,
დედაქალაქის მერი კახა კალაძე, ეკონომიკისა და მდგრადი განვითარების მინისტრ ლევან დავითაშვილთან ერთად, ჰიპერმარკეტ „აგროჰაბის“ მეხუთე ფილიალის გახსნის ღონისძიებას დაესწრო.
ახალი ფილიალი მტკვრის მარცხენა სანაპიროზე, ზვიად გამსახურდიას N80-ში გაიხსნა.
„ვუერთდები მილოცვებს. დარწმუნებული ვარ, აღნიშნული პროექტი წარმატებული იქნება. ეს შენობა-ნაგებობაც გამორჩეულია თავისი ვიზუალით, არქიტექტურით. მინდა, ყველას მადლობა გადავუხადო, ვინც პროექტზე მუშაობდა. ასევე, აქ გათვალისწინებულია საპარკინგე ადგილები. დღეს, როდესაც ქალაქში 600 000-ზე მეტი ავტომობილი გადაადგილდება, მოგეხსენებათ, რამდენად მნიშვნელოვანია, რომ შენობა-ნაგებობას, რომელიც ადამიანების თავშეყრის ადგილი იქნება, ჰქონდეს პარკირებისთვის შესაბამისი სივრცე. გარდა ამისა, დასაქმებული იქნება 300 ადამიანი, რაც ერთ-ერთი უმნიშვნელოვანესი პრიორიტეტია ჩვენთვის. წარმატებას გისურვებთ თქვენს წამოწყებაში“, - განაცხადა კახა კალაძემ.
როგორც კომპანიის წარმომადგენლები აცხადებენ, წელსვე იგეგმება კიდევ ორი ფილიალის გახსნა საბურთალოს რაიონში და ქალაქ ქუთაისში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
