,
გლდანის რაიონში N50, სამგორში N28 საბავშვო ბაღების მშენებლობა, ისანში კი N37 საბავშვო ბაღის რეკონსტრუქცია დაიწყო, - ამის შესახებ თბილისის მერმა კახა კალაძემ მუნიციპალიტეტის მთავრობის დღევანდელ სხდომაზე განაცხადა.
მისივე თქმით, მუნიციპალიტეტის მერია 2017 წლიდან საბავშვო ბაღების ინფრასტრუქტურას აქტიურად აწესრიგებს და ევროპულ სტანდარტებს ამკვიდრებს.
„გლდანის რაიონში, ზაჰესის დასახლებაში N50 ბაღის შენობა რამდენჯერმე იყო მანამდე გამაგრებული. ექსპერტების დასკვნის საფუძველზე, განხორციელდა მისი დემონტაჟი. ბაღს ფუნქციონირება არ შეუწყვეტია და ის იჯარით, ალტერნატიულ ფართში არის განთავსებული. მომავალი წლის ბოლოსკენ კი ზაჰესის მცხოვრებლებს უკვე თანამედროვე ბაღში შეეძლებათ პატარების მიყვანა. იგივე შეიძლება ითქვას სამგორის რაიონში მდებარე ერთ-ერთ მრავალჯგუფიან, N28 საბავშვო ბაღზე. მისი დემონტაჟიც ავარიულობის გამო განხორციელდა და რამდენიმე დღის წინ უკვე სამშენებლო სამუშაოები დაიწყო“, - განაცხადა კახა კალაძემ.
დედაქალაქის მერის თქმით, რეკონსტრუქციის სამუშაოები ისნის რაიონში მდებარე N37 საბავშვო ბაღშიც დაიწყო.
„დავიწყეთ ისნის რაიონში მდებარე N37 საბავშვო ბაღის რეკონსტრუქციის პროექტი. ბაღის შენობის ერთ ფლიგელს დაემატება სართული და შესაბამისად, გაიზრდება ჯგუფების რაოდენობა. ბაღი აღიჭურვება თანამედროვე სტანდარტების შესაბამისად, რასაც აქამდე სრულად ვერ აკმაყოფილებდა. პროექტის დასრულება მომავალი წლის ბოლომდე იგეგმება“, - აღნიშნა კახა კალაძემ.
მისივე განმარტებით, ავარიული საბავშვო ბაღების შენობების დემონტაჟთან დაკავშირებული პოლიტიკური სპეკულაციები სიმართლეს არ შეესაბამება.
„გვახსოვს სპეკულაციები პოლიტიკური პარტიების მხრიდან, თითქოს, ამა თუ იმ ბაღის ადგილას კორპუსების მშენებლობა იგეგმებოდა. ეს ჩვეულებრივი სპეკულაციები იყო, რასაც დღეს დაესვა წერტილი. საზოგადოება დარწმუნდა, რა დამოკიდებულება აქვს დედაქალაქის მთავრობას საბავშვო ბაღების მიმართ. მიზანი გვაქვს ერთი - მთელი ქალაქის მასშტაბით საბავშვო ბაღები უნდა შეესაბამებოდეს საერთაშორისო სტანდარტებს“, - განაცხადა კახა კალაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
