,
კრემლის პრესსპიკერი, დმიტრი პესკოვი აცხადებს, რომ დონალდ ტრამპის გაფრთხილება, რუსეთისთვის 100%-იანი ტარიფების დაწესების შესახებ, "სერიოზული" საკითხია, თუმცა კრემლს ვაშინგტონის გზავნილის გასაანალიზებლად მეტი დრო სჭირდება.
14 ივლისს, თეთრ სახლში აშშ-ის პრეზიდენტ დონალდ ტრამპისა და NATO-ს გენმდივნის, მარკ რუტეს ერთობლივ პრესკონფერენციაზე ტრამპმა განაცხადა, რომ იმ შემთხვევაში, თუ რუსეთი უკრაინასთან სამშვიდობო შეთანხმებას 50 დღის განმავლობაში არ მიაღწევს, ვაშინგტონი მოსკოვს 100%-იან ტარიფს დაუწესებს.
"აშშ-ის პრეზიდენტის ეს განცხადება საკმაოდ სერიოზულია. ზოგიერთი რამ, რაც მან თქვა, ჩანს რომ პირადად პრეზიდენტ პუტინისკენ იყო მიმართული. ეჭვგარეშეა, რომ მეტი დრო გვჭირდება იმის გასაანალიზებლად, რა ითქვა ვაშინგტონში. თუ პრეზიდენტი პუტინი საჭიროდ ჩათვლის, კომენტარსაც გაავრცელებს", - განაცხადა პესკოვმა.
ტრამპის განცხადებას გამოეხმაურა რუსეთის საგარეო საქმეთა მინისტრი სერგეი ლავროვიც, რომელმაც განაცხადა, რომ დონალდ ტრამპი NATO-სა და ევროკავშირის წნეხის ქვეშაა მოქცეული.
"ნათელია, რომ იგი (ტრამპი) უზარმაზარი, ვიტყოდი უხამსი წნეხის ქვეშ ექცევა ევროკავშირისა და NATO-ს ხელმძღვანელობის მხრიდან, რომლებიც უცერემონიოდ უჭერენ მხარს ზელენსკის მოთხოვნებს თანამედროვე იარაღით, მათ შორის შემტევი იარაღით მომარაგებაზე, დასავლეთის ქვეყნების გადასახადების გადამხდელთა ხარჯზე", - განაცხადა ლავროვმა ჩინეთში ოფიციალური ვიზიტის დროს გამართულ პრესკონფერენციაზე.
ტრამპის ულტიმატუმი რუსეთის ექსპრეზიდენტმა, უსაფრთხოების საბჭოს თავმჯდომარის მოადგილემ, დმიტრი მედვედევმაც შეაფასა. როგორც მან X-ზე დაწერა, რუსეთს არ ანაღვლებს ტრამპის "თეატრალური ულტიმატუმი".
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
