,
საქართველოს ფეხბურთის ფედერაცია თბილისში კიდევ ერთ საფეხბურთო ცენტრს აშენებს.
თბილისის მერიის ცნობით, მშენებლობა დიღმის მასივში, საფეხბურთო სკოლა „ავაზას“ ტერიტორიაზე მიმდინარეობს.
სამშენებლო პროცესს დედაქალაქის მერი კახა კალაძე საქართველოს ფეხბურთის ფედერაციის პრეზიდენტ ლევან კობიაშვილთან ერთად გაეცნო.
თბილისის მერის თქმით, წინა ხელისუფლების დროს გასხვისებული ტერიტორია დედაქალაქის მერიამ ადგილმონაცვლეობის გზით დაიბრუნა და შემდეგ ფეხბურთის ფედერაციას გადასცა.
„დიღმის მასივში მდებარე „ავაზას“ ყოფილ საფეხბურთო სტადიონს საკმაოდ დიდი ისტორია გააჩნია. ის წინა ხელისუფლების დროს გასხვისდა. იყო კონკრეტული ვალდებულება, რომ 10 წლის განმავლობაში სტატუსი შეენარჩუნებინათ და შემდეგ აღნიშნულ კომპანიას შეეძლო ეს სივრცე სხვადასხვა მიზნისთვის გამოეყენებინა. მათი სურვილი იყო კორპუსები აეშენებინათ, ჩვენთვის კი კატეგორიულად მიუღებელი იყო ეს დამოკიდებულება, რადგან განსაკუთრებული მიდგომა გვაქვს რეკრეაციულ სივრცეებთან, სპორტულ არეალებთან. შესაბამისად, აღნიშნული სივრცის ადგილმონაცვლეობა მოვახდინეთ. ეს ტერიტორია ფეხბურთის ფედერაციას გადავეცით. აქ იქნება ბავშვთა საფეხბურთო სკოლა. დღეს უკვე ორი საფეხბურთო მოედანი კეთდება, აქედან ერთი სტანდარტული, სრულფასოვანი იქნება. გარდა ამისა, ეწყობა ღამის განათება, ტრიბუნები მაყურებლისთვის, გასახდელები, საშხაპეები. საბოლოოდ, ტერიტორია ყველანაირად მოწესრიგდება.
ამინდი თუ მოგვცემს შესაძლებლობას, პროექტი დეკემბრის ბოლოს დასრულდება. თუ ამინდი ხელს არ შეგვიწყობს, გაზაფხულზე იქნება დასრულებული. პროექტის დასრულების შემდეგ, ეს ტერიტორია თავის ძველ ისტორიას დაიბრუნებს და უამრავ ახალგაზრდას მოემსახურება“, - განაცხადა კახა კალაძემ.
ამასთან, თბილისის მერმა აღნიშნული პროექტის განხორციელებისთვის ფეხბურთის ფედერაციას მადლობა გადაუხადა.
„პროექტის ფარგლებში ადგილზე მოეწყობა სტანდარტული ზომისა და 9/9-ზე მოედნები, რომლებიც ტრიბუნებითა და განათებით აღიჭურვება. ტერიტორიაზე განთავსდება ადმინისტრაციული შენობა, გასახდელებით, საშხაპეებით, მსაჯთა და ექიმის ოთახებით.
აღნიშნული ტერიტორია საქართველოს ფეხბურთის ფედერაციას 2022 წლის სექტემბერში გადაეცა. პროექტი ფიფას პროგრამა FORWARD-ის, უეფას პროგრამა Hat Trick-ისა და საქართველოს ფეხბურთის ფედერაციის დაფინანსებით ხორციელდება. ინფრასტრუქტურის მოვლა-პატრონობას საქართველოს ფეხბურთის ფედერაცია უზრუნველყოფს.
აღნიშნული ინფრასტრუქტურით სარგებლობას ადგილობრივი ბავშვთა საფეხბურთო სკოლები და გოგონათა გუნდები სრულიად უფასოდ შეძლებენ.
დიღმის მასივის გარდა, მსგავსი ინფრასტრუქტურული პროექტები უკვე განხორციელდა თბილისის ხუთ უბანში, მათ შორის, ვარკეთილში, გლდანში, დიდ დიღომში, ვაკეში და ნუცუბიძის პლატოზე, ასევე ფოთში და სამტრედიაში.
ადგილზე იმყოფებოდნენ დიდუბის რაიონის გამგებელი ვლადიმერ ძნელაძე, თბილისის მერიის ქონების მართვის სააგენტოს ხელმძღვანელი ირაკლი თავართქილაძე და თბილისის საკრებულოს მაჟორიტარი დეპუტატი გივი ჩხარტიშვილი“,-აღნიშნულია ინფორმაციაში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
