თბილისის მერიაში მუნიციპალიტეტის მთავრობის მორიგი სხდომა გაიმართა. დღის წესრიგით გათვალისწინებული საკითხების განხილვამდე, დედაქალაქის მერმა კახა კალაძემ რამდენიმე განცხადება გააკეთა და აღნიშნა, რომ 35 წლის შემდეგ, დედაქალაქში ტრამვაი დაბრუნდება.

მისი თქმით, ქალაქში პირველად აშენდება თანამედროვე, ევროპული სტანდარტების ტრამვაის ხაზი, რომელიც დიდი დიღმის დასახლებას მეტროსადგურ „დიდუბესთან“ დააკავშირებს.

„საქმე ეხება თბილისისთვის ძალიან მნიშვნელოვან პროექტს. საქართველოს დამოუკიდებლობის ისტორიაში, პირველად განხორციელდება ტრამვაის პროექტი. დღეს ჩვენ ვაცხადებთ ტენდერს ტრამვაის ხაზის პროექტისა და სამშენებლო სამუშაოების შესყიდვაზე. მანამდე გამოცხადებული გვქონდა ბაზრის კვლევაზე ტენდერი. გვაქვს სრულყოფილი ინფორმაცია აღნიშნულთან დაკავშირებით, თუ რა უნდა გაკეთდეს, რომელ მონაკვეთზე უნდა განხორციელდეს პროექტი. დიდი დიღმის მზარდი მოსახლეობის გათვალისწინებით, საჭიროა გადაადგილების ალტერნატიული საშუალებების შექმნა. ამ შემთხვევაში, ყველაზე ოპტიმალური არის ტრამვაი. იგი, მისი გაბარიტებიდან გამომდინარე, მიწისზედა საზოგადოებრივი ტრანსპორტის სახეობებს შორის ყველაზე მეტად გამტარუნარიანია. იგი ეკოლოგიურად სუფთა ტრანსპორტია და გრძელვადიან პერიოდში სხვა მიწისზედა საზოგადოებრივ ტრანსპორტის სახეობებს შორის გაცილებით ხარჯთეფექტურია“, - განაცხადა მერმა.

მისივე თქმით, იმის გათვალისწინებით, რომ დიდუბის მეტროსადგური არა მხოლოდ დედაქალაქის, არამედ საქალაქთაშორისო სამგზავრო ტრანსპორტისთვისაც საკვანძო სადგურია, დიდი დიღმიდან აღნიშნული კავშირის შექმნა სტრატეგიულად მნიშვნელოვანია.

რაც შეეხება უშუალოდ ტრამვაის ხაზს, მერის ინფორმაციით, ის 7,5-კილომეტრიანი იქნება და 11 გაჩერებას მოიცავს.

„შედეგად, ტრამვაი დიღმის დასახლებაში გაზრდილი მგზავრთნაკადის უსაფრთხო, კომფორტულ და სწრაფ გადაადგილებას უზრუნველყოფს, შეამსუბუქებს ავტობუსებსა და მიკროავტობუსებზე დატვირთვას, განტვირთავს საცობებს, გააუმჯობესებს ეკოლოგიურ მდგომარეობას. ტრამვაი ინტეგრირდება საზოგადოებრივი ტრანსპორტის არსებულ ქსელში. შეიქმნება ერთიანი, მოქნილი, კომფორტული და მდგრადი სატრანსპორტო ქსელი, რომელიც თითოეული მოქალაქის საჭიროებებს მოერგება“, - განაცხადა კახა კალაძემ.

მთავრობის დღევანდელ სხდომაზე თბილისის მერმა აღნიშნა, რომ დასრულდა საფეხბურთო ცენტრ „ავაზას“ მშენებლობა, რომელიც კერძო მესაკუთრეს ჰქონდა გადაცემული.

„ავაზას“ ისტორიული სტადიონი გადაცემული იყო კერძო საკუთრებაში და გარკვეული დროის შემდეგ მას ეხსნებოდა ყველანაირი ვალდებულება. მფლობელს შეეძლო, იქ სხვადასხვა პროექტი განეხორციელებინა, თუნდაც საცხოვრებელი კორპუსების. მფლობელებთან მოლაპარაკებების შედეგად, მოხერხდა შეთანხმება, განხორციელდა ადგილმონაცველობა და „ავაზას“ სტადიონი დაუბრუნდა მუნიციპალიტეტს“, - აღნიშნა კახა კალაძემ.

მისი თქმით, ფეხბურთის ფედერაციას თბილისის მერიისგან „ავაზას“ სპორტული კომპლექსი საფეხბურთო ინფრასტრუქტურის მოწყობის ვალდებულებით გადაეცა.

„დღეს ქალაქს უკვე აქვს მოწესრიგებული და განახლებული „ავაზას“ საფეხბურთო სკოლა. აღნიშნული პროექტის განსახორციელებლად გამოყენებული იქნა უეფა-ს და ფიფა-ს გრანტები. კომპლექსის ტერიტორიაზე მოეწყო ახალი სტანდარტული მოედანი ტრიბუნითა და განათებით, მინი მოედანი ტრიბუნითა და განათებით და გასახდელი კორპუსი. ახალი ინფრასტრუქტურის გამოყენებას უფასოდ შეძლებენ ბავშვთა ადგილობრივი საფეხბურთო სკოლები და გოგონათა გუნდები“, - განაცხადა დედაქალაქის მერმა.

მან თანამშრომლობისთვის და გაწეული შრომისთვის მადლობა გადაუხადა ფეხბურთის ფედერაციის პრეზიდენტ ლევან კობიაშვილს, ვიცე-პრეზიდენტ ალექსანდრე იაშვილსა და გენერალურ მდივან დავით მუჯირს, ასევე, სხვა ფედერაციის სხვა თანამშომლებს.

„ძალიან მნიშვნელოვანია ასეთი პროექტების განხორციელება. ეს არ არის პირველი პროექტი და ძალიან კარგი მაგალითი გვაქვს იმისა, თუ როგორ შეიძლება ორი უწყების თანამშრომლობით გაკეთდეს ქალაქისთვის სასიკეთო და მნიშვნელოვანი სპორტული ინფრასტრუქტურული პროექტები. რა თქმა უნდა, „ავაზას“ სტადიონი არ იქნება ბოლო პროექტი. ჩვენ გვაქვს საკმაოდ ამბიციური გეგმები და მომდევნო წლების განმავლობაში საკმაოდ კარგი პროექტების განხორციელებას ვგეგმავთ“, - განაცხადა კახა კალაძემ.

კიდევ ერთი სპორტული სივრცე სამგორის რაიონს შეემატება. პროექტი სოფელ დიდ ლილოში, არჩილ მეფის ქ. N5-ში განხორციელდება და, დაახლოებით, ერთ ჰექტარ ფართობზე, საფეხბურთო მოედნისა და პადელის კორტის მშენებლობას მოიცავს.

„ხელოვნურსაფარიან საფეხბურთო მოედანს ექნება მაყურებელთა ტრიბუნა, რომელიც 120 მაყურებელზეა გათვლილი. ადგილები გათვალისწინებული იქნება შშმ პირთათვისაც. აღნიშნულ ტერიტორიაზე ასევე აშენდება გასახდელი საშხაპეებით. შენობა აღიჭურვება შესაბამისი ინვენტარით. რაც შეეხება პადელის მოედანს, იგი 200 კვ.მ ფართობზე განთავსდება. ტერიტორიაზე გათვალისწინებულია სატრენაჟორო სივრცისა და სარბენი ბილიკის მოწყობაც, დანარჩენი სივრცე კი რეკრეაციას დაეთმობა“, - განაცხადა მერმა.

მისივე ინფორმაციით, სამუშაოები მიმდინარე წელს დაიწყება და 2026 წლის ნოემბრის ბოლოს დასრულდება.

დედაქალაქის მერმა ასევე აღნიშნა, რომ ნაძალადევის რაიონში ორი რეკრეაციული სივრცე მოეწყობა. შესაბამისი სამუშაოები ლოტკინის დასახლებაში, ხუდადოვის ქ. N102-თან განხორციელდება. ინფრასტრუქტურული და გამწვანების სამუშაოები ნახევარ ჰექტარ ფართობ ტერიტორიაზე შესრულდება.

„მოეწყობა სპორტული მოედანი, დამონტაჟდება საბავშვო-გასართობი ატრაქციონები, მოსასვენებელი სივრცეები, ტრენაჟორები და ვიდეომონიტორინგის კამერები. ჩატარდება გამწვანების სამუშაოები და დაირგვება სხვადასხვა სახეობის ხე-მცენარე. ტენდერი უახლოეს დღეებში გამოცხადდება, რომლის დასრულებისთანავე გამარჯვებული კომპანია სამუშაოებს დაიწყებს. პროექტის განსახორციელებლად ადგილობრივი ბიუჯეტიდან 1 800 000 ლარი გამოიყოფა“, - განაცხადა კახა კალაძემ.

თბილისის მერის ინფორმაციით, კიდევ ერთი სკვერი ზღვისუბნის დასახლებაში, მე-3 მიკრორაიონში, მე-5 კვარტლის N25 კორპუსის მიმდებარედ მოეწყობა.

„აღნიშნული ტერიტორიაც სრულად მოწესრიგდება. ჩატარდება გამწვანების სამუშაოები, მოეწყობა სარწყავი სისტემა, განათების ქსელი, დამონტაჟდება საბავშვო ატრაქციონები და მოსასვენებელი სივრცეები. რა თქმა უნდა, განთავსდება სკვერისთვის საჭირო ყველა სხვა ინფრაქტრუქტურა. არაფერი უხდება ჩვენს დედაქალაქს ისე, როგორც მწვანე სივრცეები. შესაბამისად, მომდევნო წლების განმავლობაში ბევრ საინტერესო პროექტს შევთავაზებთ დედაქალაქის მოსახლეობას“, - აღნიშნა დედაქალაქის მერმა.

მისი თქმით, პროექტის განსახორციელებლად ადგილობრივი ბიუჯეტიდან, დაახლოებით, 1 200 000 ლარი დაიხარჯება.