ევროპარლამენტარმა, ლიტვის ყოფილმა პრემიერმინისტრმა ანდრიუს კუბილიუსმა ტვ პირველთან ექსკლუზიურ ინტერვიუში საქართველოს ხელისუფლების ქმედებები შეაფასა და შესაძლო შედეგებზე ისაუბრა. ევროპარლამენტარი აცხადებს, რომ 8 მარტის ხელშეკრულების არშესრულებით, ხელისუფლება რისკავს ევროკავშირის ნდობას და რწმენას, რწმენის დაკარგვა კი გამოიწვევს სხვა ყველაფერს, მათ შორის ფინანსური შესაძლებლობის გაქრობასაც.
კუბილიუსის თქმით, საარჩევნო შეთანხმება მხოლოდ პროპორციულ არჩევნებს არ გულისხმობს, გულისხმობს პოლიტიკური პატიმრების გათავისუფლებასაც.
"ევროკავშირის მხარდაჭერა დამოკიდებულია იმ პირობების შესრულებაზე, რომლებიც 8 მარტის შეთანხმებით არის გათვალისწინებული და თავის თავში დემოკრატიის განვითარებასაც გულისხმობს. ამიტომაც ვარ შეშფოთებული, შეთანხმება, რომელსაც ხელი მმართველმა პარტიამ და ოპოზიციამ მოაწერეს, ძალიან მნიშვნელოვანია და არ არის სრულად შესრულებული, რაზეც პასუხისმგებლობა ხელისუფლებას ეკისრება. ის მხოლოდ პროპორციულ არჩევნებს არ გულისხმობს, გულისხმობს პოლიტიკური პატიმრების გათავისუფლებას და მართლმსაჯულების პოლიტიკისგან დაცლას და სწორედ ამ პირობას არ ასრულებს ხელისუფლება. საერთაშორისო ინსტიტუტებს, რომლებიც საქართველოს დახმარებას უზრუნველყოფენ, გვიჩნდება კითხვები და ეჭვებიც უფრო იზრდება. შესაძლოა, პირდაპირ ფინანსური მხარდაჭერა არ შევწყვიტოთ, მაგრამ ხელისუფლება რისკავს ევროკავშირის ნდობას და რწმენას, რწმენის დაკარგვა კი გამოიწვევს სხვა ყველაფერს, მათ შორის ფინანსური შესაძლებლობის გაქრობასაც", - უთხრა ევროპარლამენტარმა ტვ პირველ [ტვ პირველის თარგმანი].
რაც შეეხება სანქციებს, კუბილიუსის თქმით, ესეც საქართველოს ხელისუფლებაზეა დამოკიდებული. ევროპარლამენტარი მოუწოდებს საქართველოს ხელისუფლებას, არ მიჰყვეს უკრაინის ყოფილი პრეზიდენტის, ვიქტორ იანუკოვიჩის მაგალითს, ვინაიდან "ყველამ კარგად ვიცით, როგორ დამთავრა იანუკოვიჩმა.
"ის დამოკიდებულია იმაზე, გვექნება თუ არა საქართველოს დემოკრატიის რწმენა, ხელისუფლების გადაწყვეტილებებიდან გამომდინარე. თუ მმართველი გუნდი ჩვენს ნდობას ვერ შეინარჩუნებს და დადებულ პირობებს არ შეასრულებს, შეიძლება, ყველაფერი მოხდეს. მოვუწოდებ მათ, არ გაყვნენ იანუკოვიჩის მაგალითს, რომელიც ოპონენტებს ციხეში უშვებდა. ჩვენ კარგად ვიცით, როგორ დაამთავრა იანუკოვიჩმა, არ გვინდა, საქართველოს ხელისუფლებამაც ეს ცუდი ბედი გაიზიაროს", - ამბობს ევროპარლამენტარი.
ევროპალამენის საგარეო ურთიერთობათა კომიტეტი 19 მაისს განიხილავს ანგარიშს ევროკავშირთან ასოცირების ხელშეკრულების განხორციელების შესახებ.
ასევე მაისს ევრონესტის საპარლამენტო ასამბლეაში ევროპარლამენტის დელეგაციის თავმჯდომარემ, ანდრიუს კუბილიუსმა თქვა, რომ საქართველო ევროკავშირიდან და სხვა პარტნიორებიდან ახალი კორონავირუსის კრიზისთან გასამკლავებლად 500 000 000 ევროზე მეტს მიიღებს. თუმცა, ამ დახმარების საკვანძო კომპონენტი გადაჯაჭვულია საქართველოს მიერ ნაკისრი ვალდებულებების შესრულებასთან, განსაკუთრებით კი საარჩევნო სისტემასა და სამართლის უზენაესობასთან.