თბილისის მერიაში დედაქალაქის მთავრობის სხდომა გაიმართა. დღის წესრიგით გათვალისწინებული საკითხების განხილვამდე, დედაქალაქის მერმა კახა კალაძემ რამდენიმე განცხადება გააკეთა და აღნიშნა, რომ დაცვის საქალაქო სამსახურმა ვერის პარკის რეაბილიტაცია დაასრულა. დეტალური დიზაინის პროექტი მოქალაქეთა აქტიური ჩართულობით მომზადდა.

„ქალაქის ცენტრალურ ნაწილში მდებარე ისტორიული პარკი ერთ-ერთი უძველესი და მნიშვნელოვანი რეკრეაციული სივრცეა, რომელსაც XX საუკუნის დასაწყისიდან ჰქონდა, როგორც საუბნო, ისე საქალაქო მნიშვნელობა. დღესაც განკუთვნილია ყველა ასაკის ადამიანისთვის. პარკის განახლება საჭიროებდა სიღრმისეულ კვლევებსა და დეტალურ დიზაინის პროექტს, რომელიც მომზადდა მოქალაქეთა აქტიური ჩართულობით. სწორედ ამიტომ, ვერის პარკის რეაბილიტაცია იქცა თანამონაწილეობითი დაგეგმარების საუკეთესო პრეცედენტად“, - განაცხადა კახა კალაძემ.

მისივე განმარტებით, ვერის პარკი კულტურული მემკვიდრეობის ძეგლის სტატუსს ატარებს, რის გამოც მისი არსებითი გარდაქმნა ან შეცვლა არ განხორციელებულა.

„განსაკუთრებული აქცენტი გაკეთდა არსებული გეგმარებისა და ფუნქციების შენარჩუნებასა და გაუმჯობესებაზე, რათა ისტორიულ სივრცეს თანამედროვე სტანდარტების შესაბამისი ფუნქციები შესძენოდა. რეაბილიტაციის შედეგად, პარკში განახლდა ინფრასტრუქტურა და მოეწყო საბავშვო-სპორტული მოედნები, ძაღლების სასეირნო სივრცე, საფეხმავლო ბილიკები, შადრევანი, მოსასვენებელი პავილიონი, ბელვედერი, სასმელი წყლის შადრევანი და ადმინისტრაციული შენობა. სრულად შეიცვალა სარწყავი სისტემები, მოეწყო სანიაღვრე ქსელი, მიწისზედა კომუნიკაციები კი მიწისქვეშ განთავსდა“, - აღნიშნა კახა კალაძემ.

თბილისის მერის თქმით, განსაკუთრებული ყურადღება დაეთმო გამწვანების ნაწილს.

„არსებული მრავალწლოვანი ხეები შენარჩუნდა, დამატებით დაირგო ნერგები და დაიგო ბალახის საფარი. რეაბილიტაციის დასრულების შემდეგ თბილისს შეემატა განახლებული, უმაღლესი ხარისხის ინფრასტრუქტურისა და თანამედროვე საინჟინრო სისტემებით აღჭურვილი მრავალფუნქციური რეკრეაციული ზონა, რომელიც მორგებულია განსხვავებული ასაკისა და ინტერესის მქონე მოქალაქეებზე. რამდენიმე დღის წინ დავათვალიერე სამუშაოები, ულამაზესი პარკი გამოვიდა. ხვალ, 20:00 საათზე გვექნება პარკის გახსნა და თავად ნახავთ, რა სილამაზე გამოვიდა“, - განაცხადა კახა კალაძემ.

თბილისის მერმა ყურადღება გაამახვილა თბილისის ანძის განვითარების პროექტზეც და ეკონომიკისა და მდგრადი განვითარების სამინისტროს მხარდაჭერისთვის მადლობა გადუხადა.

„მთაწმინდაზე, სადაც მდებარეობს სატელევიზიო ანძა, ძალიან მაგარი პროექტი ხორციელდება. კერძოდ, მოეწყობა თანამედროვე ვიზიტორთა ცენტრი, სარესტორნო არეალითა და გადმოსახედებით. დიდი ხანია აღნიშნულ პროქტთან დაკავშირებით ვმუშაობთ. არაერთი შეხვედრა გაიმართა კულტურული მემკვიდრეობის დაცვის საბჭოსთან, როგორ უნდა განხორციელებულიყო სწორად, რომ შენარჩუნებულიყო მისი იერსახე. საბოლოო პროექტი, რაც მივიღეთ ულამაზესია. ჩვენი ქალაქისთვის მნიშვნელოვანი იქნება. გვყავს ინვესტორი კომპანია „კასს ჯგუფი“, რომელსაც ამ ტიპის პროექტების განხორციელების კარგი გამოცდილება აქვს. სამშენებლო ნებართვა გაცემულია. მადლობა ეკონომიკის სამინისტროსა და პირადად მინისტრს ჩართულობისა და მხარდაჭერისთვის. დაახლოებით, ორი წელი დასჭირდება პროექტის განხორციელებას“, - განაცხადა კახა კალაძემ.

გარდა ამისა, თბილისის მერმა აღნიშნა, რომ დედაქალაქში ორი ახალი საბაგიროს მშენებლობის წინასწარი ტექნიკურ-ეკონომიკური კვლევა დასრულებულია, რაც საერთაშორისო საკონსულტაციო კომპანია „სისტრას“ მიერ მომზადდა.

კახა კალაძის თქმით, საბაგიროს ახალი გზების მშენებლობა ქალაქისთვის სტრატეგიული მნიშვნელობისაა, რაც ამსუბუქებს საგზაო მოძრაობას და ამცირებს საცობებს.

„დედაქალაქში ტრანსპორტის განვითარების მიმართულებით მსხვილი პროექტების განხორციელებას განვაგრძობთ. ჩვენ მეტად საპასუხისმგებლო და რთული რეფორმა გვაქვს წამოწყებული, თუმცა, თქვენი, თბილისელების გვერდით დგომით, ყველაფერს ვაკეთებთ, რომ აღნიშნული მიმართულება მთლიანად მოწესრიგებული იყოს. გადავწყვიტეთ, რომ თბილისში ორი ახალი საბაგირო გზა მოვაწყოთ, ხოლო ერთ-ერთი ძველი საბაგიროს ნაცვლად, იმავე ხაზის ხელახალი მშენებლობა განვახორციელოთ.

საბაგირო გზების მშენებლობა ქალაქისთვის სტრატეგიული მნიშვნელობის პროექტებია. ეს ერთი მხრივ, ამსუბუქებს საგზაო მოძრაობას და ამცირებს საცობებს, მეორე მხრივ კი, უზრუნველყოფს სწრაფ, ეკოლოგიურ და ხელმისაწვდომ ტრანსპორტს მოსახლეობისთვის. ასეთი ინფრასტრუქტურული პროექტები ქალაქში ხელს უწყობს საბაგიროს საზოგადოებრივ ტრანსპორტად დამკვიდრებას, საგრძნობლად ამცირებს მგზავრობის დროს, ხელს უწყობს რთულად მისადგომი უბნების მომსახურებას. ასევე, უზრუნველყოფს მეტროსადგურებთან კავშირს, რაც სატრანსპორტო მისაწვდომობას ზრდის“, - აღნიშნა კახა კალაძემ.

მისივე ინფორმაციით, ახალი საბაგიროებიდან ერთი მეტროსადგურ „სარაჯიშვილისა“ და ზღვისუბნის, ხოლო მეორე მეტროსადგურ „ისნისა“ და ვაზისუბნის დამაკავშირებელი იქნება.

„მოეწყობა მეტროსადგურ „სარაჯიშვილისა“ და ზღვისუბნის დამაკავშირებელი საბაგირო გზა, რომელიც ზღვისუბანსა და ახალ პარკს მეტროსადგურ „სარაჯიშვილთან“ უმოკლესი გზით დააკავშირებს. 4-სადგურიანი საბაგირო დღეში, დაახლოებით, 22 000 მგზავრს მოემსახურება. იგეგმება ასევე, მეტროსადგურ „ისნისა“ და ვაზისუბნის დამაკავშირებელი საბაგირო გზის მშენებლობა, რომელიც ვაზისუბნისა და მეტრომშენის დასახლებებს მეტროსადგურ „ისანთან“ დააკავშირებს. აღნიშნული საბაგირო 5-სადგურიანი იქნება და დღეში, დაახლოებით, 35 000 მგზავრს მოემსახურება.

გარდა ამისა, დემონტაჟი ჩაუტარდება მეტროსადგურ „სამგორისა“ და ვაზისუბნის დამაკავშირებელ ძველ საბაგირო გზას, ხოლო მის ნაცვლად, ახალი საბაგირო გზა მოეწყობა. ორი ახალი საბაგიროს მშენებლობის წინასწარი ტექნიკურ-ეკონომიკური კვლევა დასრულებულია, რაც საერთაშორისო საკონსულტაციო კომპანია „სისტრას“ მიერ მომზადდა. აღნიშნული პროექტების განხორციელების დეტალებზე მუშაობა აქტიურ რეჟიმში მიმდინარეობს. უახლოეს მომავალში გამოვაცხადებთ ტენდერს მშენებლობაზე“, - განაცხადა დედაქალაქის მერმა.

მთავრობის დღევანდელ სხდომაზე ასევე აღინიშნა, რომ ბაგების დასახლებაში საერთაშორისო სტანდარტების საბავშვო ბაგა-ბაღი აშენდება. კახა კალაძემ შესაბამისი დავალება ვიცე-მერ გიორგი ტყემალაძეს მისცა.

მისი თქმით, პრობლემური საკითხების განხილვისას, გამოიკვეთა, რომ ბაგების დასახლებაში, რომელიც სწრაფი ტემპით იზრდება, საბავშვო ბაგა-ბაღი არ არსებობს.

„ბაგების დასახლება ძალიან იზრდება. როდესაც პრობლემურ საკითხებს განვიხილავდით, გამოიკვეთა ერთი პრობლემა, რომ იქ არ არსებობს საბავშვო ბაგა-ბაღი. მინდა, დავავალო ვიცე-მერს, გიორგი ტყემალაძეს, რომ დავიწყოთ ამ პროექტზე მუშაობა, რათა ბაგებში აშენდეს საერთაშორისო, ევროპული სტანდარტების საბავშვო ბაგა-ბაღი, რაც ძალიან მნიშვნელოვანი იქნება ვაკის რაიონისთვის და კონკრეტულად, ბაგებში მცხოვრები ოჯახებისთვის. მომავალი წლიდან დავიწყოთ აღნიშნული პროექტის განხორციელება“, - განაცხადა კახა კალაძემ.

დედაქალაქის მერმა ყურადღება გაამახვილა ბაგების დასახლებაში დაანონსებული საზოგადოებრივი მრავალფუნქციური ცენტრის მშენებლობის შესახებაც.

მისი თქმით, მნიშვნელოვანია, რომ ქალაქის ყველა რაიონში, მინიმუმ ერთი მრავალფუნქციური ცენტრი არსებობდეს.

„ბაგების დასახლებაში საზოგადოებრივი მრავალფუნქციური ცენტრის მშენებლობისთვის უკვე გამოყოფილია ტერიტორია, სადაც ეს მნიშვნელოვანი და ძალიან კარგი პროექტი განხორციელდება. ეს იქნება პირველი საზოგადოებრივი მრავალფუნქციური ცენტრი ღია საცურაო აუზით, რაც მისასალმებელია. ჩვენ გვინდა, რომ ყველა რაიონში, მინიმუმ ერთი ასეთი მრავალფუნქციური ცენტრი არსებობდეს საცურაო აუზებით, საფეხბურთო, საკალათბურთო მოედნებით, საჭიდაო დარბაზებით, სატრენაჟორო სივრცეებით, მედიათეკითა და კაფე-ბარებით“, - აღნიშნა კახა კალაძემ.

ამასთან, თბილისის მერმა განაცხადა, რომ ე.წ. კადეტთა კორპუსის სარეაბილიტაციო სამუშაოების დასრულების შემდეგ, 100-მდე ბენეფიციარს სრულიად განახლებული საცხოვრებელი ფართები გადაეცემა. სარეაბილიტაციო სამუშაოებს თბილისის განვითარების ფონდი ახორციელებს.

„კიდევ ერთი პროექტი, რომელზეც მინდა, ყურადღება გავამახვილო, თაბუკაშვილის ქუჩის N46-ში მდებარე ე.წ. კადეტთა კორპუსია, რომლის სარეაბილიტაციო სამუშაოებს თბილისის განვითარების ფონდი ახორციელებს. ამ ეტაპზე სრულდება შენობის ფასადისა და ეზოს კეთილმოწყობის სამუშაოები, ხოლო შიდა ფართების სრული რეაბილიტაცია და რემონტი წლის ბოლოს დასრულდება. სარეაბილიტაციო სამუშაოების დასრულების შემდეგ 100-მდე ბენეფიციარს გადაეცემა სრულიად განახლებული, რეაბილიტირებული საცხოვრებელი ფართები. აქ იყო უმძიმესი მდგომარეობა. ეს არის კულტურული მემკვიდრეობის სტატუსის მქონე ძეგლი, რომელიც კატასტროფულ მდგომარეობაში იყო. აღნიშნულ შენობაში გაუსაძლის პირობებში უწევდათ ცხოვრება ოჯახებს“, - განაცხადა კახა კალაძემ.

მისივე თქმით, ე.წ. კადეტთა კორპუსის სარეაბილიტაციო სამუშაოების დასრულების შემდეგ დედაქალაქს შეემატება კიდევ ერთი შენობა, რომელიც ასევე გამორჩეული ისტორიის მატარებელია.

„კულტურული მემკვიდრეობის ძეგლების განახლება-რეაბილიტაცია ჩვენთვის ერთ-ერთი პრიორიტეტულია. ეს არის ძალიან დიდი სიმდიდრე და სილამაზე, რომელიც ჩვენს ქალაქს გააჩნია. ეს მრავალფეროვნება კიდევ უფრო ალამაზებს და მომხიბვლელს ხდის ჩვენს ულამაზეს თბილისს. აღნიშნული მიმართულებით მუშაობა ერთ-ერთი პრიორიტეტი იქნება მომდევნო ოთხი წლის განმავლობაში. ჩვენ უკვე გვაქვს განხორციელებული პროექტები - წინამძღვრიშვილის ქუჩაზე რამდენიმე დღის წინ დავამთავრეთ სამუშაოები, განვაახლეთ გუდიაშვილის და ორბელიანის მოედნები, ასევე, მიმდებარე ქუჩები. ეს პროცესი გაგრძელდება“, - განაცხადა კახა კალაძემ.