საპატრულო პოლიციამ თბილისში გააჩერა ავტომობილი სანომრე ნიშნებით "ВОР 333", რომელიც კრიმინალური ავტორიტეტ "საშა სევერნის" ეკუთვნის. უცნობია როგორ გადმოკვეთა სახელმწიფო საზღვარი კრიმინალურმა ავტორიტეტმა და რა  მიზნით იმყოფება ის საქართველოში.

მშრალ ხიდზე გადაღებულ ფოტოებზე ჩანს ქალბატონი, რომელიც პატრულს ესაუბრება, ის, ადვოკატი ხათუნა ხურცილავაა. ხურცილავას არ დაუმალავს, რომ მანქანაში მჯდომს იცნობს.

ხათუნა ხურცილავა ამტკიცებს, რომ ავტომობილში საქართველოს მოქალაქე, ბათუმელია, მეგრული გვარით,  მას ეს ნომრები აჩუქეს და არანაირი კავშირი არ აქვს რუს კანონიერ ქურდთან. ხურცილავა ამბობს, რომ მისი კლიენტი საქართველოში მცირე ბიზნესით არის დაკავებული და ეკლესიაში ცხოვრობს.

ანონიმური წყაროს ცნობით კანონიერი ქურდი საქართველოში აფხაზეთიდან შემოვიდა. ზუგდიდში მას ადვოკატი თამარ აბესაძე დახვდა, თბილისამდე ჩამოაცილა და ქალაქის ცენტრში დატოვა. საქართველოში ავტორიტეტი  ქართული პასპორტით სარგებლობდა. თამარ აბესაძე მასთან რაიმე კავშირს უარყოფს. 

ვებგვერდზე სადაც კანონიერი ქურდების შესახებ ინფორმაციის მოძიებაა შესაძლებელი , ვკითხულობთ, რომ "საშა სევერმა" კანონიერი ქურდის სტატუსი ჯერ კიდევ 1993 წელს მიიღო. მისი ე.წ. "ნათლია" კი,  ორი ქართველი - ციციშვილი, იგივე ციცკა და ბუხნიკაშვილი , იგივე პეწო იყვნენ.

მას 30 წლიანი  ქურდული "კარიერა" აქვს. კრიმინალურ სამყაროში კი, გათანაბრებული იყო ისეთ ავტორიტეტებთან როგორიც არის "დედ ხასანი" და "იაპონჩიკი".

გავრცელებული  ინფორმაციით, საშა სევერმა თბილისი დღეს დატოვა.

მომხდართს ოპერატიულად გამოეხმაურა შინაგან საქმეთა სამინისტრო.

„მედიაში გავრცელებულ ინფორმაციასთან დაკავშირებით, გვსურს განვაცხადოთ, რომ საპატრულო პოლიციის თანამშრომლის მიერ, მოხდა აღნიშნული სანომრე ნიშნით მოძრავი სატრანსპორტო საშუალების გაჩერება და მისი დაჯარიმება ადმინისტრაციულ სამართალდარღვევათა კოდექსის შესაბამისად.

სატრანსპორტო საშუალებას მართავდა საქართველოს მოქალაქე, რომელმაც საქართველოს საზღვარი აღნიშნული სატრანსპორტო საშუალებით გადმოკვეთა 2020 წელს.

საპატრულო პოლიციის თანამშრომლებმა შეაჩერეს ავტომანქანა და რეგისტრაციის წესების დარღვევისთვის ადმინისტრაციული სამართალდარღვევათა კოდექსის შესაბამისად დააჯარიმეს.

ხოლო, რაც შეეხება პირს, რომლის სახელს და გვარს ავრცელებს მედია, აღნიშნული პირი სატრანსპორტო საშუალებას არ მართავდა, არც მგზავრობდა და მას საქართველოს საზღვარი გადმოკვეთილი არ აქვს“, - აღნიშნულია გავრცელებულ ინფორმაციაში.