,
პრემიერ-მინისტრი აცხადებს, რომ „მახინჯი [რიყის] დოქების ადგილას კონკრეტული პროექტი განხორციელდება, რომელიც ძველი თბილისის იერსახესთან თანხვედრაში იქნება. ამის შესახებ მან ჟურნალისტების კითხვის საპასუხოდ განაცხადა.
საქმე ის არის,რომ საქართველოს მთავრობის მიერ 6 მაისის განკარგულებიდან ცნობილი გახდა, რომ შეიძლება “რიყის დოქების” დემონტაჟი მოხდეს და იქ სასტუმრო გაიხსნას. ჟურნალისტის კითხვაზე - რატომ მისცა კობახიძემ რიყის დოქების დემონტაჟის უფლება, „ოცნების“ პრემიერი ასე პასუხობს: „მე არქიტექტორი არ ვარ, მაგრამ მგონია, რომ ეს სიმახინჯე არ ეკადრება ჩვენს ლამაზ დედაქალაქს. მეორე ჩვენ ყურადღებას მივაქცევთ იმას, რომ პროექტი რომელიც განხორციელდება იმ ადგილზე ჰარმონიულად იყოს შერწყმული ძველი თბილისის გარემოსთან“.
კითხვაზე - შეეხება თუ არა რამე მშვიდობის ხიდს, ირაკლი კობახიძე აცხადებს, რომ „არა, არავითარ შემთხვევაში. აქ საუბარია კონკრეტულ პროექტზე, რომელიც უნდა განხორციელდეს მახინჯი დოქების ადგილას. [რა იქნება მათ ადგილას] დაზუსტდება მოლაპარაკებების პროცესში, თუმცა ჩვენთვის პრინციპულად მნიშვნელოვანია, რომ პროექტი რომელიც განხორციელდება შერწყმული იყოს ძველი თბილისის გარემოსთან“.
