თბილისის მერიაში მუნიციპალიტეტის მთავრობის სხდომა გაიმართა. დღის წესრიგით გათვალისწინებული საკითხების განხილვამდე, დედაქალაქის მერმა კახა კალაძემ რამდენიმე განცხადება გააკეთა და აღნიშნა, რომ თბილისის მერია, სხვა არაერთ პროგრამასთან ერთად, „სახსრების ენდოპროთეზირების“ პროგრამას ახორციელებს, რისთვისაც მიმდინარე წლის ბიუჯეტში 2 000 000 ლარია გათვალისწინებული.

მისი თქმით, პროგრამის მიზანია, მუხლისა და მენჯ-ბარძაყის ენდოპროთეზირების საჭიროების მქონე მოქალაქეებისთვის ოპერაციული მკურნალობის ხელმისაწვდომობის უზრუნველყოფა.

„აღნიშნული მომსახურების დაფინანსება საარჩევნო დაპირება იყო. შესაბამისად, „სახსრების ენდოპროთეზირების“ პროგრამას წელსაც ვახორციელებთ და გათვალისწინებულია ბიუჯეტში. გვინდა, მოქალაქეებს, ვისაც ეს პრობლემა აწუხებს, დავეხმაროთ მის მოგვარებაში, ჩვენი ფინანსური მხადრაჭერით“, - განაცხადა კახა კალაძემ.

მისივე თქმით, თბილისის მერია მომსახურების მისაღებად საგარანტიო წერილს გასცემს და დაფინანსების თანხა შეადგენს არაუმეტეს 6 000 ლარს, ხოლო პაციენტის თანაგადახდა ფაქტიური ხარჯის გათვალისწინებით განისაზღვრება.

ამასთან, კახა კალაძის ინფორმაციით, მერია არ ზღუდავს მოქალაქეებს და მათ სამედიცინო დაწესებულებისა და პროთეზის სახეობებს შორის თავისუფალი არჩევის საშუალებას აძლევს.

„ჯანდაცვისა და სოციალური მომსახურების საქალაქო სამსახურის პროგრამით სარგებლობა შეუძლიათ ბოლო ორი წლის განმავლობაში უწყვეტად და ამავდროულად, პროგრამაში ჩართვის დროისთვის თბილისის მუნიციპალიტეტში რეგისტრირებულ საქართველოს მოქალაქეებს, რომლებსაც აღნიშნული მომსახურება საყოველთაო ჯანდაცვის სახელმწიფო პროგრამის ფარგლებში არ უფინანსდებათ“, - განაცხადა კახა კალაძემ.

მისივე თქმით, მოქალაქემ ან მისმა კანონიერმა წარმომადგენელმა, მომსახურების მისაღებად სამედიცინო დაწესებულებას უნდა მიმართოს, რომელიც საჭირო საბუთებს სპეციალურ ელექტრონულ მოდულში ატვირთავს, ხოლო თუ მოქალაქე კერძო დაზღვევით სარგებლობს, მან ან მისმა წარმომადგენელმა, კერძო სადაზღვევო კომპანიიდან შესაბამისი ცნობა მერიაში უნდა შემოიტანოს.

„ჩვენთვის მთავარი არის ადამიანი, მისი ჯანმრთელობა, მოძრაობის თავისუფლება და ღირსეული ცხოვრება. როცა ადამიანს გადაადგილების შესაძლებლობას უბრუნებ, რეალურად მას ცხოვრების ხარისხს უბრუნებ და ყველანაირად ეხმარები, რადგან ჯანმრთელობას ეს პრობლემა გადაადგილებას ხელს უშლის. ჩვენ უყველას დავეხმარებით და ხელს შევუწყობთ, ვისაც ამის საჭიროება აქვს“, - განაცხადა კახა კალაძემ.

მთავრობის დღევანდელ სხდომაზე აღინიშნა, რომ თბილისის მერიის ეკონომიკური განვითარების საქალაქო სამსახური აცხადებს „მიკრო და მცირე ბიზნესის ხელშეწყობის“ პროგრამაში მონაწილეობისთვის განაცხადების მიღებას.

მერის განმარტებით, გასულ წელს დაფინანსების ზედა ზღვარი 20 000 ლარი იყო, წელს მეწარმეებს უკვე 50 000 ლარამდე თანხის მიღება შეუძლიათ.

„პროგრამა, რომელიც 2025 წელს პირველად ამოქმედდა, მიმდინარე წელს კიდევ უფრო მასშტაბური გახდა — გაიზარდა როგორც საერთო ბიუჯეტი, ისე თითოეული მეწარმისთვის გათვალისწინებული დაფინანსების მაქსიმალური ოდენობა. განსაკუთრებული აქცენტი კეთდება პროექტებზე, რომლებიც გულისხმობს პროდუქციის დამუშავებას, დამატებითი ღირებულების შექმნას და ხარისხის გაუმჯობესებას“, - განაცხადა კახა კალაძემ.

მისივე თქმით, პროგრამაში მონაწილეობა შეუძლია თბილისში რეგისტრირებულ ყველა მოქმედ მიკრო და მცირე მეწარმეს, რომელიც ბაზარზე მინიმუმ ორი წელია უწყვეტად ოპერირებს.

„უპირატესობა მიენიჭებათ იმ კანდიდატებს, რომლებიც წარმოადგენენ რეალურ, განვითარებაზე ორიენტირებულ ბიზნესგეგმებს. პროგრამის ფარგლებში, მეწარმეებს შესაძლებლობა აქვთ, მათი საქმიანობის განვითარებისთვის საჭირო აღჭურვილობა ტექნოლოგიები და დანადგარები შეიძინონ“, - აღნიშნა კახა კალაძემ.

თბილისის მერის თქმით, თანადაფინანსებას განსაზღვრული პირობები აქვს, დეტალური ინფორმაცია და განაცხადის პროცედურები კი ხელმისაწვდომი იქნება თბილისის მერიის ოფიციალურ ვებგვერდზე.

„მერიის მხრიდან თანადაფინანსების პირობები შემდეგნაირად განისაზღვრა: ⁠5 000 ლარამდე — 90%; ⁠5 001-დან 20 000 ლარამდე — 85%; 20 001 ლარიდან - 30 000 ლარამდე — 80%; ⁠30 001-დან 70%“, - განაცხადა კახა კალაძემ.

გარდა ამისა, თბილისის მერმა ყურადღება რეკრეაციული სივრცეების მოწესრიგებაზეც გაამახვილა. კერძოდ, აღინიშნა, რომ თბილისის მერიის გარემოს დაცვის საქალაქო სამსახურმა ვაზისუბანში, 3 400 კვ.მ ფართობზე რეკრეაციული სივრცის განახლება დაიწყო.

მისი განცხადებით, საუბარია ვაზისუბნის დასახლების მე-3 მიკრორაიონში, ჯუმბერ ლეჟავასა და ბიძინა ჩოლოყაშვილის ქუჩებს შორის მდებარე სკვერის სრულად განახლებაზე, სადაც ამჟამად ვითარება კრიტიკულია.  

„ყურადღების მიღმა არ გვრჩება რეკრეაციისა და მწვანე სივრცეების მოვლა-პატრონობის საკითხი. ბოლო წლების განმავლობაში, ამ მიმართულებით უკეთესობისკენ რადიკალურად შეიცვალა ჩვენი ქალაქი და ჩვენი დამოკიდებულებაც - გაჩნდა ბევრი რეკრეაციული არეალი, მოწესრიგებული პარკები და სკვერები, რაშიც აქტიურად ჩართულები არიან მუნიციპალიტეტის შესაბამისი სამსახურები და რაიონული გამგეობები. ბევრ საინტერესო პროექტს ვახორციელებთ ჩვენი ქალაქისთვის და ეს ტენდენცია, მიდგომა და დამოკიდებულება იქნება შენარჩუნებული მომავალშიც.   გარემოს დაცვის საქალაქო სამსახურმა სკვერის სარეაბილიტაციო სამუშაოები ამჯერად ვაზისუბანში, 3 400 კვ.მ ფართობზე დაიწყო. საუბარია აღნიშნული დასახლების მე-3 მიკრორაიონში, ჯუმბერ ლეჟავასა და ბიძინა ჩოლოყაშვილის ქუჩებს შორის მდებარე სკვერის სრულად განახლებაზე“, - განაცხადა თბილისის მერმა.

მისივე თქმით, პროექტის ფარგლებში მოეწყობა საფეხმავლო ბილიკები, საბავშვო და სპორტული სივრცეები; შეიცვლება ამორტიზებული საბაღო ინვენტარი; დამონტაჟდება გარე განათების თანამედროვე სისტემები და მოეწყობა ავტომატური სარწყავი ქსელი. ასევე, დაირგვება ხე-მცენარეები და დაიგება ბალახი.

კახა კალაძის განცხადებით, კეთილმოწყობის სამუშაოები დაიწყო სამგორის რაიონში, ე.წ. ალექსეევკის დასახლებაში, ჟვანიასა და ბარდაველიძის ქუჩებზეც, სადაც კომპანია „ჯორჯიან უოთერ ენდ ფაუერმა“ გარკვეული სამუშაოები უკვე ჩაატარა, ახლა კი მიწის დამუშავება მიმდინარეობს.

„კომპანია „ჯორჯიან უოთერ ენდ ფაუერმა“ ტერიტორიაზე უკვე ახალი აბონენტები დააერთა, რის შემდეგაც დაიწყო საგზაო ინფრასტრუქტურის განახლება. ამ ეტაპზე, მიმდინარეობს მიწის დამუშავების სამუშაოები, რაც წარმოადგენს პროექტის საწყის ფაზას. შემდეგ ეტაპზე დაგეგმილია ასფალტის ორფენიანი საფარის დაგება და ბორდიურის მოწყობა“, - განაცხადა კახა კალაძემ.

ინფრასტრუქტურული პროექტი ხორციელდება გლდანის რაიონში, მუხიანის დასახლებაშიც, რომლის ფარგლებში წყალარინების ქსელის პრობლემა მოუგვარდება კიდევ ორი - კალაუბნისა და მუხის ქუჩების მცხოვრებლებს.

კახა კალაძის განცხადებით, წყალარინების ქსელის მოწყობა დაგეგმილია ამავე დასახლებაში, გომბორისა და ერთობის ქუჩებზეც.

„სამუშაოების შედეგად, წყალარინების ქსელი, რომელიც აღნიშნულ ქუჩებზე ამ დრომდე არ არსებობდა, 3 600-ზე მეტ გრძივ მეტრზე მოეწყობა. ადგილობრივი ბიუჯეტიდან პროექტისთვის ორ მილიონ ლარზე მეტი დაიხარჯება“, - განაცხადა კახა კალაძემ.

დედაქალაქის მერმა თანამშრომლიბისთვის მადლობა გადაუხადა შესაბამის პროვაიდერ კომპანიებს.

„გლდანის რაიონის გამგეობა მუხიანის აგარაკებზე სამუშაოებს აქტიურად აწარმოებს. აქამდე საგზაო ინფრასტრუქტურა იყო მოშლილი, მიწისქვეშა კომუნიკაციები არ არსებობდა, შესაბამისად მოქალაქეებს საზოგადოებრივი ტრანსპორტიც ვერ ემსახურებოდა. წლების წინ აღნიშნული პროექტის განხორციელება დავიწყეთ. ხდება დაქსელვა - კომუნიკაციებით უზრუნველყოფა. მადლობა პროვაიდერ კომპანიებს თანამშრომლობისთვის“, - აღნიშნა კახა კალაძემ.

დედაქალაქის მერმა დღევანდელ სხდომაზე სატრანსპორტო სისტემის მოწესრიგებაზეც გაამახვილა ყურადღება და განაცხადა, რომ N304 მარშრუტზე 16 მაისიდან 18-მეტრიანი ავტობუსები იმოძრავებენ.

მისი თქმით, აღნიშნული ცვლილების შედეგად, მარშრუტზე შემცირდება არსებული ინტერვალი, რითაც ორჯერ მეტი მგზავრის გადაყვანა გახდება შესაძლებელი.

„სატრანსპორტო მომსახურების გაუმჯობესების მიზნით, თბილისის ტრანსპორტისა და ურბანული განვითარების სააგენტო, მოქალაქეთა თხოვნის გათვალისწინებით, განაგრძობს მუნიციპალური ავტობუსების მარშრუტების ცვლილებას. ამჯერად, ცვლილება შეგვაქვს ვაჟა-ფშაველას გამზირისა და ქავთარაძის ქუჩის გავლით, თბილისის სახელმწიფო უნივერსიტეტის ე.წ. მაღლივი კორპუსის მიმართულებით მოძრავი ავტობუსის - N304 მარშრუტში. აღნიშნულ მარშრუტზე 16 მაისიდან 12-მეტრიანი ავტობუსები ჩანაცვლდება 18-მეტრიანი ავტობუსებით. შედეგად, მარშრუტზე შემცირდება არსებული ინტერვალი, რაც ორჯერ მეტი მგზავრის გადაყვანის შესაძლებლობას მოგვცემს. გამოთავისუფლებულ ავტობუსებს, ინტერვალის შემცირების მიზნით, სხვა მარშრუტებზე გამოვიყენებთ“, - განაცხადა დედაქალაქის მერმა.

მისი თქმით, მუნიციპალური ტრანსპორტით მომსახურების გაუმჯობესების მიზნით, სამომავლოდ დაგეგმილია დამატებით 200 ერთეული ავტობუსის შესყიდვა და ახალი ავტობუსების მარშრუტებზე გასვლის პარალელურად, გამოთავისუფლებული რესურსი ყველა პრიორიტეტულ მიმართულებაზე გადანაწილდება.