საქართველოს ძალოსანთა ოლიმპიური გუნდი სამშობლოში დაბრუნდა. ძალოსნებს თბილისის სერთაშორისო აეროპორტში ოჯახის წევრებთან ერთად გულშემატკივრებიც დახვდნენ, რომელთაც საზეიმო დახვედრა მოაწყვეს. „მადლობა“ – ამ შეძახილებით დახვდნენ ოლიმპიურ ჩემპიონს, ლაშა ტალახაძეს.

„პირველ რიგში ძალიან დიდი მადლობა ასეთი დახვედრისთვის. რა თქმა უნდა, ძალიან ბედნიერი ვარ, რომ შევინარჩუნე უკვე მეორედ ოლიმპიური ოქროს მედალი, რაც ძალიან სასიხარულო არის. მოგეხსენებათ ძალიან დიდი პერიოდი ვემზადებოდით ამის გამო და დაგვიფასდა თითოეულ ჩვენგანს. მადლობა კიდევ და კიდევ ჩვენს ბიჭებს, რომლებმაც შეძლეს და მოიპოვეს მედლები და ჩვენს გულშემატკივარს. ძალიან დიდი მადლობა, გაიხარეთ“, - განაცხადა ლაშა ტალახაძემ.

ოლიმპიურ თამაშებზე ტალახაძემ საქართველოს ნაკრებს მე-2 ოქრო მოუტანა. საერთო გუნდურ ჩათვლაში საქართველოს ნაკრებისთვის ეს მე-7 მედალია.