს როგორც მეწარმე ფიზიკურ პირებზე (ინდივიდუალური მეწარმე, მიკრობიზნესი, მცირე ბიზნესი, ფიქსირებული გადასახადის გადამხდელი პირი), ასევე ნებისმიერ წვრილ, ქსელურ, კომპანიებზე.
რა უნდა იცოდეს ბიზნესმა აღნიშნულ ცვლილებებთან დაკავშირებით - ახალ რეგულაციასთან დაკავშირებულ დეტალებს BMG-ისთან DGN Consulting-ის საგადასახადო მენეჯერი ანა ლობჟანიძე განმარტავს.
- კონკრეტულად რას გულისხმობს ფინანსთა მინისტრის გამოცემული ახალი რეგულაცია?
- 2024 წლის ოქტომბრიდან ამოქმედდა ცვლილებები ფინანსთა სამინისტროს N996 ბრძანებაში, რომლებიც დღგ-ის გადახდისგან თავის არიდების სქემების აღკვეთისკენ არის მიმართული. გარკვეული კრიტერიუმების დაკმაყოფილების შემთხვევაში, საგადასახადო ორგანოს უფლება აქვს, რამდენიმე დამოუკიდებელი სუბიექტი განიხილოს ერთ გადამხდელ პირად და ყველა სუბიექტის შემოსავალი ერთობლივად დაბეგროს. აღნიშნული ცვლილება ეხება იმ ბიზნესებს, რომლებიც ახორციელებენ ბიზნესის დანაწევრებას, რათა არ დაუფიქსირდეთ წლიური ბრუნვა 100 000 ლარზე მეტი და ამ მიზნით არეგისტრირებენ სხვა ბიზნესსუბიექტებს, იურიდიული სუბიექტის ან ინდივიდუალური მეწარმის სახით. აღნიშნული სქემით ბიზნეს სუბიექტები თავს არიდებენ დღგ-ის გადახდას.
- რა კრიტერიუმებით იხელმძღვანელებენ საგადასახადო ორგანოები?
- თუ რამდენიმე ბიზნესი აკმაყოფილებს შემდეგ კრიტერიუმებს, მათ საგადასახადო ორგანო ერთ გადამხდელ პირად განიხილავს. კრიტერიუმები შემდეგია:
1. საქმიანობასთან დაკავშირებულ გადაწყვეტილებებს ერთი და იგივე პირი იღებს;
2. საქმიანობის ადგილი და შინაარსი იდენტურია;
3. რომელიმე სუბიექტი დღგ-ის გადამხდელად რეგისტრირებული არ არის.
ამასთანავე, განმარტებულია, თუ რა პირობებში მიიჩნევა გადაწყვეტილებები ერთი და იგივე პირის მიერ მიღებულად. მაგალითად, თუ გადაწყვეტილებები მიიღება ისეთ საკითხებზე, როგორიცაა კონტრაქტორების შერჩევა, ფასების განსაზღვრა, დასაქმების პირობები ან ინვესტიციების განხორციელება.
- როგორ იმოქმედებს ეს ცვლილებები ბიზნესზე?
- ამ ცვლილებების მიზანია, გააძლიეროს საგადასახადო ორგანოების უფლებამოსილება და ხელი შეუშალოს დღგ-ს გადახდისგან თავის არიდების სქემებს. ეს ზომები ხელს შეუწყობს თანაბარი კონკურენტული გარემოს შექმნას მცირე და საშუალო ბიზნესებისთვის. თუმცა, ბიზნესმა ყურადღებით უნდა დაიცვას რეგულაციები და გაითვალისწინოს ახალი წესები, რათა თავიდან აირიდოს პოტენციური ჯარიმები და დამატებითი შემოწმებები. რაც შეიძლება ითვალისწინებდეს დღგ-ს გადამხდელად ნებაყოფლობით რეგისტრაციას და შესაბამისად, საქონლის/მომსახურების ფასში დღგ-ის ასახვას.
- რას ურჩევდით ბიზნესს ამ ცვლილებების გათვალისწინებით?
- ბიზნესი ყურადღებით უნდა დააკვირდეს საკუთარ საქმიანობას და დარწმუნდეს, რომ საქმიანობის პროცესში ითვალისწინებს კანონმდებლობით დადგენილ ახალ კრიტერიუმებს და მიდგომებს. ამ ცვლილებების მიზანია, გააძლიეროს საგადასახადო ორგანოების უფლებამოსილება და ხელი შეუშალოს დღგ-ს გადახდისგან თავის არიდების სქემებს. ეს ზომები ხელს შეუწყობს თანაბარი კონკურენტული გარემოს შექმნას მცირე და საშუალო ბიზნესებისთვის. თუმცა, ბიზნესმა ყურადღებით უნდა დაიცვას რეგულაციები და გაითვალისწინოს ახალი წესები, რათა თავიდან აირიდოს პოტენციური ჯარიმები და დამატებითი შემოწმებები.
წყარო:https://bm.ge/
