,
„პროგნოზების მიუხედავად, 7 ივლისს საფრანგეთში ჩატარებული საპარლამენტო არჩევნების მეორე ტურის შედეგების მიხედვით, მარინ ლე პენის პარტიამ „ეროვნულმა გაერთიანებამ“ მემარცხენეთა კოალიციას და ცენტრისტებს წინააღმდეგობა ვერ გაუწია და პირველი ადგილის ნაცვლად, მესამე ადგილი მიიღო“, - ნათქვამია ბრიტანული ტელეარხის „სქაი ნიუსის“ (Sky news) მიერ გამოქვეყნებულ სტატიაში სათაურით „ყველაზე დიდი სიურპრიზი საფრანგეთის არჩევნების ისტორიაში“ (ავტორი - ადამ პარსოსნსი, პარიზელი კორესპონდენტი). „ანუ ქვეყანაში არ იქნება უკიდურესად მემარჯვენე მთავრობა, მაგრამ საფრანგეთს წინ პოლიტიკური უთანხმოება და არასტაბილურობა ელოდება“, - ხაზგასმულია მასალაში.
გთავაზობთ პუბლიკაციის შინაარსს:
საფრანგეთის პარლამენტის ქვედა პალატის - ეროვნული კრების არჩევნების მეორე ტურმა, რომელიც 7 ივლისს გაიმართა, გასაოცარი შედეგები მოიტანა. ეს არის, ალბათ, ყველაზე დიდი სიურპრიზი არჩევნების ისტორიაში: მისი წინასწარმეტყველება ვერვინ ვერ შეძლო - ვერც სოციოლოგებმა, ვერც საზოგადოებამ და ვერც პოლიტიკოსებმა.
საფრანგეთში ულტრამემარჯვენე მთავრობა არ იქნება, მაგრამ იქნება არასტაბილურობა და გაურკვევლობა. არჩევნებს, რომლებსაც სიტუაციაში სინათლე უნდა შეეტანა, საპირისპირო შედეგი მოიტანა. წინ ფრანგებს პოლიტიკური ჩიხები, ძველი წყენების გახსენება და ურთიერთბრალდებები ელოდებათ.
ნათელია მხოლოდ ის, რომ საფრანგეთის პარლამენტი სამ ფრაქციად იქნება გაყოფილი:
ყველაზე დიდი, მაგრამ არა აბსოლუტური უმრავლესობის მქონე, იქნება მემარცხენე კოალიცია „ახალი სახალხო ფრონტი“. ცენტრისტულმა ჯგუფმა, რომელიც პრეზიდენტ ემანუელ მაკრონის ირგვლივ არის გაერთიანებული, ყველა ნეგატიური პროგნოზის მიუხედავად, მაინც შეძლო მეორე ადგილის დაკავება, ხოლო მარინ ლე პენის პარტიამ „ეროვნულმა გაერთიანებამ, რომელსაც აბსოლუტურ უმრავლესობას (ანუ 300-მდე სადეპუტატო ადგილის მოპოვებას უწინასწარმეტყველებდნენ), მხოლოდ მესამე ადგილის მოპოვება მოახერხა.
აქედანვე აშკარაა, რომ ფრაქციები ერთმანეთის მიმართ მტრულად იქნებიან განწყობილნი. შესაბამისად, კოალიციური მთავრობის შედგენა ძალიან ძნელი იქნება და ამ მიზნით მოლაპარაკებები დიდხანს გაგრძელდება.
ემანუელ მაკრონი, მაგალითად, უკვე დიდი ხნის განმავლობაში ზიზღით უყურებს ჟან-ლიუკ მელანშონს - მემარცხენე კოალიციის ყველაზე მსხვილი პარტიის - „დაუმორჩილებელი საფრაგეთის“ ლიდერს. ასევე საძულველია მაკრონისათვის მარინ ლე პენი და მისი პარტია ეროვნული გაერთიანება“. აღსანიშნავია, რომ ერთმანეთისადმი სიყვარულით არც მემარცხენე ბლოკის წევრები არ გამოირჩევიან - ჟან-ლიუკ მელანშონს განუდგნენ რიგი პარტიის ლიდერები მას შემდეგ, რაც მან პროვოკაციული კომენტარები გააკეთა ისრაელისა და არაბების მიმართ.
ამიტომაც, როცა „დაუმორჩილებელი ფრანგი“ ჟან-ლიუკ მელანშონი ითხოვს, რომ მისი წარმომადგენელი იქნას ქვეყნის პრემიერ-მინისტრად დანიშნული, მისი პარტნიორები ამას არ დათანხმდებიან. ვინ იქნება საფრანგეთის მთავრობის მეთაური? ეს ჯერ არავინ არ იცის და, ალბათ, საკმაო ხნის განმავლობაში უცნობი იქნება. გაბრიელ ატალმა, პრემიერ-მინისტრმა, რომელიც ემანუელ მაკრონის თანამზრახველია, უკვე გამოაცხადა, რომ პოსტიდან გადადგება, თუმცა, ალბათ, დროებით მოვალეობის შესრულებას გააგრძელებს.
ეროვნული გაერთიანების ლიდერები მარინ ლე პენი და ჟორდან ბარდელა დიდი მხარდაჭერით სარგებლობენ პარიზისა და სხვა მსხვილი ქალაქების გარეთ - ქვეყნის სასოფლო რეგიონებში. პრინციპში, ეს რეალობა საერთო ჩარჩოებში ჯდება: საფრანგეთშიც ისეთივე სიტუაციაა, როგორც სხვა ქვეყნებში, სადაც პოპულისტი პოლიტიკოსები „ჰყვავიან“, მაგალითად, უნგრეთში. ქალაქებსა და სოფლებს შორის ამ მხრივ განხეთქილება არსებობს.
რა მოხდება წინ კონკრეტულად, არავინ იცის.
საფრანგეთი, მსოფლიოს ერთ-ერთიმდიდარი და გავლენიანი სახელმწიფო, არასტაბილურობის პერიოდში შევიდა“.
ავტომწარმოებლებს ამერიკის შეერთებულ შტატებში გაყიდვების კუთხით შთამბეჭდავი 2025 წელი ჰქონდათ, მიუხედავად ისეთი სერიოზული დაბრკოლებებისა, როგორებიცაა მზარდი ფასები, მაღალი საპროცენტო განაკვეთები და იმპორტირებულ მანქანებსა თუ ნაწილებზე დაწესებული ტარიფები.
წლის დასაწყისში თეთრმა სახლმა აშშ-ში ავტომობილების გაყიდვების 2.4%-იანი ზრდა ხაზგასმით აღნიშნა. მათი განცხადებით, ეს ინდუსტრიის საუკეთესო მაჩვენებელია 2019 წლის შემდეგ და ასევე დასტური იმისა, რომ მათ მიერ დაწესებულმა ტარიფებმა ავტომობილები არ გააძვირა.
ამის გათვალისწინებით, USA TODAY-ის გუნდმა შეისწავლა წამყვანი ავტომწარმოებლების გაყიდვების უახლესი ანგარიშები, რათა გაერკვია, ვის ჰქონდა საუკეთესო 2025 წელი ავტომობილების გაყიდვების კუთხით.
გთავაზობთ 10 ყველაზე გაყიდვად ავტობრენდს იმ მწარმოებლებს შორის, რომლებმაც 2025 წლის გაყიდვების სრული მონაცემები უკვე გამოაქვეყნეს:
2025 წელს "ჯენერალ მოტორსმა" (General Motors) 2.85 მილიონი ავტომობილი გაყიდა, ყველაზე გაყიდვადი მოდელები კი Chevrolet Silverado და GMC Sierra იყო. გამოქვეყნებულ პრესრელიზში კომპანიამ განაცხადა, რომ ის უკვე ზედიზედ მეექვსე წელია, ამერიკის ლიდერია სრული ზომის პიკაპების ბაზარზე, სადაც Silverado-მ და Sierra-მ ბოლო 20 წლის განმავლობაში საუკეთესო ჯამური გაყიდვები დააფიქსირეს.
რეიტინგში მეორე ადგილზეა "ტოიოტა" (Toyota) 2.5 მილიონი გაყიდული ერთეულით, საიდანაც ყველაზე პოპულარული მოდელი RAV4 იყო. როგორც კომპანიის ვიცე-პრეზიდენტმა აღნიშნა, იაპონური კომპანია "მადლიერია გასულ წელს ტოიოტას მომხმარებლების მზარდი გამოხმაურებისთვის, რაც ხელმისაწვდომობისა და არჩევანის მრავალფეროვნებისადმი, კომპანიის ღრმა ერთგულებას ასახავს".
მესამე ადგილს 2.1 მილიონი გაყიდვით "ფორდი" (Ford) იკავებს. ყველაზე პოპულარული ავტომობილი კი F-სერია იყო. "ფორდის" განცხადებით, მათი ბაზრის წილი წლის განმავლობაში 0.6 პროცენტული პუნქტით გაიზარდა და 13.2%-ს მიაღწია, რაც მომხმარებელთა ფართო წრისთვის "ფორდის” მიზიდულობამ განაპირობა, კომპლექტაციებისა და ძრავების მრავალფეროვანი არჩევანის ხარჯზე".
ყველაზე პოპულარულ საავტომობილო ბრენდებს შორის მეოთხე ადგილზე "ტესლაა" (Tesla). მან 2025 წელს 1.6 მილიონი ავტომობილი გაყიდა, ყველაზე გაყიდვადი მოდელი კი Model Y იყო. ინვესტორებისთვის გაკეთებულ განცხადებაში Tesla-მ აღნიშნა, რომ კომპანიამ 2025 წელს 434 ათასი ავტომობილი აწარმოვა და 14.2 გიგავატ/საათი მოცულობის ენერგიის შემნახველი სისტემები დაამონტაჟა, რაც რეკორდული მაჩვენებელია".
მეხუთე ადგილზე 1.4 მილიონი გაყიდვით "ჰონდა" (Honda) და მისი CR-V არიან. "ჰონდამ" პრესრელიზში განაცხადა, რომ 2025 წელი იყო "მათთვის საუკეთესო, 2021-ის შემდეგ, 0.5%-იანი წლიური ზრდით". კომპანიის თქმით, გაყიდვების ზრდა მიღწეულ იქნა "მიუხედავად ბაზრის პირობების ცვლილებისა და მიკროჩიპების დეფიციტისა, რამაც მე-4 კვარტალში მარაგების შემცირება გამოიწვია".
1.2-მილიონიანი გაყიდვები დააფიქსირა "სტელანტისმა" (Stellantis). მისი ყველაზე გაყიდვადი მანქანა კი Ram-ის სერიის მსუბუქი პიკაპი იყო. როგორც კომპანიამ განაცხადა, კვარტალურმა გაყიდვებმა და ბაზრის წილის ზრდამ აჩვენა, რომ აშშ-ში ბიზნესის გადატვირთვისთვის Stellantis-ი სწორ ნაბიჯებს დგამს.
ასევე საუკეთესო ხუთეულის მიღმა, მე-7 ადგილზე რჩება "ნისანი" (Nissan), 926 ათასი გაყიდვით და ბესტსელერი მოდელით - Nissan Rogue. "ნისანმა" პრესრელიზში აღნიშნა, რომ "კალენდარული წლის განმავლობაში გამორჩეული შედეგები აჩვენეს მისმა Kicks და Pathfinder ყველგანმავლებმა; რომელთა გაყიდვებმაც, თითოეულის ბაზარზე გამოჩენის შემდეგ, რეკორდულ მოცულობას მიაღწია.
"ჰიუნდაიმ" (Hyundai) 2025 წელს აშშ-ში 901 ათასი მანქანა გაყიდა. მათი ყველაზე გაყიდვადი მოდელი Tucson იყო. Hyundai-ს პრეზიდენტმა და აღმასრულებელმა დირექტორმა, განაცხადა, რომ კომპანია ზედიზედ მეხუთე წელია, რეკორდულ საცალო გაყიდვებს აფიქსირებს.
"კია" (Kia) და მისი Sportage ათეულში რჩებიან, გასულ წელს გაყიდული 852 ათასი ავტომობილით. პრესრელიზში "კიამ" აღნიშნა, რომ "საცალო გაყიდვები ზედიზედ მერვე წელია იზრდება.
ბოლო ადგილი "ფოლკსვაგენს" (Volkswagen) უკავია, აშშ-ში თითქმის 330 ათასი გაყიდვით. მათი ყველაზე გაყიდვადი ავტომობილი Volkswagen Tiguan იყო. მიუხედავად იმისა, რომ ბრენდი ათეულში მოხვდა, "ფოლკსვაგენმა" პრესრელიზში განაცხადა, რომ 2025 წლის მეოთხე კვარტალის გაყიდვები 2024 წლის იმავე პერიოდთან შედარებით, 19.8%-ით შემცირდა. კომპანიის ცნობით, მათ წელი 13%-იანი კლებით დაასრულეს.
შეიძლება ითქვას, რომ 2025 წელი ამერიკულ ავტობაზარზე სტაბილურობისა და "პრაგმატული არჩევანის" წელი იყო. მძღოლებმა უარი თქვეს ექსპერიმენტებზე და არჩევანი ნაცად, საიმედო ბრენდებსა და პრაქტიკულ ქროსოვერებზე შეაჩერეს. 2026 წლისთვის ექსპერტები ვარაუდობენ, რომ ჰიბრიდულ ავტომობილებზე მოთხოვნა კიდევ უფრო გაიზრდება, ხოლო ავტომწარმოებლებს, კონკურენციის შესანარჩუნებლად, ფასების პოლიტიკის გადახედვა მოუწევთ.
წყარო:https://bm.ge/n
