სარჩელიდან ირკვევა, რომ ვიზის გაცემაზე უარის თქმის საფუძველი აშშ-ს საბაჟო და საზღვრის დაცვის ფედერალური სააგენტოს 2023 წლის პირველი მაისით დათარიღებული დადგენილება გახდა, რომელიც იმიგრაციისა და ეროვნულობის აქტის 212(a)(2)(I) მუხლს დაეყრდნო.
იმიგრაციისა და ეროვნულობის აქტის 212 მუხლი, ქვემდებარე პუნქტებით იმ კრიმინალურ საფუძვლებს ადგენს, რომელიც აშშ-ში შეშვებაზე უარის თქმის მიზეზი შეიძლება გახდეს. კონკრეტულად ის მუხლი, რომელზე დაყრდნობითაც, დავით კეზერაშვილს აშშ-ს ვიზა არ მისცეს, ფულის გათეთრებაზე ეჭვს გულისხმობს.
ამ მუხლით ვიზაზე უარის თქმის საფუძველი შესაძლოა გახდეს არა მხოლოდ მტკიცებულება, არამედ საკონსულოსა და პროკურატურაში ეჭვიც კი, რომ ამ პირს შესაძლოა კავშირი ჰქონდეს ფულის გათეთრებასთან ან მათთან, რომლებიც მსგავს საქმეში არიან ჩართული.
ამავეს განმარტავს რადიო თავისუფლებასთან საიას ყოფილი თავმჯდომარე ნიკა სიმონიშვილი, რომელიც დავით კეზერაშვილის სარჩელს გაეცნო:
"მუხლი, რომლის საფუძველზეც უარია ნათქვამი, ამბობს, რომ თუ საკონსულოს თანამშრომელმა და გენერალურმა პროკურორმა იცის ან აქვთ ინფორმაცია, რომ პირი არის ჩართული კონკრეტულ დანაშაულში, თანამონაწილეა ასეთი დანაშაულის, მას შეიძლება უარი ეთქვას ვიზის მიღებაზე".
რას ითხოვს კეზერაშვილი სასამართლოში?
დავით კეზერაშვილი მოითხოვს, შეგროვდეს და გადაეცეს ყველა ის ინფორმაცია, რომელიც ვიზაზე უარის თქმის მიზეზი გახდა.
ამ შინაარსის სარჩელი გამოქვეყნდა ვებგვერდზე Courtlistener.com, რომელიც აშშ-ს სასამართლოებში შესულ სარჩელებს აგროვებს და ასაჯაროებს.
სარჩელიდან ირკვევა, რომ დავით კეზერაშვილმა აშშ-ს ვიზის მისაღებად განაცხადი კვიპროსში აშშ-ს საელჩოში 2023 წლის 4 აპრილს შეიტანა. უარი კი 2023 წლის 18 ივლისს მიიღო.
ამის შემდეგ, ყოფილმა თავდაცვის მინისტრმა ინფორმაციის თავისუფლების აქტის საფუძველზე აშშ-ს სახელმწიფო დეპარტამენტს მოსთხოვა იმ ინფორმაციის გასაჯაროება, რომელიც 212-ე მუხლზე დაყრდნობით ვიზაზე უარი თქმის საფუძველი გახდა.
დეპარტამენტმა მოთხოვნა წარმოებაში მიიღო, თუმცა კეზერაშვილს პასუხი ამ დრომდე არ მიუღია. მან სასამართლოში იჩივლა.
სარჩელი კოლუმბიის სასამართლოში 2024 წლის 20 თებერვალს დარეგისტრირდა.
"ამ სარჩელიდან არ ჩანს, დავობენ თუ არა ვიზის არგაცემაზე, ეს დოკუმენტი ეხება ინფორმაციის მიუღებლობის საკითხს. სარჩელში ნათქვამია, რომ მასთან დაკავშირებით ინფორმაცია სახელმწიფო დეპარტამენტმა არასწორად დააკავა, არ გადასცა მხარეს, დროული პასუხი არ გასცა და ამით ადეკვატური ინფორმაციის მიღების უფლება დაერღვათ", - განმარტავს ნიკა სიმონიშვილი.
აშშ-ს ვიზაზე უარის თქმის მომენტისთვის (2023 წლის ივლისი) უკვე ცნობილია ე.წ. ქოლცენტრებზე ბიბისის გამოძიების შესახებ, რომელიც 2023 წლის აპრილში გამოქვეყნდა. ამ გამოძიების ავტორი გამომძიებელი ჟურნალისტები ჰყვებოდნენ, რომ კვალი იმ საერთაშორისო თაღლითური ჯგუფებისა, რომლებიც ევროპელი პენსიონერების დანაზოგებს ითვისებდნენ, “ბატონ ოფშორთან”, საქართველოს ყოფილ თავდაცვის მინისტრთან მიდიოდა.
"BBC-ის სიუჟეტში გამოთქმული ბრალდებები უკიდურესად მცდარია. მე არაფერი მაქვს საერთო Milton Group-თან ან ქოლ-ცენტრებთან დაკავშირებულ რომელიმე თაღლითობასთან", - დაწერა კეზერაშვილმა ტელეკომპანიაში გაგზავნილ საჩივარში, სადაც ის ფაქტების უარყოფას მოითხოვდა.
კეზერაშვილი აცხადებს, რომ BBC-ის წინააღმდეგ ოფიციალური სარჩელი შეიტანა
ყოფილი თავდაცვის მინისტრი ტელეკომპანია ფორმულას დამფუძნებელია და ბიბისის გამოძიებამდე არხის საკონტროლო პაკეტს, 51%-ს ფლობდა. გამოძიების გამოქვეყნებიდან რამდენიმე დღეში განაცხადა, რომ მზად იყო უარი ეთქვა ტელეკომპანიის საკონტროლო პაკეტზე. ეს გადაწყვეტილება მან "ფორმულის" თანამშრომელთა “სარედაქციო დამოუკიდებლობის თამასის ასაწევად” მიიღო.
რეესტრმა დავით კეზერაშვილს "ფორმულაში" წილების გადაცემის მოთხოვნა დაუკმაყოფილა
- სააკაშვილის ხელისუფლების შეცვლის შემდეგ, 2012 წლიდან დავით კეზერაშვილის წინააღმდეგ საქართველოს პროკურატურამ რამდენიმე საქმეზე დაიწყო დევნა, თუმცა ის არცერთ მათგანზე არ არის მსჯავრდადებული, გარდა ერთისა.
- 2021 წლის სექტემბერში თავდაცვის ყოფილ მინისტრს, დავით კეზერაშვილს, საქართველოს უზენაესმა სასამართლომ პატიმრობა დაუსწრებლად მიუსაჯა ერთ-ერთ საწვრთნელ პროექტში 5 მილიონ 60 ათასი ევროს გაფლანგვის საქმეზე.
- კეზერაშვილი ქართულ სასამართლოს გამართლებული ჰყავს რამდენიმე, მათ შორის „ტელეიმედის“ გასხვისების საქმეზე, რომელშიც ყოფილ თავდაცვის მინისტრს ბრალად ედებოდა ორგანიზებული ჯგუფის მიერ განსაკუთრებით დიდი რაოდენობით ფულის გათეთრება და უკანონო შემოსავლის მიღება, ასევე მითვისება-გაფლანგვა.
- საქართველოს პროკურატურამ კეზერაშვილის ექსტრადიცია ორჯერ მოითხოვა, საფრანგეთისა და დიდი ბრიტანეთისგან, თუმცა არცერთი მოთხოვნა არ დაკმაყოფილდა.
- კეზერაშვილი „ნაციონალური მოძრაობის“ მთავრობაში თავდაცვის მინისტრის თანამდებობას 2006-2008 წლებში იკავებდა, შემდეგ კი საქართველო დატოვა.
- ნაციონალური მოძრაობის ყოფილი თავმჯდომარე ნიკა მელია დავით კეზერაშვილს დღემდე ადანაშაულებს ამ პარტიის არაფორმალურ მართვაში.
- კეზერაშვილმა ნიკა მელიას ბრალდებებს მისივე დაფუძნებული ტელეკომპანია "ფორმულის" ინტერვიუში უპასუხა, - თქვა, რომ "არასდროს ჩარეულა და არც ჩაერევა პარტიების დღის წესრიგის განსაზღვრაში", თუმცა დაეხმარება ყველას, ვისაც ბიძინა ივანიშვილის დამარცხება სურს.
- დავით კეზერაშვილი კვიპროსში ცხოვრობს და იქ ხშირად ხვდება ოპოზიციონერ პოლიტიკოსებს.
წყარო: რადიო თავისუფლება
