,
დამატებით 400 ერთეული მიკროავტობუსის შესაძენად თბილისის მერია ბაზრის კვლევასა და სატენდერო პროცედურას დაიწყებს, - ამის შესახებ დედაქალაქის მთავრობის სხდომაზე თბილისის მერმა კახა კალაძემ განაცხადა.
მისი თქმით, არსებული მიკროავტობუსების პარკი ამორტიზებულია და მგზავრთა კომფორტული გადაადგილებისთვის მინიმალურ სტანდარტსაც კი ვერ აკმაყოფილებს. ამ მიზნით, გასულ წელს მერიამ 300 მიკროავტობუსი შეიძნია და წელსაც 400 ახალი მიკროავტობუსის შეძენას გეგმავს.
„თბილისის მიკროავტობუსის კომპანიასთან“ თითქმის დასრულებულ გვაქვს მოლაპარაკებები. კომპანია უზრუნველყოფს კაპიტალის მოზიდვასა და პირველ რიგში გამოისყიდის 300 ერთეულ მიკროავტობუსს, რომელიც მერიამ შეიძინა ბიუჯეტის ფულით. ამასთან, დამატებით შეისყიდის 400 ერთეულ მიკროავტობუსს. ეს უნდა მოხდეს წლის ბოლომდე. თბილისის ვიცე-მერმა აწარმოა მოლაპარაკებები „თბილისის მიკროავტობუსის კომპანიასთან“ და ბანკებთან, მიღწეულია შეთანხმება, რომ მიკროავტობუსების ჩანაცვლების პროექტში განხორციელდება, დაახლოებით, 90 მლნ ლარის ინვესტიცია. ეს არის ზუსტად ის თანხა, რომელიც მოხმარდება 300 ერთეული მიკროავტობუსის გამოსყიდვას, კომპანიის მიერ დამატებით 400 ერთეული მიკროავტობუსის შეძენას, ხოლო ამ გამოსყიდვისგან მიღებული საფასურით მერია კიდევ შეიძენს 300 ერთეულ მიკროავტობუსს. ჯამში, ჩვენ გვეყოლება 1 000 ერთეული მიკროავტობუსი, რომელიც მთლიანად ჩაანაცვლებს ძველ, ყვითელ მიკროავტობუსებს.
უახლოეს დღეებში, ამ მიზნით, თბილისის მერია გამოაცხადებს ბაზრის კვლევას და დაიწყებს სატენდერო პროცედურას, რათა შევისყიდოთ დამატებითი რაოდენობა, რომლის მოწოდების ვადა განისაზღვრება წლის ბოლომდე. შესაბამისად“, - განაცხადა კალაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
