,
დედაქალაქის მერმა კახა კალაძემ მოადგილეს დაავალა, სამუშაო ჯგუფში ყველა დაინტერესებული პირი ჩართოს, ვინც ვაშლიჯვრის ფერდობზე მეწყერს სწავლობს. როგორც კალაძემ თბილისის მთავრობის სხდომაზე აღნიშნა, ვაშლიჯვარში მიმდინარე პროცესებთან დაკავშირებით ბოლო დღეების განმავლობაში მიზანმიმართულად ვრცელდება დეზინფორმაცია, რაც მიზნად ისახავს მოსახლეობაში პანიკის დათესვას.
„სამწუხაროდ, უნდა აღვნიშნო, რომ ბოლო დღეების განმავლობაში კონკრეტულ მედიასაშუალებებში მიზანმიმართულად ხდება დეზინფორმაციის გავრცელება და მიზანმიმართულად ხდება პანიკის დათესვა, რაც ძალიან ცუდია. კიდევ ერთხელ მინდა მოვუწოდო ამ მედიასაშუალებებს, რომ თავი შეიკავონ გადაუმოწმებელი ინფორმაციის გავრცელებისგან. პირველი, რაზეც აპელირება მიდიოდა, იყო ის, რომ თითქოს დედაქალაქის მერიამ დამალა ეს პრობლემა ან პირიქით, არც იცოდა ამის თაობაზე. ჩვენ ვსაუბრობთ პრობლემაზე, რომელიც რამდენიმე ათეული წელია არსებობს დედაქალაქში. ჩვენ ვიცოდით ამ პრობლემასთან დაკავშირებით და მეტიც, ჩვენს ვებ გვერდზე tas.ge-ზე ატვირთული იყო ინფორმაცია არა მარტო ამ ზონასთან დაკავშირებით, არამედ ყველა იმ პრობლემურ ადგილზე, რაც სამწუხაროდ, გვაქვს დედაქალაქში. ქალაქში კიდევ გვაქვს მეწყრულად საშიში ადგილები, რომელიც რა თქმა უნდა, ოფიციალურად გამოქვეყნებულია. არ არის სწორი ინფორმაცია რასაც ავრცელებენ კონკრეტული მედიასაშუალებები.
ჩვენი სამუშაოების ფარგლებში ყოველდღიურად ვაკვირდებოდით არსებულ ფერდს და როცა გაჩნდა იმის საშიშროება, რომ პრობლემები შეიძლებოდა შექმნილიყო, ორმხრივად ჩაიკეტა მოძრაობა. ამ პროცესებში პირველივე დღიდან ჩავრთეთ როგორც ქართველი, ასევე გერმანელი სპეციალისტები. ესენი არიან ადამიანები, რომლებიც მუშაობენ წყნეთი-ახალდაბის მეწყრული გზის აღდგენის სამუშაოებზე და ასევე შეშელიძის ქუჩაზე, სადაც სერიოზული პრობლემა იდგა და ადგილობრივი მოსახლეობისთვის დიდ საფრთხეს წარმოადგენდა“, - განაცხადა კალაძემ.
მერმა თავის მოადგილეს, ირაკლი ბენდელიანს დაავალა, სამუშაო ჯგუფში ყველა დაინტერესებული პირი ჩართოს, ვინც ვაშლიჯვრის მეწყერს სწავლობს.
„ვიცი, რომ არის კიდევ გარკვეული დაინტერესებული ჯგუფები, ვინც დედაქალაქში მეწყრულ ადგილებს სწავლობს, ამიტომ მინდა ჩემს მოადგილეს ირაკლი ბენდელიანს დავავალო, რომ ეს ადამიანები ჩართოთ ამ სამუშაო ჯგუფში. ისინი ცუდს არაფერს გააკეთებენ, პირიქით. ერთობლივი ძალებით რაც შეიძლება სწრაფად მოვაგვაროთ კონკრეტული პრობლემა.
ამ ეტაპზე მიმდინარეობს კვლევა-პროექტირება. სამუშაო ჯგუფი განაგრძობს სამუშაოებს გერმანელ სპეციალისტებთან ერთად. მათ დადებითად შეაფასეს უსაფრთხოების ზომებისთვის გადადგმული ნაბიჯები, რომ ორმხრივად ჩაიკეტა მოძრაობა, სამუშაოები შეჩერებულია“, - განაცხადა კალაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
