დასავლეთის მასობრივი ინფორმაციის საშუალებებმა, საქართველოში მიმდინარე საპროტესტო აქციების გაშუქების გამო გამოწვეული რამდენიმე დღიანი პაუზის შემდეგ, კვლავ დაიწყეს ყურადღების გადატანა ექს-პრეზიდენტ მიხეილ სააკაშვილის მდგომარეობაზე.

ასე, მაგალითად, 12 და 13 მარტს მასალები გამოქვეყნდა:

ინტერვიუ ბრიტანულ სამაუწყებლო კომპანია „სქაი ნიუსის“ (Sky news) ვებ-გვერდზე (წინასწარ მომზადებული კითხვების ხელნაწერი პასუხები), სტატიის სახით, სათაურით „საქართველოს ყოფილი პროდასავლური პრეზიდენტი, წინასწარგანზრახული მოწამვლის შემდეგ, „სიკვდილის პირას არის მიყვანილი“ (ავტორი - დომენიკ ვაგჰორნი), რომელშიც მიხეილ სააკაშვილი ჩივის თავისი ჯანმრთელობის მძიმე მდგომარეობაზე (პოლიორგანული უკმარისობა) და ამაში ქვეყნის მთავრობას ადანაშაულებს. იქვე ავტორის მიერ გადმოცემულია უცხოელი პოლიტიკოსების (პრეზიდენტების ვოლოდიმირ ზელენსკისა და ემანუელ მაკრონის მოწოდებები ავადმყოფი პატიმრის  გათავისუფლების მიზნით) და საქართველოს ხელისუფლების პოზიციაც („მისი მდგომარეობა ისეთი მძიმე არ არის, როგორც თვითონ ამბობს, ამის მიუხედავად, პატიმრის მკურნალობისთვის ყველაფერი კეთდება. მისი გათავისუფლება მიზანშეწონილი არაა, რადგან ქვეყანაში შეიძლება დესტაბილიზება გამოიწვიოს“). წყარო: https://news.sky.com/story/pro-western-former-georgian-president-mikheil-saakashvili-close-to-death-after-alleged-prison-poisoning-12832198.

ბრიტანულ გაზეთ „დეილი მირორში“ (The Daily Mirror) სტატია სათაურით „ყოფილი პრეზიდენტის მტკიცებით, იგი მოწამვლის შემდეგ სიკვდილის პირზეა მიყვანილი“ (ავტორი - მენჯამინ ლინჩი). როგორც Sky news-ის ინტერვიუს მიხედვით მომზადებული პუბლიკაციიდან ირკვევა, ექს-პრეზიდენტი ჩივის, რომ მას თბილისში ჯეროვნად ვერ მკურნალობენ, ხელისუფლება კი საზღვარგარეთ მკურნალობის ნება არ იძლევა: „ჩემი ძვლები იშლება, მტანჯველი ტკივილები მაქვს“, - წერს მიხეილ სააკაშვილი. მისი ადვოკატის შალვა ხაჭაპურიძის თქმით კი, „ყოფილი პრეზიდენტი ნაცისტური გერმანიის საკონცენტრაციო ბანაკის ტუსაღს დაემსგავსა“ (წყარო: https://www.mirror.co.uk/news/world-news/former-georgian-president-claims-near-29439863)

ფრანგულ გაზეთ „ლე ფიგაროში“ (Le Figaro) ინტერვიუ სათაურით „მიხეილ სააკაშვილი „ფიგაროს“ კითხვებს პასუხობს: „საქართველოს ბედი უკრაინის რუსეთზე გამარჯვებას უკავშირდება“ (ავტორი - იზაბელ ლასერი). „ყოფილი რეფორმისტული და პროდასავლური პრეზიდენტი მიხეილ სააკაშვილი 2021 წლიდან პატიმარია. იგი მოკლებულია სამედიცინო დახმარებას და ამტკიცებს, რომ მას წამლავენ: ამას აკეთებს ქვეყნის პრორუსული მთავრობა, რომელსაც ოლიგარქი ბიძინა ივანიშვილი აკონტროლებს... ექს-პრეზიდენტი, რომელიც 2000-იან წლებში დასავლეთის ერთგული მოკავშირე იყო, ახლა საწოლში წევს და უსასოოდ გამოიყურება, გამხდარი და ფერმიხდილი... იგი „ფიგაროს“ კითხვებზე პასუხებს სუსტი და აკანკალებული ხელით წერს...“, - ნათქვამია პუბლიკაციაში.

წყარო: https://www.lefigaro.fr/international/mikhail-saakachvili-l-ex-president-georgien-au-figaro-le-sort-de-la-georgie-est-lie-a-la-victoire-de-l-ukraine-face-a-la-russie-20230312

მოამზადა სიმონ კილაძემ