მარნეულის, ბოლნისის და ლეჩხუმის საკარანტინო ზონებს კიდევ ერთი ადმინისტრაციული ერთეული დაემატა, სადაც მკაცრი საკარანტინო ზომები იქნება შემოღებული. ქობულეთის მუნიციპალიტეტში შემავალი ოთხი სოფელი- გვარა, მუხაესტატე, ლეღვა და წყავრუკა მაღალი რისკის ზონად გამოცხადდა ბოლო დღეებში გამოვლენილი შიდა გადაცემის ფაქტების გამო. 

„დღეისათვის უკვე არის 252 შემთხვევა და ამასთან რამდენიმე შემთხვევა დადასტურდა აჭარის ავტონომიურ რესპუბლიკაში. კვლევის შედეგად დადგინდა, რომ ამ შემთხვევებში ფართო წრე იყო კონტაქტებისა და შესაბამისად, ჩვენ გვიწევს მივმართოთ სპეციალურ ღონისძიებებს. ქობულეთის მუნიციპალიტეტში შემდეგ ადმინისტრაციულ ერთეულებში: გვარაში, მუხაესტატეში, ლეღვაში და წყავრუკაში შემოდის სპეციალური რეჟიმი და მკაცრი საკარანტინე შეზღუდვები წესდება. გარდა იმ შეზღუდვებისა, რომლებიც საგანგებო მდგომარეობით დადგენილია, ამ ადმინისტრაციულ ერთეულებში აკრძალულია შესვლა და გამოსვლა. ადგილზე ამ რეჟიმის აღსრულებას უზრუნველყოფს შინაგან საქმეთა სამინისტროს ძალები და ასევე თავდაცვის ძალები. მოქალაქეებს გარეთ გამოსვლა შეეძლებათ მხოლოდ იმ შემთხვევაში, როდესაც ისინი საჭიროებენ პროდუქტის შეძენას, მედიკამენტის შეძენას ან სამედიცინო მომსახურების მიღებას. მათ ექნებათ უფლება განახორციელონ სასოფლო-სამეურნეო სამუშაოები, თუ დაიცავენ იმ პროტოკოლს, რომელიც სპეციალურად ასეთი შემთხვევებისთვის არის შექმნილი."- განაცხადა მთავრობის ადმინისტრაციაში გამართულ საგანგებო ბრიფინგზე პრემიერ- მინისტრის წარმომადგენელმა ირაკლი ჩიქოვანმა.