მთავრობის გადაწყვეტილებით, ლენტეხის მუნიციპალიტეტი სრულ საკარანტინო ზონად ცხადდება. აღნიშნული გადაწყვეტილება მას შემდეგ იქნა მიღებული, რაც რაიონში შიდა გადაცემის 4 ფაქტი გამოვლინდა, სადაც ინფიცირების პირველწყაროს დადგენა ვერ ხერხდება. 

„დღეს ლენტეხის რაიონში დაფიქსირდა შიდა გადაცემის ოთხი ახალი ფაქტი, რაც გვაძლევს იმის გათვლის საშუალებას, რომ ჩვენ უფრო ოპერატიული და პრევენციული ღონისძიებები ჩავატაროთ ამ რაიონში. შესაბამისად, ეპიდემიოლოგების და მედიკოსების რჩევით, ასევე მიღებული ინფორმაციის საფუძველზე მივიღეთ გადაწყვეტილება, რომ ლენტეხის რაიონში ამოქმედდეს სრული კარანტინი, რაც გულისხმობს იმას, რომ ლენტეხის რაიონში ამოქმედდება ზუსტად ის რეჟიმი, რაც დღესდღეობით არის ბოლნისისა და მარნეულის რაიონებში. ეს გადაწყვეტილება განპირობებულია იმით, რომ ჩვენ გვინდა გავაკეთოთ ყველაფერი, რათა მაქსიმალურად შევზღუდოთ შიდა გავრცელება და შესაბამისად, არ მოხდეს ამ კერის უფრო გაფართოება“, - განაცხადა პრემიერ-მინისტრის პრეს-სპიკერმა ირაკლი ჩიქოვანმა მთავრობის ადმინისტრაციაში გამართულ ბრიფინგზე. 

ლენტეხში ინფიცირების სულ 5 შემთხვევაა გამოვლენილი, რომელთაგან ერთ-ერთი არასრულწლოვანია.