ვეტერანთა კულტურისა და დასვენების (კიკვიძის) პარკში მინი ფეხბურთის ტურნირის ფინალი გაიმართა.
შეჯიბრებაში 13 გუნდი მონაწილეობდა.
ფინალური მატჩის დასრულების შემდეგ დაჯილდოება გაიმართა.
I, II, III და IV ადგილზე გასულ გუნდებს საჩუქრად თასები, მედლები და 1500, 1000, 800 და 500-ლარიანი ფულადი ვაუჩერები გადაეცათ.
ღონისძიებაზე მოწვეული იყვნენ თბილისის ,,დინამოს“ ვეტერანი ფეხბურთელები, რომლებსაც ასევე სიმბოლური საჩუქრები - ფულადი ვაუჩერები და ,,ნიკორას“ მაღაზიათა ქსელის ბარათები გადაეცათ.
შეჯიბრების დასრულების შემდეგ, პარკში, ზეთისხილის ხის მიმდებარედ არსებულ რკინის კონსტრუქციაზე 44 წლის წინ მოპოვებული გამარჯვების ამსახველი ფოტომასალა გამოიფინა.
ზეთისხილის ხე კიკვიძის პარკში, გასულ წელს სამშენებლო კომპანია შპს ,,თბილისი ორიენტალის“ ინიციატივით, 1981 წლის 13 მაისს ევროპის თასების მფლობელთა თასის გამარჯვებული დინამოელების პატივსაცემად დაირგო.
,,ფინალისტებს ვულოცავ მოპოვებულ გამარჯვებას, ყველა გუნდს კი ვუსურვებ წარმატებებს. ჩვენ მომავალშიც აქტიურად გავაგრძელებთ ახალგაზრდებში ჯანსაღი ცხოვრების წესის ხელშეწყობასა და პოპულარიზაციას, მათ განვითარებასა და წინსვლას როგორც სპორტულ, ასევე, ცხოვრების სხვა ასპარეზზე. სწორედ, ამ მიზნით ნაძალადევის რაიონის გამგეობა განაგრძობს სპორტული მოედნების მშენებლობა-რეაბილიტაციას“, - განაცხადა ნაძალადევის რაიონის გამგებელმა ირაკლი ანდღულაძემ.
ღონისძიება ნაძალადევის რაიონის გამგეობის დაფინანსებითა და ორგანიზებით ჩატარდა. მას ნაძალადევის რაიონის გამგებელი ირაკლი ანდღულაძე და პარლამენტის ნაძალადევის რაიონის დელეგატი ირაკლი ხელაძე დაესწრნენ.
