,
თბილისის მერის კახა კალაძის თქმით, ინფორმაცია "ქართული ოცნების" დატოვებასთან და მის მილანში გადასვლასთან დაკავშირებით სიცრუეა და ჭორები მიზანმიმართულად ვრცელდება.
კახა კალაძის თქმით, ის პოლიტიკაში დარჩენას კიდევ დიდი ხნით აპირებს.
"მილანში რატომ უნდა წავიდე, ვერ გამიგია. მილანიდან ჩამოვედი და 2012 წლიდან, მას შემდეგ, რაც დავასრულე ჩემი სპორტული კარიერა, ქვეყანაში დავბრუნდი და ვარ პოლიტიკაში.
ვფიქრობ, რომ ის საქმე, რასაც ვაკეთებ, სჭირდება ჩემს ქვეყანას. ჩემს თანაგუნდელებთან ერთად 24-საათიან რეჟიმში ვმუშაობთ იმისთვის, რომ რაც შეიძლება სწრაფად მოვაგვაროთ ყველა პრობლემა, რომელიც აწუხებს თბილისს და თბილისში მცხოვრებ ადამიანებს. შესაბამისად, ეს არ არის სწორი ინფორმაცია.
მე არსად წასვლას არ ვაპირებ, ვაპირებ პოლიტიკაში დარჩენას კიდევ დიდი ხანი, სანამ მექნება საზოგადოების მხარდაჭერა, მოსახლეობის თანადგომა. მე არასდროს გავრბივარ შუა საქმიდან. მიყვარს საქმის ბოლომდე მიყვანა და ყოველთვის ვცდილობ, არ დავკმაყოფილდე მიღწეულით. ზოგადად, ჩემი წარმატების ფორმულის ნაწილია, რომ როდესაც გარკვეულ წარმატებას აღწევ, არასდროს არ უნდა დაკმაყოფილდე ამით, უნდა ეძებო უფრო მეტი და ასევეა ჩემს ქალაქთან მიმართებაშიც. ბევრი კარგი საქმე გავაკეთეთ, ბევრი პროექტი განვახორციელეთ, მაგრამ ეს, რა თქმა უნდა, არ არის საკმარისი.
მე თბილისელებს ვერ ვეტყვი, რომ აი, ნახეთ, ჩვენ რა მაგრები ვართ, რამდენი კარგი რამ გავაკეთეთ. რამდენი კარგიც გავაკეთეთ, იმაზე ორჯერ და სამჯერ მეტი პრობლემებია დედაქალაქში, რომელსაც ჭირდება მოგვარება და მე, ჩემს თანაგუნდელებთან ერთად, სრული პასუხისმგებლობით ვამბობ, ამას ყველაფერს გავაკეთებთ იმისთვის, რომ ხვალინდელი თბილისი იყოს უკეთესი", - განაცხადა კახა კალაძემ ტელეკომპანია "იმედის" ეთერში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
