კახა კალაძე მიხეილ მესხის სტადიონზე ევროპის ჩემპიონატის ღია ჩვენებისთვის მოსამზადებელ სამუშაოებს გაეცნო

თარიღი:

თბილისის მერი კახა კალაძე მიხეილ მესხის სახელობის სტადიონზე ევროპის ჩემპიონატის ღია ჩვენებისთვის მოსამზადებელ სამუშაოებს გაეცნო.

როგორც კახა კალაძემ განაცხადა, ფეხბურთის ფედერაციასთან ერთად მიიღეს გადაწყვეტილება, რომ სტადიონზე განთავსდეს ექვსი დიდი მონიტორი, სადაც მხარდამჭერებს საშუალება ექნებათ, თურქეთ-საქართველოს მატჩს პირდაპირ ეთერში უყურონ. ასევე, სტადიონის გარეთ განთავსებული იქნება კვების ობიექტებიც.

თბილისის მერმა ფეხბურთელებს კიდევ ერთხელ უსურვა წარმატება ხვალინდელ შეხვედრაზე.

„ფეხბურთის ფედერაციასთან ერთად მივიღეთ გადაწყვეტილება, ქართველი გულშემატკივრებისთვის, ვინც დარჩა საქართველოში და ვერ მოახერხა გამგზავრება, მიხეილ მესხის სტადიონზე იქნება შესაძლებელი მატჩის პირდაპირ ეთერში ყურება. დამონტაჟებული იქნება ექვსი ძალიან დიდი მონიტორი. საკმაოდ სასიამოვნო გარემო იქნება შექმნილი. ასევე სტადიონის გარეთ განთავსებული იქნება კვების ობიექტები და იქნება ძალიან კომფორტული გარემო, რათა ვუგულშემატკივროთ ჩვენს ნაკრებს. ხვალ ნამდვილად დიდი დღეა, რომელსაც დიდი ხანია, ველოდებით. ყველა ქართველი გულშემატკივრის ოცნება იყო, რომ ჩვენი ნაკრები ერთხელ მაინც მოხვედრილიყო ევროპის ჩემპიონატზე და ფეხბურთელებმა ეს ბედნიერება გვაჩუქეს. მინდა, წარმატება ვუსურვო ბიჭებს“, – განაცხადა კახა კალაძემ.

მიხეილ მესხის სტადიონზე მისვლა გულშემატკივარს ხვალ, 20:00 საათიდან შეეძლება.

თბილისი

კრწანისის რაიონის გამგებელმა, ლაშა ცაგურიამ მიმდინარე წელს განხორციელებული პროექტების შესახებ ანგარიში წარადგინა

კრწანისის რაიონის გამგებელმა, ლაშა ცაგურიამ მიმდინარე წელს განხორციელებული ინფრასტრუქტურული, სოციალური, საგანმანათლებლო, კულტურული და სპორტული პროექტების შესახებ ანგარიში წარადგინა.

წლიური ანგარიშის პრეზენტაციას თბილისის მერის მოადგილე კახა აბულაძე დაესწრო.

როგორც რაიონის გამგებელმა აღნიშნა, 2025 წელს კრწანისის რაიონში არაერთი მნიშვნელოვანი პროექტი დასრულდა, მათ შორის, სრულად განახლდა ზემო ფონიჭალის ცენტრალური ქუჩა, სადაც მოეწყო 1 372 გრძივი მეტრი დახურული სანიაღვრე ქსელი, გრუნტის დამჭერი კედელი, გასუფთავდა უკანონოდ შემოღობილი ტერიტორიები და მათ ნაცვლად გამწვანების თარგები მოეწყო. პროექტის განსახორციელებლად ადგილობრივი ბიუჯეტიდან 3 000 000 ლარზე მეტი დაიხარჯა.

სულ, საანგარიშო პერიოდში საგზაო ინფრასტრუქტურა 84 მისამართზე მოწესრიგდა.

რაც შეეხება მწვანე სივრცეებს, რაიონში 12 მისამართზე მოეწყო და რეაბილიტირდა სკვერები და მოსასვენებელი ზონები, ხოლო 98 მისამართზე მცირე სარემონტო სამუშაოები ჩატარდა.

“ბინათმესაკუთრეთა ამხანაგობების განვითარების ხელშეწყობის“ პროგრამის ფარგლებში, 183 პროექტი განხორციელდა, კერძოდ რეაბილიტირდა სახურავები, ლიფტები, წყალარინების სისტემები და შეკეთდა სართულშუა ნაპრალები.

როგორც პრეზენტაციაზე აღინიშნა, კრწანისში მცხოვრებ 8000-ზე მეტ განმცხადებელს სხვადასხვა სახის სოციალური დახმარება გაეწია.

ამასთან, გამგეობის ორგანიზებით, მოეწყო სხვადასხვა სპორტული, შემეცნებითი და გასართობი ღონისძიება.

ანგარიშის პრეზენტაციას, თბილისის მერის მოადგილის გარდა, ესწრებოდნენ კრწანისის მაჟორიტარი დეპუტატი საკრებულოში ლევან ჯაფარიძე, თბილისის საკრებულოს განათლებისა და კულტურის კომისიის თავმჯდომარე ბექა ოდიშარია და თბილისის საკრებულოს ჯანმრთელობის დაცვისა და სოციალურ საკითხთა კომისიის თავმჯდომარე ბექა მიქაუტაძე.