,
ვლადიმერ პუტინმა ილჰამ ალიევს „აზერბაიჯანის ავიახაზების“ თვითმფრინავის ჩამოვარდნის გამო ბოდიში მოუხადა, - ამის შესახებ ინფორმაციას კრემლის პრესსამსახური ავრცელებს.
კრემლის პრესსამსახურის ცნობით, რუსეთის პრეზიდენტმა, ვლადიმერ პუტინმა რუსეთის საჰაერო სივრცეში მომხდარი „ტრაგიკული ინციდენტის“ გამო ბოდიში მოიხადა, დაღუპულთა ოჯახებს თანაგრძნობა გამოუცხადა და დაშავებულებს სწრაფი გამოჯანმრთელება უსურვა.
კრემლის ინფორმაციით, ვლადიმერ პუტინმა აზერბაიჯანელ კოლეგასთან სატელეფონო საუბრისას აღნიშნა, რომ „აზერბაიჯანის ავიახაზების“ თვითმფრინავი გროზნოში დაშვებას „უკრაინული დრონებისა შეტევისა და რუსული საჰაერო თავდაცვის სისტემების მუშაობის დროს ცდილობდა“.
„თვითმფრინავმა გროზნოს აეროპორტში დაშვება არაერთხელ სცადა. ამ დროს გროზნოს, მოზდოკსა და ვლადიკავკაზს უკრაინული დრონები ესხმოდნენ თავს და რუსეთის საჰაერო თავდაცვის სისტემები ამ თავდასხმებს იგერიებდნენ“, - ნათქვამია კრემლის მიერ გავრცელებულ ინფორმაციაში.
შეგახსენებთ, ყაზახეთის ქალაქ აქთაუში „აზერბაიჯანის ავიახაზების“ თვითმფრინავის ჩამოვარდნის შედეგად 38 ადამიანი დაიღუპა. თვითმფრინავის ბორტზე, რომელიც ბაქო-გროზნოს რეისს ასრულებდა, 67 ადამიანი იმყოფებოდა, მათ შორის ეკიპაჟის 5 წევრი და 62 მგზავრი.
აზერბაიჯანის სამთავრობო წყაროებმა Euronews-ს ექსკლუზიურად დაუდასტურეს წინასწარი გამოძიების ინფორმაცია, რომ „აზერბაიჯანის ავიახაზების“ თვითმფრინავის ავიაკატასტროფა რუსულმა მიწა-ჰაერის ტიპის რაკეტამ გამოიწვია.
