თბილისის მერიაში მუნიციპალიტეტის მთავრობის სხდომა გაიმართა. დღის წესრიგით გათვალისწინებული საკითხების განხილვამდე, დედაქალაქის მერმა კახა კალაძემ რამდენიმე განცხადება გააკეთა და არაბთა გაერთიანებულ საამიროებში ვიზიტი კიდევ ერთხელ შეაფასა.

მისი თქმით, იმ მასშტაბის ინვესტიცია, რომლის განხორციელებასაც დეველოპერული კომპანია „ემაარ ჯგუფი“ საქართველოში გეგმავს, ქვეყნის დამოუკიდებლობის ისტორიაში ერთ კონკრეტულ პროექტში არასდროს ყოფილა.

„ორი დღის წინ დასრულდა პრემიერ-მინისტრის ოფიციალური, ძალიან მნიშვნელოვანი ვიზიტი არაბთა გაერთიანებულ საამიროებში, რომლის ფარგლებში, გვქონდა სხვადასხვა ტიპის შეხვედრები. შეხვედრა გაიმართა არაბთა გაერთიანებული საამიროების პრეზიდენტთან, იყო ბიზნესშეხვედრებიც. მინდა, კიდევ ერთხელ ხაზი გავუსვა ჩვენი ქვეყნისთვის და ორმხრივი თანამშრომლობისთვის ძალიან მნიშვნელოვან მემორანდუმს, რომელიც ვიზიტის ფარგლებში გაფორმდა - საქართველოში შემოდის მსოფლიოში ერთ-ერთი უძლიერესი დეველოპერული კომპანია „ემაარ ჯგუფი“ (Emaar Group), რომელიც მუშაობს მსოფლიოს სხვადასხვა ქვეყანაში. ის პროექტებს თბილისსა და აჭარაში განახორციელებს. მაგალითად, დუბაიში, აბუ დაბიში ყველა ძირითადი შენობა, ცათამბჯენები აღნიშნული კომპანიის განხორციელებული პროექტია“, - განაცხადა კახა კალაძემ.

მისივე თქმით, აღნიშნული კომპანია საქართველოში, დაახლოებით, 6 მილიარდი აშშ დოლარის მოცულობის უცხოურ ინვესტიციას განახორციელებს სხვადასხვა დეველოპერულ პროექტში.

„ინვესტიციები განხორციელდება თბილისსა და აჭარაში, რაც ძალიან მნიშვნელოვანია ქვეყნის ეკონომიკური განვითარების თვალსაზრისით, ასევე, იმით, რომ შეიქმნება მაღალანაზღაურებადი სამუშაო ადგილები. აღნიშნული პროექტების განხორციელებაში ჩართული იქნებიან ქართული კომპანიები. პირდაპირ შემიძლია ვთქვა, რომ საქართველოს დამოუკიდებლობის ისტორიაში ამ მასშტაბის და ამხელა ინვესტიცია კონკრეტულად ერთ პროექტში არასდროს განხორციელებულა, რაც, რა თქმა უნდა, ძალიან მიხარია, როგორც ამ ქვეყნის მოქალაქეს, ისე, როგორც დედაქალაქის მერს“, - განაცხადა კახა კალაძემ.

დედაქალაქის მერმა ინფრასტრუქტურულ პროექტებზეც გაამახვილა ყურადღება და აღნიშნა, რომ „თბილისის განვითარების ფონდმა“ ფიროსმანის ქუჩა N29-ში არსებული შენობის რეაბილიტაცია დაიწყო.

მისი თქმით, იქიდან გამომდინარე, რომ შენობა ისტორიული ძეგლია, ყველა დეტალს განსაკუთრებული ყურადღება მიექცევა და თითოეული ორნამენტი შენარჩუნებული იქნება.

„თბილისის განვითარების ფონდმა“ ჩუღურეთის რაიონში, ფიროსმანის ქუჩა N29-ში არსებული შენობა-ნაგებობის რეაბილიტაცია ხორციელდება. აღნიშნულ მისამართზე ქართველი მხატვრის, ნიკო ფიროსმანის სახელმწიფო მუზეუმიც მდებარეობს. შენობა, რომლის ფასადმა ჩვენამდე უცვლელად მოაღწია, აგებულია მე-19 საუკუნის ბოლოს. არქიტექტურული თვალსაზრისით, ნაგებობა ეკლექტიკური სტილის მატარებელია და მხატვრული გამომსახველობითა და პროპორციებით, ქუჩას ორგანულად ერწყმის.

პროექტის მოთხოვნებიდან გამომდინარე, განხორციელდება: საძირკვლისა და კედლების აღდგენა-გამაგრების სამუშაოები; ფასადების აღდგენა-მოწესრიგება მათი პირვანდელი სახით; ყველა დეტალს განსაკუთრებული ყურადღება მიექცევა, თითოეული ორნამენტი შენარჩუნებული იქნება. ეზოს ნაწილში არსებული ამორტიზებული და დაზიანებული ხის დეკორატიული ელემენტებისა და შუშაბანდების პირვანდელი სახით აღდგენა მოხდება. ასევე, იგეგმება კომუნიკაციების, წყლისა და წყალარინების ქსელების, ელექტროსადენების მოწესრიგება, როგორც მიწის ქვეშ, ისე მიწის ზემოთ“, - აღნიშნა თბილისის მერმა.

კახა კალაძემ სხდომის მიმდინარეობისას წარმოადგინა შენობა-ნაგებობის ამსახველი ვიზუალური მასალა. მისივე თქმით, სამუშაოების შესრულებას 18 თვე დასჭირდება.

„რეაბილიტაციის დასრულების შემდეგ 53 ბენეფიციარს საცხოვრებელი პირობები საგრძნობლად გაუუმჯობესდება და მათი უძრავი ქონების ღირებულება კიდევ უფრო გაიზრდება. ძალიან მიხარია ამ ოჯახების სიხარული და ბედნიერება“, - განაცხადა დედაქალაქის მერმა.

მთავრობის დღევანდელ სხდომაზე კახა კალაძემ შპს „თბილსერვის ჯგუფის“ წარმომადგენლებს მათ ბალანსზე არსებული შეზღუდული შესაძლებლობის მქონე პირებისთვის განკუთვნილი სპეციალიზებული ლიფტების რეაბილიტაცია დაავალა.

მისივე თქმით, 12 სპეციალიზებული ლიფტიდან, ამ დროისთვის, რვა ერთეული ვანდალურად არის დაზიანებული.

„დედაქალაქში, სხვადასხვა ლოკაციაზე დაყენებული გვაქვს 12 სპეციალიზებული ლიფტი, რომელიც შშმ პირებს ემსახურება. ამ 12 ლიფტიდან რვა ერთეული ვანდალურად არის დაზიანებული. რეაბილიტირდება აღნიშნული ლიფტები და რამდენიმე დღეში მათ კვლავ მიზნობრივად აზიანებენ. ჩვენ გვქონდა შეხვედრა „თბილსერვისის“ ხელმძღვანელობასთან. მინდა, კიდევ ერთხელ დავავალო მათ, რომ ქალაქში ყველა მსგავსი ლიფტი იყოს განახლებული და მოწესრიგებული. 12-ვე ლიფტი უნდა ფუნქციონირებდეს გამართულად. მოვიფიქროთ, შეიძლება, სამეთვალყურეო კამერები დავაყენოთ, რომ მისი დაზიანება ვერ შეძლონ“, - განაცხადა კახა კალაძემ.

დედაქალაქის მერმა აქვე მოსახლეობას სთხოვა, არსებულ ინფრასტრუქტურას მაქსიმალურად გაუფრთხილდნენ.

დღევანდელ სხდომაზე ასევე აღინიშნა, რომ საბურთალოს რაიონის გამგეობამ დიდ დიღომში კიდევ ერთი დასასვენებელი სივრცის მოწყობა დაასრულა. პროექტის შედეგად, რომელიც 7 000 კვ.მ ფართობზე განხორციელდა, აღნიშნული ტერიტორია მთლიანად განახლდა.

„დიდ დიღომში, მე-4 მიკრორაიონში, მე-6 კორპუსის მიმდებარედ დასასვენებელი სივრცის რეაბილიტაცია დასრულდა. პროექტის ფარგლებში, განახლდა 7 000 კვ.მ ფართობის ტერიტორია და დამონტაჟდა ყველა შესაბამისი საპარკო ინვენტარი. მოეწყო სატრენაჟორო და საბავშვო-გასართობი ზონები, განათებისა და სარწყავი სისტემები; დაირგო ხე-მცენარეები. მთლიანად განახლებულია აღნიშნული ტერიტორია და შექმნილია სასიამოვნო გარემო. ჩვენ ზოგადად მწვანე სივრცეების შექმნას დიდ ყურადღებას ვუთმობთ. ეს ეხება არა მხოლოდ დიდ პარკებს, არამედ ყველა საუბნო სკვერს. სადაც შესაძლებელია მსგავსი სივრცეების შექმნა, ჩვენი გამგეობები და საქალაქო სამსახურები ყველგან შესაბამის პროექტს ახორციელებენ. ასევე, დიდ ყურადღებას ვუთმობთ სპორტული სივრცეების მოწყობას, რომ ხელი შევუწყოთ ჯანსაღი ცხოვრების წესის პოპულარიზაციას. თბილისს ამ მხრივ დიდი შესაძლებლობები გააჩნია. ჩვენ არ გავჩერდებით და მსგავსი ტიპის სამუშაოების წარმოებას მომავალშიც გავაგრძელებთ“, - აღნიშნა კახა კალაძემ.

29 იანვარი 2025