,
ალეკო ელისაშვილის არგუმენტი, რომ პარლამენტში შესვლა ისტორიული ცვლილებებისთვის არის საჭირო, არის უბრალოდ ბლეფი, - ამის შესახებ პოლიტოლოგმა ხათუნა ლაგაზიძემ განაცხადა, რითაც გამოეხმარა პარტია „მოქალაქეების” ლიდერის ალეკო ელისაშვილის განცხადებას, რომ ის დათანხმდება პარლამენტში შესვლას იმ შემთხვევაში, თუ მხარეები საარჩევნო კანონმდებლობის და საარჩევნო ადმინისტრაციის რეფორმაზე შეთანხმდებიან.
მისი თქმით, „ქართული ოცნება” რასაც არ უნდა დაპირდეს საარჩევნო კოდექსის ცვლილებებისთვის, ელისაშვილის პარლამენტში შესვლა აუცილებელი არ არის.
„ქართულ ოცნებას” აქვს ხმების საჭირო რაოდენობა იმისათვის, რომ მიიღოს ნებისმიერი ცვლილება ორგანულ კანონში. არგუმენტი, რომ ალეკო ელისაშვილი პარლამენტში საარჩევნო სისტემის ცვლილებისთვის შედის, საერთოდ ბუნებაში არ არსებობს. ის პუნქტები, რომლებიც საარჩევნო კოდექსის ცვლილებებს ეხება და არჩევნების ჩატარების წესს, მესამე-მეოთხე პუნქტად არის გაწერილი იმ დოკუმენტებში, რომლებსაც ხელისუფლება და ოპოზიცია განიხილავს. ეს პუნქტები უნდა დავყოთ ორ ნაწილად იმის მიხედვით, რამდენი ხმა სჭირდება ამ ცვლილებების მიღებას. მესამე პუნქტი, სადაც საუბარია იმაზე, რომ პარლამენტი უნდა აირჩეს პროპორციული წესით და ბარიერი უნდა იყოს 0-დან 3%-მდე, საპარლამენტო ცვლილებების ნებისმიერ ცვლილებას სჭირდება კონსტიტუციის ცვლილება, შესაბამისად ელისაშვილი პარლამენტში შევა თუ არ შევა, „ქართულ ოცნებას” საკონსტიტუციო უმრავლესობა არ აქვს და შესაბამისად, კონსტიტუციაში ცვლილებას ვერ განახორციელებს. ამიტომაც ელისაშვილის პარლამენტში შესვლას აზრი არ აქვს. დანარჩენ ცვლილებებზე, რაზეც არის საუბარი ყველა ის ცვლილება შეიძლება განხორციელდეს საარჩევნო კოდექსში ცლილებების შეტანით და ყველა ამ ცვლილების მიღება „ქართულ ოცნებას” შეუძლია თავისივე ხმებით, ისე, რომ ერთი ოპოზიციონერის ხმაც არ დასჭირდეს, შესაბამისად, ამ ნაწილშიც ალეკო ელისაშვილის იქ ყოფნის საჭიროება საერთოდ არ არის.
თუ „ქართული ოცნება” აყენებს საკითხს, რომ თუ არ შემოხვალ მე ამ ცვლილებებს არ მივიღებო, მაშინ ხელისუფლება ამით კიდევ ერთხელ უსვამს ხაზს საკუთარ დიქტატორულ სახეს. ელისაშვილის პარლამენტში შესვლას არც იმ შემთხვევაში აქვს აზრი, თუ საკონსტიტუციო ცვლილებების მიღებას დაპირდება “ქართული ოცნება” იმიტომ, რომ გამორიცხულია მათ საკონსტიტუციო ცვლილებები მიიღონ, ამისთვის მათ არ ეყოფათ რაოდენობა, სულ რომ ათზე გაამრავლონ ელისაშვილი და არც იმ შემთხვევაში არის ელისაშვილის პარლამენტში შესვლის აუცილებლობა თუკი “ქართული ოცნება” საარჩევნო კოდექსში ცვლილებებს მიიღებს იმიტომ, რომ “ქართულ ოცნებას” ცვლილებების მიღება თავისივე ხმებით შეუძლია. ასე რომ არგუმენტი, რომ პარლამენტში შესვლა ისტორიული ცვლილებებისთვის არის საჭირო არის უბრალოდ ბლეფი”, - განაცხადა ხათუნა ლაგაზიძემ.
ამასთან, პოლიტოლოგის თქმით, შესაძლებელია სხვისი პოზიციები არ მოგწონდეს, მაგრამ სხვების ჯინაზე პარლამენტში შესვლა სრული სისულელე და სიყალბეა.
„რაც შეეხება ალეკო ელისაშვილის მიერ ოპოზიციონერების მოხსენიებას - ესეც ჰგონია, რომ მის საქციელს გაამართლებს. გასაგებია, რომ შეიძლება არ მოგწონდეს სხვისი მოქმედებები, აზრები და პოზიციები, მაგრამ სხვის ჯინაზე პარლამენტში შესვლა სრული სისულელე და სრული სიყალბეა. თუ ვინმე ოპოზიციის წარმომადგენელზე განაწყენებულია, ამით საერთო საქმეს აზარალებს და საკუთარ იმიჯს ინგრევს?!”, - აღნიშნა პოლიტოლოგმა.
შეგახსენებთ, პარტია „მოქალაქეების“ ლიდერმა ალეკო ელისაშვილმა დღეს განაცხადა, რომ პარლამენტში შესვლას იმ შემთხვევაში დათანხმდება, თუ მხარეები საარჩევნო კანონმდებლობისა და საარჩევნო ადმინისტრაციის რეფორმაზე შეთანხმდებიან.
ასევე დღეს ელისაშვილმა სოციალური ქსელით გავრცელებულ ვიდეომიმართვაში აღნიშნა, რომ ბოკერია და უგულავა პარლამენტში ვერ მოხვდნენ და ამიტომ უნდათ, ყველაფერი არიონ და საბოტაჟით დაკავდნენ.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
